TINDI u Mose la tese ér ashighe agen yange i doo u bumun. Nahan kpa, ior mba sha ayange a Yesu la bumun ayange ayange, nahan hanma kwagh u vea ôr cii ve bum, sha er kwagh u ve ôr la, a lu a tahav yô. Yange ve er kwagh ne sha u ior ve na jighjigh a kwagh u ve lu ôron la yô. Nahan kpa, Yesu venda ieren ne kuma acin ahar je. Kpa a gema a kaa ér: “‘Een’ wen a̱ lu ‘een’ heregh, man ‘ei’ wen kpaa, a̱ lu ‘ei’ heregh.”—Mat. 5:33-37; 23:16-22.

Sha kwagh u takerada ugen u kaa yô, se fatyô u nengen a ikyav i i tese wang ér “Mbayuda soo kwagh u bumun sha u ior ve na jighjigh a kwagh u ve er la” ken takerada u pasen atindi a ve u i yer ér Talmud la, u u pase vighe vighe igbenda i i lumun ér ve bumun man i i lumun ér ve bumun ga yô.

Yange lu Yesu tseegh venda ieren ne ga. Ikyav i tesen yô, Oryuda ugen u timen sha akaa a mbayiase u i yer un ér Flavius Josephus la, yange ôr kwagh u nongoior u Mbayuda ugen kaa ér: “Ka ve palegh ieren i bumun la, je yô, ve nenge i ér i hemba vihin a aie, sha ci u ve kaa ér, aluer ka u or a bum hen Aôndo cii ve a na nan jighjigh yô, nan ngu oraie je.” Takerada u Mbayuda u i yer u ér Wisdom of Sirach la kpa kaa ér: “Or u nan soo kwagh u bumun yum yô, nan ngu or u peren atindi je gande.” Sha nahan yô, Yesu venda ieren i bumun dang dang la. Aluer se mba ior mba ôron kwagh sha mimi hanma shighe cii yô, a gba u se bum cii ve ior vea na jighjigh a kwagh u se lu ôron la ga.