Mbakolose 3:1-25
3 Nahan kpa, aluer i nder ne a Kristu imôngo yô, za nen hemen u keren akaa a sha, ape Kristu a tem ken uwegh ku yanegh ku Aôndo la.
2 Ishima yen cii i lu sha akaa a sha, i̱ de lu sha akaa a shin tar ga.
3 Gadia ne kpe kera, uma wen hingir sha ikyev i Kristu ken mzough vea Aôndo.
4 Shighe u Kristu, u se lu uma sha a na la, una va due ken igbar la, ne kpa a na ne ande a na imôngo ken iengem na.
5 Nahan yô, wua nen alegh a iyolough a en a a lu shin tar la, sha kwagh u idya* man ieren i wang ga man isharen i yaven a or i ior ve kôron iyol tsaha sha mi ga la, man isharen i bo, man hua u eren, ka eev mbu civir je la.
6 Ka sha ci u akaa ne iyugh i Aôndo i lu van ye.
7 Ne kpa kape ngise ne eren uma wen* je la.
8 Kpa hegen yô, gba u ne dugh akaa ne cii ken a ven kera: dugh nen iyugh man ishimanyoon man kwagh u bo kua ityuhwanev man iliam i dang ken zwa wen kera.
9 De tsughun nen mô wen ga. Ér nen or* u tse kua aeren a na la kera,
10 gema haa nen or* u he iyol, u i lu geman un hingir hegh sha mfe u vough, sha u a̱ zua sha ibyeen i Un u yange gba un la.
11 Hen or u nan hee or u he iyol yô, Orgrika ngu kposo a Oryuda ga, shi icôngo ngi kposo a ipyusu ga, shi or u van a va nan ngu kposo a Orsitia* shin kpan shin or u nan lu ken kpan ga la ga; kpa Kristu ngu akaa cii, shi ngu ken akaa cii.
12 Er ne lu mba Aôndo a tsough ne, ne lu uicighanmbaiorov shi ne doo un ishima yô, haa nen mhôônom ma zungwen iyol, man erdoo man iyol hiden a mi ijime man ishima i legh legh kua ishimawan.
13 Waan nen ishima a mbagenev shi deen nen mbagenev kwaghbo sha mimi hanma shighe cii, aluer or er kwagh a orgen doo nan ga je kpaa. Er Yehova* a den ne kwaghbo sha mimi nahan, ne kpa gba u ne eren nahan vough.
14 Kpa kwagh u hemban cii yô, haa nen dooshima iyol, gadia ka kwagh u ka a zua ior ve lu kangenaa je la.
15 Shi bem u Kristu a ya tor ken* asema a en, gadia i yila ne ér ne lu ken bem shon ken iyol i môm. Shi tesen nen ner ne mba a ishughun.
16 Loho u Kristu u̱ tema ken a ven a hanma kwaghfan cii. Tesen nen shi taver nen hanmô wen ishima* sha upasalami, wuese nen Aôndo, waan nen atsam a civir Aôndo a ishughun,* waan nen Yehova* atsam ken asema a en hanma shighe cii.
17 Nyityôkwagh i ne lu eren cii, a̱ lu iliam shin ieren kpaa, eren nen hanma kwagh ken iti i Ter Yesu, sughun nen Aôndo Ter ken iti na.
18 Ne kasev, wa nen ayol a en sha ikyev i noov enev, gadia kape i doo u mbadondon Ter vea eren je la.
19 Ne noov, kasev enev ve doo ne ishima hanma shighe cii, shi de vihin nen ishima a* ve ga.
20 Ne ônov, ungwan nen imo i mbamaren enev ken hanma kwagh cii, gadia ieren la i doo Ter ishima tsung.
21 Ne uter, de ne nen ônov enev ishimavihin* ga, sha er vea yue* ga yô.
22 Ne mba ne lu ikpan yô, ungwan nen imo i uumace* mba ne lu sha ikyev ve la ken hanma kwagh cii, i̱ de lu sha ci u mba nengen kwagh u ne eren, yô ne nôngo i doo ior a ven* ga, kpa eren nen nahan a ishima yen i môm, sha u cian Yehova.*
23 Hanma kwagh u ne lu eren cii, eren nen un a uma wen cii, er ka sha ci u Yehova* nahan, i̱ de lu er ka sha ci u ior ga.
24 Gadia ne fa er i lu hen Yehova* ne va ngohol dyako u a lu injar yen la yô. Eren nen tom sha ci u Orvesen, Kristu.
25 Mimi je, ka or u nan er kwaghbo la, a tsaha nan sha kwaghbo u nan er la ye, msange ngu ga.
Ngeren mba shin kpe
^ Zwa Grika, porneia (ponia). Nenge Ngeren u Pasen Asember.
^ Shin “kape yange ne zenden.”
^ Shin “mlu.”
^ Shin “mlu.”
^ Ishemberti i “Orsitia” la ngi ôron kwagh u or u ken toho.
^ Nenge Ngeren u Pasen Asember.
^ Shin “a kura.”
^ Shin “kundu kundu.”
^ Nenge Ngeren u Pasen Asember.
^ Shin “waan nen hanmô wen kwagh.”
^ Shin “de tswamen nen.”
^ Shin “de bamen nen ônov enev.”
^ Shin “sha er iyol ia kpe ve.”
^ Shin “ior.”
^ Zwa Grika, “i̱ de lu sha ikpam-ashe, er ka mba keren u doon ityough a ior.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
