Bibilo pase akaa a aa er, man mbamlu mba ior vea nyôr ker ve a tese ér “mkurtar,” shin “mkur u tar [u hegen] ne” zurum yô. (Mateu 24:3; New World Translation of the Holy Scriptures) Bibilo yila shighe ne ér “ayange a masejime,” man “shighe u mkur,” shin “ashighe a mkur.” (2 Timoteu 3:1; Daniel 8:19; Easy-to-Read Version) Ka akaaôron a profeti agen a sha kwagh u ayange masejime, shin ashighe a mkur, a a lu kuren sha mi nyian sha gbenda u vesen je i nger shin heen ne:

•   Ityav mbia samber sha tar wuee.—Mateu 24:7; Mpase 6:4.

•   Ijen.—Mateu 24:7; Mpase 6:5, 6.

•   Ityartenger i vesen.—Luka 21:11.

•   Ubombauangev, shin “iangev mbi bov” mbi tsaren.—Luka 21:11, Contemporary English Version.

•   Ifer ia seer.—Mateu 24:12.

•   Uumace mba vihin tar.—Mateu 24:12.

•   Aeren a ior aa hemba vihin gban kera. A lu u nenge yô, mbagenev kpishi ka “mbalun a ishughun ga man mbalun wang ga, . . . man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve ikyo ga man mbamoron ayol a ve.”—2 Timoteu 3:1-4.

•   Icombor i ior ve ‘lu a dooshima her ga’ shi mbayev ve lu “mbahemban mbamaren ve ato” la ngi vihin.—2 Timoteu 3:2, 3.

•   Ior kpishi Aôndo una kera doo ve ishima ga.—Mateu 24:12.

•   Ior vea nenge er ukwaghaôndo ve kaan ér ve mba civir Aôndo, kpa ve eren ishima na ga yô.—2 Timoteu 3:5.

•   A seer zuan a mkav sha akaaôron a profeti a ken Bibilo, kua a yange i ôr sha kwagh u ayange a masejime la kpaa.—Daniel 12:4.

•   A lu pasen loho u dedoo u Tartor sha tar cii.—Mateu 24:14.

•   Ior kpishi vea wa ikyo sha akaa a tesen ikyav i mkur la ga shi vea lu nahan ior tar kpaa.—Mateu 24:37-39; 2 Peteru 3:3, 4.

•   Akaaôron a profeti ne cii aa lu kuren sha mi hen shighe môm, a lu agen ker kpuaa shin kpishi tsô ga.—Mateu 24:33.

Se Mba ken ‘Ayange a Masejime’?

 Een. Mlu u tar ne kua akaa a i nger ken Bibilo sha adondo adondo la tese ér ayange a masejime ne yange hii ken inyom i 1914. Hen shighe la, Tartor u Aôndo hii u hemen sha, nahan kwagh u Tartor shon hii eren yô, u daa Satan Diabolo man azôv a na u gbihi ve shin tar, sha ci u ian kera lu sha ci ve sha ga. (Mpase 12:7-12) Gbenda u Satan a va ne uumace ve lu a mbamhen mba bov man aeren a bo kpishi nyian la na yô, se nenge er ayange ne a lu ayange a masejime, a a ve a “ashighe a ican” yô.—2 Timoteu 3:1.