Inyam i Nyian Bong i I Er Kwagh u I ken Mpase Ityough 17 la Ka Nyi?
Mlumun u Bibilo i ne yô
Inyam i nyian bong i i er kwagh u i ken Mpase ityough 17 la, tile sha ityogh ki mzough u awashima na i lu u van a ityar i sha tar cii ken mzough shi hemen i yô. Sha hiihii la, i yilan mzough ne ér League of Nations, kpa hegen mba yer un ér United Nations (Mzough u Ityar Cii).
Er u fa inyam i nyian bong la yô
Ka gomoti. Inyam i nyian bong ne ngi a “ityouv itiankarihiar.” I kaa ér ityouv itiankarihiar la tile sha ityough ki “iwo itiankarihiar” man “utor utaankaruhar” shin ugomoti. (Mpase 17:9, 10) Ajiir agen ken Bibilo ka a ôr kwagh a ter ishember i uwo shin inyam yô, i ôron i lu kwagh u gomoti.—Yeremia 51:24, 25; Daniel 2:44, 45; 7:17, 23.
Ka gomoti u a lu inja er ngu hemen tar cii yô. Inyam i nyian bong ne bee inyam i lun ityouv itiankarihiar i ken Mpase ityough 13,i i til sha ityough ki gomoti u tar cii la. Inyam i ihiar ne cii ngi a ityouv itiankarihiar man akor pue, shi i cii ngi a ati a uityuhwan. (Mpase 13:1; 17:3) Inyam ne bee ayol a i kpishi nahan ka gbilin ga. Inyam i nyian bong ne i eren kwagh vough er ka gomoti u tar cii nahan.—Mpase 13:15.
Ka gomoti u ator a tar ne a ver yô. Inyam i nyian bong ne “ngi ken” ugomoti mbagenev. Inja na yô, inyam ne wa amishe ken ugomoti mba tar ne.—Mpase 17:11, 17.
Inyam ne ya ikyar vea ukwaghaôndo mba aiegh kangenaa. Zegebabilon, u a lu ukwaghaôndo mba aiegh mba ve lu sha tar cii la tema sha inyam i nyian bong ne, nahan tese je ér ka iniongo i kwaghaôndo i kôôm shin i tesen inyam shon kwagh u ia er ye.—Mpase 17:3-5.
Inyam ne i ne Aôndo icivir ga. Inyam ne ngi “a ati a uityuhwan iyol wue wue.”—Mpase 17:3.
Inyam ne yange i va kera lu ga hen anshighe kpuaa. Inyam i nyian bong ne yange i yem shin “ihungwa i i ze kweng” yô, * inja na yô, yange i va kera lu ga, shighe wa karen, kpa shi i va hide.—Mpase 17:8.
Mkur u kwaghôron u profeti ne
Nenge ase er League of Nations, man mzough u a va kar a til sha ityough nagh, i yer ér United Nations la ve kur kwaghôron u profeti u sha kwagh u inyam i nyian bong la yô.
Ka gomoti. United Nations sue ugomoti mba tar ne sha u nengen ér “hanma tar u u lu ken a na cii ngu sha ikyev i ma tar ugen ga, kpa ngu a gomoti u u, shi ngu sha tseeneke u u.” *
Ka gomoti u a lu inja er ngu hemen tar cii yô. Ken inyom i 2011 la, tar ugen seer sha ityar i i lu ken mzough u United Nations la, nahan kohol cii hingir ityar 193. Sha nahan yô, mzough ne kaan ér un tile sha ityough ki ityar i hemban ngeen kua ior mba hemban iyenge sha tar.
Ka gomoti u ator a tar ne a ver yô. Ka ityar i i lu ken United Nations la i ver un ye, shi mzough ne eren kwagh er ityar shon i ne un tahav i kighir la.
Inyam ne ya ikyar vea ukwaghaôndo mba aiegh kangenaa. Ukwaghaôndo mba tar ne yange ve gba uwer u suen League of Nations ga, shi hegen kpa mba suen United Nations kpoghuloo. *
Inyam ne i ne Aôndo icivir ga. Yange i ver mzough u United Nations la “ér bem a za hemen u lun hen atô u ityar i sha tar cii, shi i lu ken mkpeyol kpaa.” * Shin er i lu inja er awashima ve ne ka u injaa nahan kpa, jighilii yô, mzough u United Nations ne ngu lahan Aôndo, sha ci u a kaa ér una er kwagh u Aôndo a kaa ér ka Tartor na tseegh ua va er la.—Pasalmi 46:9; Daniel 2:44.
Inyam ne yange i va kera lu ga hen anshighe kpuaa. Yange i ver mzough u League of Nations shighe u Ityav mbi Tar Cii mbi Hiihii mbira bee ica lu a gba ga la. Ityôkyaa yô, lu sha u bem a lu hen atô u ityar cii. Kpa mzough ne fatyô u yangen ayôôso a hen atô u ityar kposo kposo ga. Nahan mzough ne va kpe shighe u i hii u nôngon Ityav mbi Tar Cii mbi sha Uhar, ken inyom i 1939 la. Yange ityav mbin va bee ken inyom i 1945 la. Ken inyom la je maa i ver mzough u United Nations. Awashima u mzough ne kua gbenda u a eren kwagh la zua sha mzough u League of Nations la vough.
^ Ikyum. 7 Takerada ugen (Vine’s Expository Dictionary of Old and New Testament Words) kaa ér ishember i ken zwa Grika i i gem ér “ihungwa i i ze kweng la” ngi ôron kwagh u “ihyungwa i i ze je i fe kighir ga yô.” Bibilo i King James Version la gema ishember ne ér “ihyungwa i i ze a ikighir shio yô.” Ka a ter ishember ne ken Bibilo yô, i ôron kwagh u ijiir shin mlu u or eren kwagh môm ga shi lun er i wuhe nan nahan.
^ Ikyum. 9 Nenge Tindi u sha 2 (Article 2) ken Takerada u Atindigh u Mzough u Ityar Cii (Charter of the United Nations) la.
^ Ikyum. 12 U tesen ikyav yô, ken inyom i 1918 la, mzough u mbahemenev mba ucôôci mba Mbaprotestanti mba ken tar u Amerika kpishi kaa wang ér League of Nations una lu “gomoti u tartor u Aôndo shin tar.” Ken inyom i 1965 la di, mbahemenev mba kwaghaôndo u Mbabuda, man Mbakatoliko, man Mbahindu, man Mbayuda, man Mbaprotestanti, man Mbamusulumi kua mba Côôci i Orthodox za kohol imôngo hen geri u San Francisco, ve er msen sha ci u United Nations. Shi ken inyom i 1979 la, pop u i yilan un ér John Paul u sha Uhar la, kaa ér un na jighjigh ér United Nations “una za hemen u lun mzough u hemban cii, u keren ér tar u lu ken bem shi i ôron ajir sha mimi.”
^ Ikyum. 13 Nenge Tindi u sha 1 (Article 1) Takerada u Atindigh u Mzough u Ityar Cii (Charter of the United Nations) la.
Kwagh Ugen u Alaghga Shi Una Doo U Yô
IYOUKURA
Tar Ne Ua Fatyô u Lun sha Ikyev I Gomoti Môm Je Kpa?
Hen er gomoti u una hemen tar cii la una va a bem man mkpeyol yô. Aôndo tôndo zwa ér una ver imba gomoti la. Ka an nana hemen gomoti la a mshi shio?
