TÔÔ ASE WER u ngu yemen hen gbenda tugh, ime wa mgbigh mgbigh. Er iyange i mir ica i gbe nahan kpa, ishima ta u kwe ga, sha ci u u ngu a tôôci u a wanger usu kpishi yô. Ka wea tsar sha hemen wou yô, u nenge a kwagh u a lu ikyua ikyua sha ishigh you la wang. Shi ka wea tsar ken hemen wou ica yô, usu na la u wanger i yem ken hemen ica hiinii.

Sha igbenda igen yô, Bibilo ngi er tôôci la nahan. Er se vande nengen ken ngeren mba ken ijime la nahan, Mkaanem ma Aôndo ma a wase u u nôngon a kwagh u a lu u sha ishi ikyua ikyua la, inja na yô, ka mbamzeyol mba u tagher a mi ayange ayange ken tar u bo ne je la. Kpa Bibilo ka i er kwagh i hemba heela ica je. Shi ka i ta se iwanger se nenge a kwagh u ken hemen la, inja na yô, ka i wase se se nenge a gbenda u zan ken msaanyol man mkom u tsôron la, nahan se dondo u. (Pasalmi 119:105) Nena yô?

De se nenge igbenda ihiar i Bibilo ka i na se ishimaverenkeghen i injaa sha kwagh u ken hemen yô: 1 Ka i na uma wase a lu a inja, man 2 ka i tese se u yan ikyar i tsôron vea Un u a gbe se la.

Bibilo ngi a kwaghwan u injaa u una wase se u nôngon a mbamzeyol asev yô, kpa i ôr kwagh hemba takerada u ka u wase or sha mbamzeyol mba nan la ken inya ica je. U Bibilo ma i taver se ishima ér se hemba veren ishima sha mbamzeyol asev la yô, i er nahan ga, kpa i gema i tese se ér se waan mbagenev kpa ikyo. Ka nahan ve uma wase una lu a inja ye.

Ikyav i tesen yô, nenge ase kwaghwan u Bibilo ne, ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) U umbur ma shighe u yange u wase or a ma kwagh u iyolough yôô? Alaghga tsô yange u kegh ato a ma ijende you shighe u nan lu pasen we er lu nan ken ishima yô. Yange u nenge wer u zua a mkom, sha ci u u na saan or la iyol ga zee?

Ka i saan se iyol kpishi shighe u se ne or kwagh a u veren ashe ser nana hide a na se ma kwagh ga yô.  Orngeren ityakerada ugen kaa ér: “Ka i taver kpishi u or a na orgen kwagh ve nana kera zua a mi i hemba kwagh u nan ne la ga yô, aluer nan na shi nan hide nan ngu veren ashe ér nana zua a ma injar shami ga yô.” Kpa, shighe u se ne mbagenev kwagh, hemban je yô, mba ve lu a gbenda u ve kpa nan se kwagh la ga yô, se zua a injar. Ka se hingir u lun imôngo vea mbagenev. Sha kpôô yô, se mba eren tom vea Un u a gbe akaa la, u a nengen akaa a dedoo a se eren a mbagenev la, inja er ka un se pwar un kwagh la. (Anzaakaa 19:17) Kwagh u se eren a mbaibanave la gba un kwagh tsung, nahan a tôndo zwa ér una kimbi se, sha u nan se uma u tsôron ken paradiso shin tar. Sha mimi yô, kwagh ne ka ishimaverenkeghen i ken hemen i doon tsung je!—Pasalmi 37:29; Luka 14:12-14. *

Kwagh u hemban cii yô, Bibilo tese se ér se fatyô u zuan a uma u injaa sha u civir Yehova, Aôndo u mimi la. Mkaanem nam taver se ishima ér, se ungwan imo na shi se wuese un shi se naan un icivir i i lu i na yô. (Orpasenkwagh 12:13; Mpase 4:11) Aluer se er nahan yô, se er kwagh u vesen u se gbidye kwar sha mi yô: Se er kwagh u una bende a Un u a gbe se la sha gbenda u dedoo yô. Jighilii yô, a taver se ishima ér: “Lu orfankwagh, na i saan mo iyol.” (Anzaakaa 27:11) Hen ase sha kwagh ne. Zum u se tsough akaa a se er la sha kwaghfan, er akaawan a Bibilo a tese la yô, ka se va Ter wase u sha, u se doo un ishima la a msaanyol. Sha ci u nyi? Sha ci u a wa se ikyo shi a soo ér se zua a mtsera sha u dondon gbenda tesen na la. (Yesaia 48:17, 18) Sha mimi yô, ka nyi je se er ve ia hemba u civir Tor u Hembancii la shi eren akaa sha gbenda u una zua a msaanyol sha wono?

Shi Bibilo tese se ér se kôr ijende vea Un u a gbe se la. Ruamabera kaa ér: “Kporom nen hen Aôndo, Un kpaa, Una kporom her a ven.” (Yakobu 4:8) Ashighe agen alaghga se lu henen ken ishima ser, mimi je or a fatyô u kôron ijende vea Orgban wase u hemban sha la kpa? Kpa Bibilo na se vangertiôr ér, aluer se “ker Aôndo” yô, se “zua a Na” sha ci u ngu “ica a hanmô wase ga.” (Aerenakaa 17:27) Kwaghwan u Bibilo u a kaa ér se hingir ijende i Aôndo la ngu a inja tsung, sha ci u mlu wase u ken hemen la. Sha nyi gbenda?

Hen ase sha kwagh ne: Aluer se nôngo kwagh nan nan kpa, mô wase môm nana fatyô u waren orihyom wase u hemban cii, u i yer un ér ku la sha tseeneke u nan ga. (1 Mbakorinte 15:26) Kpa Aôndo yô, ka u tsôron. Mayange je una kpe ga, shi a soo ér azende a na kpa a lu uma gbem shawon. Bibilo i er tom a asember a a taver u kaven ga, kpa a gem a doo tsung yô, sha u pasen kwagh u Yehova a soo sha ci u mba ve keren un la, ér: “Asema a en a̱ lu uma gbem.”—Pasalmi 22:26.

U er nan ve u fatyô u yan ikyar i tsôron la vea Aôndo? Za hemen u henen kwagh na ken Bibilo, i i lu Mkaanem nam la. (Yohane 17:3; 2 Timoteu 3:16) Pine un a na u iwasen sha er u kav Ruamabera yô. Bibilo na se vangertiôr ér, aluer se za hemen u ‘sônon Aôndo’ kwaghfan sha mimi yô, una na se un wuee je. * (Yakobu 1:5) Kwagh u masen yô, nôngo kpoghuloo dondon kwagh u u henen la, sha u den Mkaanem ma Aôndo ma lu u inja er ka “imenger i angahar” a ou man er “iwanger i gbenda” wou nahan, hegen man zan zan gbem shawon.—Pasalmi 119:105.