Ior mba tôvon sha kwagh u annyamev fa tahav mbu ankwagh u shin mnger u i yer ér Barnacle la a lu a mi u varen sha kwagh gbang la ica i gba hegen. Ankwagh ne ka a var sha avande man sha ajiir a ka i maa kwagh sha kpetar zan zan i nyôr shin mnger la kua shin ikyum i tsoo.

 Nenge ase: Kwaghtôvon tese nahan ér barnacle u a vese a kom u ôôn uwe yô, ngu a nôngo a ningir a ajiir kposo kposo cii ve a mase tsuan ijiir i hembe doon i una za var a lu her yô. Ka una zuan a ijir i a soo la je maa a haa zar kwagh her. Zar ne ka u lu atô kposo kposo ahar. Zar u hiihii la ka u lu mkurem mkurem nahan kpa u gema u tiher. Zar u tiher ne ka u na mngerem ma yevese hen ijiir shon kera. Zar ne shi ka u sôr ijiir sha er ankwagh ne una fatyô u haan zar u sha uhar la kpa ua kôr ave yô. Ka i yila zar u sha uhar la ér phosphoproteins.

 Zar kwagh u hiihii man u sha uhar la cii ka u kohol maa u hingir tsur u ka u var sha kwagh gbang er ka amenge a sha anyi nahan yô, je i lu u ankaam ma umav magen maa fatyô u bughun u kera ga. Ka i gba hange hange u tsur ne ua taver shi ua tsa gbem sha ci u barnacle ka una var hen ijiir yô, a lu her zan zan ken ayange a uma na cii.

 Gbenda u ankwagh u uma ne ka a er tsur na la taver u kaven je hemba er yange mbasainsi hen la. Môm ken mbatimen sha akaa u yange za kav gbenda u ankwagh ne ka a er tsur ne yô, kaa ér: “Kwagh ne ka gbenda u kpilighyol u sha gbaaôndo u zendan mngerem hen ijiir kera.” Alaghga kwagh u i zough a mi ne una wase mbatôvon sha akaa u eren tsur u a fatyô u varen kwagh u a lu shin mnger yô. Shi kwagh ne una wase u zuan a tsur u i dugh ken ma kwagh u uma shin imendenev gayô akaa agen yô, sha er a fatyô u eren tom a mi shighe u i lu varen ikyav mbi sha usu shin i lu eren twer u ka i tôô ilyeegh ki yolough ki gen wan or la.

 We u nenge nena? U nenge wer tsur u barnacle la yange u gba duen abu tsôô? Shin i gba a gbaa?