Luka 16:1-31
16 Tsô a kaa a mbahenen nav ér: “Ornyar ugen lu a or u nengen un sha ya, nahan i va kaa a na ér or shon ngu saan un akaa ishe.
2 Nahan a yila un a kaa ér, ‘Ka nyi m lu ungwan sha a we nee? Hide a akaa a m we u sha ikyev la cii, gadia u kera kuma u nengen sha ya ne ga.’
3 Tsô or u nengen sha ya la kaa ken ishima na ér, ‘Ngun nahan me er nena, er orvesen wam a lu dughun mo sha tom u nengen sha ya kera nee? Man m ngu a agee a kahan kwagh ga, shi kunya ngu kôrom mo u sônon kwagh.
4 Ngwa! M fa kwagh u me er ve a va dughum sha tom u nengen sha ya la kera kpa, ior vea ngohol mo hen uya vev yô.’
5 Tsô a gba yilan mba ve lu orvesen na a injô la môm môm; a pine u hiihii la ér, ‘U ngu orvesen wam a injô kuma nena?’
6 Ngula kaa a na ér, ‘Ka uikyaren* mba mkurem ma olev deri môm.’ A kaa a na ér, ‘Ngohol takeda u injô wou, tema hide nger 50 fese.’
7 Shi a pine ugen la ér, ‘We di u ngu a injô kuma nena?’ A kaa ér, ‘Ka uikyaren mba vesen* mba alakema deri môm.’ A kaa a na ér, ‘Ngohol takeda u injô wou, hide nger 80 fese.’
8 Tsô orvesen la wuese or u nengen sha ya na la, sha ci u a er kwagh sha kwaghfan,* shin er lu a mimi iyol ga nahan kpaa. Gadia ior i* tar ne* hemba fan u eren kwagh a ior sha ashe a bughun ken kov ve ne, a ior mba ve lu ken iwanger la.*
9 “Shi me kaa ne: Kôr nen azende sha inyaregh ki ki lu kwagh u perapera ga ne, sha er zum u kia kera lu ga kpa, vea ngohol ne ken ajiir a teman a lun gbem sha won yô.
10 Or u nan eren kwagh u kiriki sha mimi yô, kwagh u vesen kpa nan eren sha mimi, shi or u nan eren kwagh u kiriki sha mimi ga yô, kwagh u vesen kpa nan eren sha mimi ga.
11 Sha nahan yô, aluer inyaregh ki ki lu kwagh u perapera ga ne kpa ne tese mimi sha kwagh u ki ga yô, ka an nana wa ne kwagh u a lu u mimi la sha ikyeve?
12 Man aluer ne tese mimi sha kwagh u orgen ga yô, ka an nana na ne kwagh u a lu sha ci wen laa?
13 Ortom môm nana fatyô u lun kpan u mbavesen uhar ga; sha ci u nana kôr u môm ihyom, ugen la di una doo nan ishima, gayô nana var a u môm, nana gema a laha ugen la. Ne fatyô u lun ikpan i Aôndo kua Inyaregh ga.”
14 Tsô Mbafarishi mba inyaregh doo ve ishima la mba ongo akaa ne cii yô, ve gba miin zwa, nahan un tar.
15 Nahan a kaa a ve ér: “Ka ne mba ne tesen perapera wen sha ishigh ki iorough je ne, kpa Aôndo fa asema a en. Sha ci u kwagh u a gbe ior kwagh la, gema ka kwagh u ndôhôr Aôndo ishima.
16 “Atindi man Uprofeti lu zan zan va ar sha Yohane. Man hii shighe la je, mba yôôn loho u dedoo u Tartor u Aôndo, shi ior anza kposo kposo mba keren u sha gbashima.
17 Mimi je, hemba kan zange u sha man tar ve̱ kar kera, a u anikyav môm u sha ma ishangebaacaa ken Atindi a̱ kure sha mi ga tsô a̱ kough kera la.
18 “Hanma or u nana pav ivaa a kwase u nan, nana za er ugen yô, nan er idya. Shi or u nan vese kwase u nom u nan a pav ivaa a nan yô, nan er idya.
19 “Ornyar ugen lu, u huan akondo a nyian dimiin man a pupuu a taver ishe, yaan tar shi eren uzegembaakaav ayange ayange yô.
20 Kpa icanor ugen gema lu, i yilan un ér Lasaru, lu a avav iyol kpulughuu. Hanma iyange yô i va ver un hen hundaya u ornyar la.
21 Yange i sar un u yan avur a kwaghyan a a lu osough sha tebul u ornyar shon haan shin inya la. Shi aniwaav je kpa ve va, ve va ndiar un avav.
22 Ken masejime yô, icanor ne va kpe, nahan mbatyomov yem a na za ver un hen ikyum i Aberaham.
“Ornyar la kpa va kpe, i ii un.
23 Er lu shin Uwar* lu yan ican la, a ta ashe a za nenge a Aberaham ken ica, Lasaru gema tema un hen ikyum.
24 Tsô a yila a kaa ér, ‘Terem Aberaham, zungwem mhôônom, tindi Lasaru a civ ihyôwe na shin mnger a va surum nombor, sha ci u m ngu yan ican ken usu u tseen vong.’
25 Kpa Aberaham kaa ér, ‘Wana, umbur er yange u lu a akaa a dedoo kpishi shighe u u lu uma la, kpa Lasaru gema zua a akaa a vihin yô. Hegen ne, mba surun un ishima heen, kpa we u gema u ngu yan ican.
26 Bee kera yô, zegejem ngu hen atô wase a ven, sha er mba heen mba ve soo u peren zan ken ven la ve̱ de fetyô ga, shi mba keela kpa ve̱ de peren vaan ken vese ga yô.’
27 Maa a kaa ér, ‘A̱ lu nahan yô, tere, tindi un hen ya u terem,
28 gadia m ngu a anmgbianev mba nomso utaan, nahan a̱ za pase ve hanma kwagh, sha er vea va hen ijiir i ican ne, er mo nahan ga yô.’
29 Kpa Aberaham gema kaa ér, ‘Mba a ityakeda i Mose man Uprofeti; ve dondo kwagh u i nger ker la.’
30 Tsô a kaa ér, ‘Ei, terem Aberaham, kpa aluer or nder shin ku nan za her a ve yô, vea gema ishima.’
31 Kpa a kaa a na ér, ‘Aluer ve er kwagh u Mose man Uprofeti ve nger la ga yô, or a nder shin ku nana za kpa vea kegh ato ga.’”
Ngeren mba shin kpe
^ Shin “uikyaren mba bati.” Ikyaren i bati i môm yange i kuma er ulita 22 (ugalon 5.81) nahan. Nenge Ngeren u Pasen Asember.
^ Shin “uikyaren mba koor.” Ikyaren i koor i môm yange i yuhwa i kuma er ukilogeram 170 nahan.
^ Shin “a er kwagh sha ashe a bughun; ngu tsev tsev.”
^ Zwa Grika, “ônov mba.”
^ Shin “ken kov ne.” Nenge Ngeren u Pasen Asember, “Kov.”
^ Zwa Grika, “ônov mba iwanger.”
^ Shin “Hade.” Nenge Ngeren u Pasen Asember.
