Steven kaa ér, “shighe u mo vea ishiôr yam se pav la, kundam iyol, kwagh u me er cii m fa ga. Ishima yange i vihim ker je pev, i lu je kwagh ngu a nyoon mo ken ishima inja ne nahan ga.”

 I lu je nahan imbakwagh ne er u vee? Aluer ka nahan yô, ngeren ne una fatyô u wasen we.

•  Er ka i lu ken ishima yô

•  Kwagh u u fatyô u eren yô

 Ishiôr ka ia kpe yô, nomsoor man kwase la cii, ka i vihi ve tsung.

•   Aluer ka we u ve a mhen u a pav ishiôr yô, alaghga a lu u ken ishima er Jasmine nahan, a kaa ér, “Er m fa mer m er kwagh u a vihi or u m we nan ikyo tsung yô, kwagh ne hingir mo ikyav ken ishima mbi m ver ishima mer, mayange me kera tôô mbi ga yô.”

•   Aluer ka we u ve a mhen u a pav ishiôr la ga yô, alaghga u kav er ka i hii ve kwagh ne ka una er mbagenev ve ve kaa ér uma due ve ishima yô. Gumkwase ugen u i yer un ér Janet yô, kaa ér, “Yange m zungwe sha igbenda kposo kposo, m kaa mer ei, kwagh er nahan ga shi ishima i vihim ker shi m taan akperan ken ishima shi m ure, ka nôngon u kuman inyom nahan yô, m mase lumun mer ishiôr i kpe.”

 Jindikwagh: Ishiôr ka ia kpe yô, u vôr ken ishima shi u ure tsung. Er orngeren Bibilo ugen a nger nahan ér: “Ishima i yinan yô, i om akuhe.”—Anzaakaa 17:22.

•  Ôr ijende you i kôôsôô i i vie ken jijingi yô. Bibilo kaa ér: “Huror yô, lu a dooshima gbem, man shi i mar anmgbian sha ci u ayange a ican.” (Anzaakaa 17:17) Aluer u pase ma ormaren wou shin ijende you i i vie ken jijingi, er ishima i lu u ker la yô, nana fatyô u wasen we u hiden henen kwagh sha gbenda u vough.

   “Yange m lu kwagh wam tswen shi m ôr or môm er ishima i lum ker la ga je kuma iwer imôngo. Kpa azende a a fatyô u wasen we kule kule zan zan ishima ia kar lun we ker guda. Yange m zua a msurshima ga zan zan lu shighe u m va ôr azende am la ve, ishima pever mo shimi ye.”—Mkaanem ma Janet, gumkwase ugen.

•  Hen kwagh ken kwagh u a er u la. Injakwagh igen ken Bibilo kaa ér: “Zua a kwaghfan, zua a mkav.” (Anzaakaa 4:5) Akaa a vihin a a eren se la, aa fatyô u wasen se u hemban fan mlu wase, shi se fa er se er kwagh shighe u kwagh a kera ze er se ver ishigh ga la yô.

   “Yange mo vea ishiôr yam se mba paven yô, ijende yam igen pinem ér, ‘Ka nyi u hen shighe u u lu vea ishiôr you la, man u fatyô u eren tom a kwagh u u hen la shighe u ú lu va sôôr kwase ugen la nena?’”—Mkaanem ma Steven, gumor ugen.

•  Msen. Bibilo kaa ér: “Haa akaa a zan we iyol cii sha TER, tsô Una taver we.” (Pasalmi 55:22) Msen una fatyô u wasen we u hemban ijungwen you la, shi u nenge ishiôr i ne pav la sha gbenda ugen kposo.

   “Eren msen gbem. Yehova kav mnyoon wou u ken ishima la shi a hemba fan zayol wou la a we.”—Mkaanem ma Marcia, gumkwase ugen.

•  Wasen mbagenev. Bibilo kaa ér: “Hanma or nana de kera waan akaa a nan iyol i nan ikyo tseegh ga, kpa nana wa akaa a mbagenev ikyo kpaa.” (Mbafilipi 2:4) Er u lu wasen ior seer a seer la, ica a gba ga tsô u nenge ishiôr i ne pav la sha gbenda u vough.

   “Ka wea pav vea ishiôr you yô, i lu u inja er kwagh wou bee ken uma ne nahan, shi kwagh ne ka a nyoon ken ishima tsung je i hemba ivav i sha iyol. Kpa m kav mer ka i va lu guda. Yange gba u me de shighe a kar, sha er a pever mo iyol ken ishima yô.”—Mkaanem ma Evelyn, gumkwase ugen.