YEHOVA yange lumun ér Mbaiserael ve naan un iniav sha mbaatii man utulembamkunguv sha ikyev i tindi u Mose la. Hanma shighe yange a ôron atindi a sha kwagh u nagh ku nan yô, i ter inyon i ihiar ne imôngo. Yange or a lu a atii ga yô, nan na nagh sha ikyungugh. (Lev. 1:14; 12:8; 14:30) Kwagh ne yange wase Mbaiserael sha ci u nyi? Ityôkyaa i môm yô, shighe ugen yange i lu ve ican kpishi u zuan a atii. Sha ci u nyi?

Er mbaatii ve lu annyonov mba yemen za lun sha ajiir agen sha ashighe kposo kposo yô, ka sha shighe u iceenyolough tseegh ka ve hide ve va lu ken tar u Iserael ye. Kpa ka a va luun ken uwer u Oktoba yô, ve mough ve yem ken ityar i i lu vegher u ken imbusutariyan, i mtsee a hembe lun ker la. (Icam 2:11, 12; Yer. 8:7) Nahan ken tar u Iserael u tsuaa la, yange a lu sha shighe u wuhee yô, i taver Mbaiserael kpishi u nan nagh sha mbaatii.

Kpa mkungum yô, ma yemen ma za lun sha ajiir agen ga, nahan yange Mbaiserael ve fatyô u zuan a mi hanma shighe cii. Heela tseegh ga, yange or nan lu a mkungum hen ya u nan kpaa. (Nenge Yohane 2:14, 16) Takeda ugen (Bible Plants and Animals) kaa ér, “Hanma angar hen tiôntar u tar u Iserael kpa u lu her la cii, yange lu a mkungum. Hanma orya hen tiôntar la yange nan er mkungum ijiir i tsan hen ya u nan.—Nenge Yesaia 60:8.

Er Yehova lumun ér Mbaiserael ve naan iniav sha mbaatii ku mkungum ma yange ma banen ken tar u Iserael ma shighe môm ga la yô, lu tesen er ior ve doo un ishima shi un sendegh sha kwagh ga yô.