Bibilo tese ér Aôndo gba Diabolo ga. Kpa, yange gba or u nan va hingir Diabolo yô. Bibilo ôr kwagh u Aôndo kaa ér: “Tom Na ngu vough; gadia igbenda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi.” (Duteronomi 32:3-5) Kwagh ne na yô, se fatyô kuren ikyaa ser, Satan yange vande lun vough man jighjigh, inja na yô, lu môm ken mbatyomov mba Aôndo mba shaav.

 Yesu kaa ken Yohane 8:44 ér, Diabolo yange kera va “tile sha mimi ga,” u tesen je ér Satan yange vande lun orjighjigh.

 Nahan kpa, orityom shon u va hingir Satan ne yange lu a ian i tsuan kwagh u dedoo shin u bo, er mbatyomov mba shaav mbagenev nahan. Yange va hendan kwagh a Aôndo shi mgbeghan kwase man nom u hiihii la mba kohol un ken ihembeato la yô, a hingir Satan, inja na yô ér, “Orhendankwagh.”—Genese 3:1-5; Mpase 12:9.