Ken ngeren ne

•  Ishiôr ka nyi?

•  U wa agoyol kuma u hiin ishiôrô?

 Mbagen ka ve nenge ér ishiôr ka di kwagh u eren sha u zuan a msaanyol. Nahan kpa, ken ngeren ne yô, “ishiôr” ka shighe u nomsoor man kwase u ve lu sôôr ayol a ve la ka ve luun imôngo sha er vea nenge aluer ve kuma vea orgen la sha u vea fatyô u vôson nan yô. Nahan ishiôr ngi a awashima. Ka di shighe u nomsoor lun ikyua a kwase shin kwase lun ikyua a nomsoor sha ci ve soo di u lun imôngo tsô ga.

 Shighe ka una karen yô, ishiôr i u lu eren la i wase u u tsuan kwagh u vough, ka u vôson or shon u ne lu sôôr ayol a en la gayô kera zan hemen a shiôr shon ga. Shighe u u hii ishiôr la je, faan we ia va kure sha môm ken igbenda i ihiar ne keng keng.

 Kwagh u i gbe u u fa yô: Aluer u nenge wer u kuma shiôr yô, doo u u fa wer u kuma u eren ivaa kpaa.

 Aluer u ngu eren ishiôr vea or yô, alaghga u vôso nan, nahan doo u u hen sha aeren a u nenge wer ne lu a mi ve aa fatyô u wasen ne shin aa ne lu a mi ve aa vihi mlu wen la. Ikyav i tesen yô, nenge ase atôakyaa a dondo ne:

•   Mlu wou a ior mba hen tsombor. Gbenda u u eren kwagh a mbamaren ou kua anmgbianev ou, hemban je yô, shighe u ishima i vihi u la, ashighe kpishi ka u tese er u va eren kwagh a kwase shin nomou la yô.

   Kwaghwan u Bibilo: “Dugh nen hanma ihyom ken ishima yen kera, kua ishimanyoon man iyugh man ieren i zôhôn genger genger man ityuhwanev, kua hanma kwagh u vihin cii.”—Mbaefese 4:31.

   Pine iyol you wer: ‘Mbamaren av man anmgbianev av vea fatyô u kaan ér m eren kwagh a ve sha icivir kpa? Shighe u m lumun a ve sha ma kwagh ga yô, ka m gba ishima shimi m lam ken bem shin ka m vihi ishima shi m zôhô a nana?’

•   Nan iyol you. Ka wea er ivaa yô, ashighe kpishi i gba u u henen sha kwagh u nomou shin kwase wou a soo la shi ashighe agen u de kwagh u a doo u la a kar u sha ci ve.

   Kwaghwan u Bibilo: “Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.”—1 Mbakristu 10:24.

   Pine iyol you wer: ‘Hanma shighe yô, ka m soo mer me er ishima yama? Mbagen mba nengen mo ér m sendegh sha kwagh ga kpa? Ka sha igbenda i nyi nahan ka m tese mer m hemba wan kwagh u mbagen ikyo a kwagh wama?

•   Iyol hiden a mi ijime. Nom shin kwase u injaa ka nana er kwagh u shami ga yô, nan zamber sha mimi ér i ya nan anyi.

   Kwaghwan u Bibilo: “Se cii ka se nôngo gbeev acin imôngo.”—Yakobu 3:2, ngeren u shin kpe.

   Pine iyol you wer: ‘Ka mea er kwagh shami ga nahan m lumun ibo kpa, shin ka m keren ishô? Ka a wam kwagh shin a tesem er me er kwagh ve a hemba doon nahan ishima ka i vihim kere?’

•   Inyaregh. Inyaregh ka ki nôngo u lun kwagh u noov man kasev ve eren ayôôsô sha mi yô. Nahan aluer u vihin inyaregh sha inja yô, u pande zayol la.

   Kwaghwan u Bibilo: “Ka an ken a ven nana soo u maan iyou i taven gôgônan ve nana vande teman gbidyen kwar fan aluer nan ngu a kwagh kuma u maan i been cii ve nana hii u maan ga ase?”—Luka 14:28.

   Pine iyol you wer: ‘Ka m wa ikyo sha gbenda u m vihin inyaregh la kpa, shin hanma shighe yô, ka m kimbin a kimbin anzô. M tese sha ieren yam mer m vihin inyaregh sha inja nena?’

•  Mlu wan vea Yehova: Aluer u u ngu Orshiada u Yehova yô, doo u u ver shighe u eren akaa ken mcivir u Yehova. Gba u u ver shighe u henen Bibilo shi zan mbamkombo mba Mbakristu.

   Kwaghwan u Bibilo: “Saan mba i sar ve tsung u fan Aôndo la iyol.”—Mateu 5:3.

   Pine iyol you wer: Ka m nôngo kpoghuloo m eren akaa aa na jighjigh wam una hemba taver kpa? M veren akaa a ken mcivir u Yehova hiihii ken uma wam kpa, shin ka m de mer akaa agen a kar a daneme?’

 Kwagh u i gbe u u fa yô: Doo u u lu nom shin kwase u injaa hen or u nan vôso u la. Aluer u ngu nôngon kpoghuloo wer u lu or u eren kwagh kundu kundu, or u nan kpa nan eren kwagh kundu kundu nana hemba soon we.