Aluer u soo u zan hen ijiir i i lu je u lu a vande zan her ga nahan, u er nena?

1. 1. Hanma gbenda u u nenge u doo u cii u gba zan sha u tsô.

2. 2. U gba dondon mbagenev ijime tsô, sha ci u u tôô wer ve fa gbenda tsembelee.

3. 3. U nenge takeda u tesen gbenda, gayô u pine ma ijende you i u fe dedoo wer nan fa gbenda la tsembelee yô.

Aluer se er kwagh u hiihii shin u sha uhar la yô, alaghga ijiir i se za nyôr her la, a lu ijiir i se soo u zan la ga. Kpa aluer se er kwagh u sha utar la yô, se lu a vangertiôr ser, se za nyôr hen ijiir i se lu zan la.

Uma wase ne ngu er ka zende u se soo u zan nahan, man ka zende u se ver ishima ser, se za u zan zan se za nyôr ijiir i se zua a msaanyol yô. Aluer se mba keren iwasen sha akaa a se tsuan u eren ken uma wase la ape iwasen i injaa i lu la yô, se za zan zan se za nyôr hen ijiir i se zua a msaanyol la, kpa aluer se er nahan ga yô, se kanshio.

Shin er ashighe kpishi akaa a se tsough u eren ken uma la ka a lu a kiriki nahan kpa, agen ka a lu a vesen a a fatyô u benden a uma wase sha gbenda u vesen yô. Man gbenda u se tsough u eren kwagh la, ka u tese kwagh u se ne jighjigh a mi ser ka kwagh u shami, shin ka u shami ga la. Akaa a se tsuan u eren la ka a bende a vese kua ior asev sha shighe gôgônan, ashighe agen yô ka i lu sha gbenda u dedoo shin u bo je kpaa. Akaa shon agen yô ka a je ne:

• U yaven a or man ivese

• U eren kwagh a ior sha mimi man tom kua inyaregh

• Gbenda u yesen mbayev

• Gbenda u eren kwagh a ior

U er nan ve u fa wer gbenda u u eren kwagh sha akaa a i ter heen ne, ua na a saan we kua tsombor wou iyol ken hemene?

Nahan ka mpin u i doo u hanma or nana pine iyol i nan je ne: Ka nyi ia wasem ve me tsua u eren kwagh u a lu u shami, kpa me gema me palegh u a lu u shami ga laa?

Takeda ne pase er i hii ve se fatyô u nan jighjigh ser Bibilo ia fatyô u tesen se akaa a a lu a shami man a a lu a shami ga la yô.