Sha iyange i Hiitom, Febewari 6, 2023 la, tar tenger ken tar u Turkey man Syria je cier iyol.

•   “Yange tartenger la wua iorov hemba 3,700 hen haregh u Turkey man ken vegher u Syria ugen la sha iyange i Hiitom, shi ior udubu imôngo vihi ayol gayô uya vev vihi shi er ndôhôr kpishi yô, lu ican kpishi u keren mba inya yôhôr kighir ve la.”—Ipipabaver i Reuters, Febewari 6, 2023.

 Ka sea ungwa akaa ne yô, ishima i vihi se kpishi. Shighe u imbakwagh ne i er yô, se fatyô u suur sha Yehova u a lu “Aôndo u lun a ishimasurun cii” la. (2 Mbakorinte 1:3) Ka a sur se ishima sha “ishimasurun i se zuan a mi ken Ruamabera la [sha er] ia na se lu a ishimaverenkeghen yô.”—Mbaroma 15:4.

 Ka akaa a se fatyô u henen ken Bibilo je ne:

•   Kwagh u yange i tsenga ôron sha kwagh u ityartenger la.

•   Ape se fatyô u zuan a ishimasurun man ishimaverenkeghen yô.

•   Er Aôndo una va bee a ican i ior ve lu yan ne cii kera yô.

 Wea soo u fan kwagh u Bibilo i ôr sha atineakaa ne yô, ôr ngeren mban:

•   “Ityartenger i Vesen—Bibilo Yange i Tsenga Ôron Ér Nyi?”

•   “Ka Han Me Zua a Ishimaverenkeghene?”

•   “Ica a Gba Ga Tsô Aôndo Una Bee a Ican i Ior Ve Lu Yan Ne Cii”