U za memyol shi saan we iyol kpaa, nahan u soo u ôron azende a ou er memyol a lu zan yô. Nahan u ôr ve nena? Ú

1. tindi hanmô ve a kaade u a lu a foto shi u nger kwagh ker kpuaa yôô?

2. nger loho u tindi azende ou cii a mi sha Intanet?

3. kpur ufoto ou sha Intanet?

Shie u mbamaren mba mbamaren ou lu sha kwav wou la, alaghga ka kwagh u “A” a ôr la tseegh lu u vea fatyô u eren ye.

Shie u mbamaren ou lu agumaior er u lu hegen ne la, alaghga kwagh u “B” a ôr la kpa lu kwagh u vea fatyô u eren yô.

Nyian ne, agumaior kpishi a i ne a ian i veren foto sha Intanet yô vea hemba soon u eren kwagh u “C” a ôr la. We kpa kape i lu laa? Aluer ka nahan yô, ngeren ne una wase u, u palegh akaa kpuaa a ma a nyer a we ken zayol yô.

•  Ka mbamtsera mba nyi ve lu kere?

•  Ka zayol u nyi a lu kere?

•  Kwagh u u fatyô u eren yô

•  Kwagh u mbakov ou ve ôr yô

Ka kwagh u her ave ave je. “Ka mea za zende u doon mo, shin mea lu vea a zende am man a saan mo iyol kpishi yô, m ver ufoto mba kwagh u a lu zan hemen la sha Intanet her ave ave er i lu saan mo iyol her la je.”—Melanie.

Ka i lu ican ga. “Ka i hemba lun mo zange u nengen ufoto mba azende am a sember veren sha Intanet yô, a u bughun ilyoho i ve ver sha er me fa kwagh u a lu zan hemen ape ve lu la yô.”—Jordan.

Kwagh ne ka a wase ú u fan kwagh ve. “M ngu ikyua a azende am agen kua mbagen hen tsombor wam ga. Nahan ka vea veren ufoto sha Intanet fele fele mea nengen yô, i lum er m ngu nengen a ve hanma iyange nahan.”—Karen.

U na yô kwagh a fatyô u tseren we. Aluer anar u u tôô foto a mi la ngu a kwagh u i yer ér geotagging, u ka a tese ape or lu ve nan tôô foto la yô, ufoto mba u ver sha Intanet mbara vea pase ior kwagh wou a hembe er u hen la. Ijiir i sha Intanet i i yer ér Digital Trends la kaa ér: “Aluer or ver ufoto shin akaa agen sha Intanet a tesen kwagh u ijiir i nan lu her la jighilii yô, kwagh ne una wase ior mba ve lu a kwagh u wasen ve u tôvon sha kwagh u ijiir i or sha Intanet la kua mba ve soo u bulan nan la kpaa u tôvon fan ape nan lu la.”

Ka mimi, mbaaferev kpishi ka i lu hen ijiir i u lu la kwagh ka a gba ve ga, ka i lu ape u lu ga la. Ijiir i sha Intanet i Digital Trends ôr kwagh u za hemen kwa gen la kaa ér, mbaiv utar za iv hen uyaav 18 shie u or môm lu her ga yô. Er nan ve mbaiv ve fa ér or a lu her ga? Yange ve bugh Intanet ve tôv zende u mbayaav mban, nahan ve ii ikyav mbi a tee yô, a hemba inyaregh udola mba Amerika 100,000 yô.

Alaghga u za asegh sha kwagh u hôngorough. Ior mbagen mba heren a her kwagh u vea ver sha Intanet ér ior ve nenge ga. Gumkwase ugen iti na ér Sarah, a kaa ér: “Kwaghbo ne ka a hemba lun shie u u lu za nengen akaa a ior mba u fe ve ga yô. Ka i lu inja er u ngu zenden hen geri u u fe un ga man u ngu a maape ga nahan. Alaghga u za due hen ijiir i u soo u zan ga yô.”

Shie wou una fatyô u yemen. “Alaghga u yem u nengen akaa a ior ve sember veren sha ahumbe shin akaa a ior mbagen ve ôr sha kwagh shon yô, shie a yem kpishi je kpa u fa ga. Alaghga kwagh ne una va hingir zayol je yô, u zer dughun hanseeti wou fele fele sha er u nenge akaa a mbagen ve sember veren yô.”

Gumkwase ugen kpa lumun a kwagh ne, iti na ér Samantha. A kaa ér: “Ka i gba u me wa ikyo sha shie u m vihin hen ajiir a sha Intanet ne la. Aluer gba u u lu a ijiir i veren ufoto sha Intanet yô, doo u u kôr iyol you tsaha.”

• Kange ishima wer u palegh akaa a a lu a dedoo ga yô. Bibilo kaa ér: “Me kera ver kwagh u dang sha ashe am mayange ga.”—Pasalmi 101:3.

  “Ka m nengen akaa a ior mba m ye boki a ve sha Intanet ve veren sha ajiir a ve la hanma shie, man ka mea nenge mer akaa a ve ver la doo ga yô, m pav boki a ve.”—Steven.

• Palegh ior mba ve eren kwagh er we ga la, sha ci u vea fatyô u vihin aeren a ou a dedoo la. Bibilo kaa ér: “I de tsughun ne ga. Ujende mba bov mba vihin anza a dedoo.”—1 Mbakorinte 15:33, NW, ngeren u shin kpe.

  “De gbe dondon kwagh u ufoto mba i lu tôôn veren sha Intanet la sha ci u ior kpishi soo ga. Ashie kpishi ka henpe ka u va tagher a iliam i dang shin ior mba lun idyelegh man akaa a dang agen je la.”—Jessica.

• Ver shie u u bughun Intanet kua shie u u veren ufoto ou sha Intanet yô. Bibilo kaa ér: “Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen ikyo.”—Mbaefese 5:15, 16.

  “M pav boki vea ‘ior mba ka ve ver akaa sha Intanet i ngee i gande’ la. U tesen ikyav yô, or ka nan za shin kpe ifi nan za tôô kwembe môm ufoto 20 maa nan kura ufoto mbara puru nan haa sha Intanet. Sha mimi yô, ka i tôô shie kpishi u nengen ufoto mbara.”—Rebekah.

• Ver ishima sha er ufoto mba u veren la vea tese ér u nengen wer u hemba mbagen ga yô. Paulu u lu môm ken mbangeren Bibilo la kaa ér: “M ngu kaan hanmô wen . . . mer, nana̱ de nengen sha mlu u nan i̱ hemban er ma nan nenge la ga.” (Mbaromanu 12:3) De gbe tôôn tsô wer azende a ou aa nenge a foto wou kua akaa a lu eren la maa a doo ve kpishi ga.

  “Ior mbagen ka ve zer veren ufoto vev sha ahumbe. Aluer m vande ngun ijende you yô, m fa er u lu yô, saa hanma shie u tesen mo wer m nenge ga!”—Allison.