SHA iyange i Disemba 26, 2004 la, tar tenger hen icile i Simeulue je ayôôso huan. Mba yange ve lu shin kpemnger cii haa ashe lu kenger kwagh u una za hemen shin ityeku yô. Agôndoamnger hide lu yemen ken atô u ityeku sha utaha. Tsô ior hembe ayem gba yevese yemen sha agungu, ve lu ngoron kaan ér “Smong! Smong!,” er ior mba hen ijiir la ve yer mngerem ma saren avenge shin tsunami ken zwa ve la. Ka tamber er miniti 30 nahan yô, nenge, ityeku za pase mngerem hide kwa môm sha utaha va ta sha uya man ajiir kpishi a hen kpe ityeku la cii, kuwa a mi kera.

Icile i Simeulue ne ngi geri u Sumatra ken imbusutarimese, ken tar u Indonesia. Ka ijiir ne yange i hii vihin shighe u mngerem sar avenge la ye. Nahan kpa, ken atô u iorov 78,000 mba hen icile ne cii, lu iorov 7 tseegh saa ku ye. Er nan ve lu iorov kpuaa tseegh saa ku? * Ior mba hen icile ne ka ve kaa ér: ‘Aluer tar tenger shi u nenge mngerem ma shin ityeku ma hiden yemen ken atô u ityeku yô, yevese yem sha uwo, sha ci u ka ma ngôôr ga je maa ma hide sha utaha ma va sar avenge.’ Kwagh ne yange vande eren ior mba hen Icile i Simeulue, nahan ka vea nenge mngerem ma a hiin u gbuusu shin ityeku nahan yô, ve fa je ér ityeku sôôn saren avenge. Er yange ve wa ikyo yô, ve war uuma vev.

Bibilo ôr kwagh u mtim ugen u a sôôn van yô, ka “zegecan . . . , imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.” (Mateu 24:21) Kpa ka akaa a uumace ve eren ve a lu vihin tar u se tem sha u ne la, aa va a mtim ne ga, shin ka mngerem ma saren avenge shin usu ua va a mtim shon kpaa ga, sha ci u Aôndo wa ishima ér tar u se tem sha u ne u za hemen u lun gbem sha won. (Orpasenkwagh 1:⁠4) Kpa ka Aôndo iyol na una va a zegecan la sha u una “tim mba ve lu vihin tar la” ye. Nahan mkur u se lu ôron kwagh na ne, ka mkur u iferkwagh man ican i yan. (Mpase 11:18; Anzaakaa 2:22) Kwagh la una doo je a gande!

Heela tseegh ga, mtim u a lu van la una wua mbaperapera er mngerem ma saren avenge shin ityartenger shin iwo i bughur ka i er nahan la ga. Bibilo kaa ér “Aôndo ka dooshima,” shi Aôndo, u iti na i lu Yehova la tôndo zwa ér “Mbaperapera vea ya dyako u tar, vea lu ken u gbem.” (1 Yohane 4:8; Pasalmi 37:29) Nahan kpa, u er nan ve u war zegecan la shi u zua a averen a i tende zwa sha mi nee? Kwagh u vesen u u er yô ka un ne: Wa icintan la ikyo!

Se fatyô u fan iyange i iferkwagh man ican i yan ia bee la jighilii ga, sha ci u Yesu yange kaa ér: “Kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” Nahan kpa, Yesu wa se kwagh kaa ér “kuran nen.” (Mateu 24:36; 25:13) Sha ci u nyi? Bibilo pase se akaa a aa er sha tar cii man Aôndo una va a mkur yô. Er yange agôndoamnger hii u gbuusu shin ityeku ve ior mba hen  icile i Simeulue kav er ityeku a sôôn saren avenge nahan, kape mgbuusu u tar u lu gbuusu hegen la kpa a wase se u fan ser mkurtar zurum je la. Ngeren u kiriki u a baa sha ngeren ne la ter akaa a cieryol agen a Bibilo i kaa ér aa er yô.

Ka mimi, akaa a i ter ken ngeren shon la agen yange vande eren sha ayange a ken ijime la môm môm, sha ashighe kposo kposo. Kpa Yesu yange kaa ér zum u se nenge “akaa ne” cii aa lu eren hen shighe môm yô, se̱ fa ser mkurtar ngu ikyua ikyua. (Mateu 24:33) Pine ase iyol you wer, ‘Er i gbe tar je, ka hanma shighe nahan akaa a Bibilo i kaa ér aa er ne a lu eren (1) sha tar cii, (2) hen shighe môm, (3) shi seer a seere?’ Ikyav tese wang ér ka shighe u se lu ker ne.

Pesiden u tar u Amerika ugen yange kaa ér, “ukômputa mba i we sha ajiir sha u ve wase u tan ior icin . . . la mba waren uuma mba iorov.” Mngerem yange ma sar avenge ken inyom i 2004, shighe la karen kera yô, i za wa kômputa hen ijiir la sha u a wase u tan ior icin, sha er imba kwagh la ia va er ken hemen kpa, ior vea kera kpe kpishi nahan ga yô. Kape Aôndo kpa a ker gbenda ér i ta ior icin cii man mkurtar una va je la. Bibilo tsengaôron ér: ‘Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.’​—⁠Mateu 24:⁠14.

Ken inyom i i bee la tseegh, Mbashiada mba Yehova pase loho u dedoo ahwa biliôn môm man miliôn deri utaankarunyiin ken ityar 240, ken ijô i hemban 700. Afaerenga tsô ka er mkur a zurum kpishi la ve, i pase loho u dedoo ne nyian yum nahan ye. Er ior ve doo Mbashiada mba Yehova ishima yô, ka ve er hanma kwagh u ve fetyô cii, sha er vea ta ve icin sha kwagh u iyange i ijirigh i Aôndo i i sôôn van la yô. (Mateu 22:39) Er we kpa i lu u u fatyô u zuan a mtsera ken loho ne yô, kwagh la tese ér u doo Yehova ishima. Umbur wer, “sar [Aôndo] u mbagenev ve̱ tim ga, kpa ior cii ve̱ gema asema.”  (2 Peteru 3:⁠9) U er kwagh sha dooshima u Aôndo a tese u ne sha u wan icintan na ikyo kpa?

Umbur wer ior mba hen icile i Simeulue mba ve tem ya hen kpe ityeku la yange ve nenge agôndoamnger nga ngur hiden yemen ken atô u ityeku sha utaha yô, fese je maa ve yevese ve yem sha iwo sha er vea war yô; ve timbir ér ma hide ma kohol ve ga. Er ve er kwagh sha ikyaa ne fese yô, ve war ku. Aluer u soo u waren ican i i lu van la yô, a gba u u yevese u yem sha uwo. Inja na yô, a gba u u er kwagh u una wase u u waren yô, er shighe a lu a kar ga ne. U er nena? Jijingi u Aôndo yange mgbegha profeti Yesaia nger loho u kpoghor ior asema, u i lu samber a mi “sha ayange a masetyô” a se lu ker hegen ne yô. Loho la kaa ér: “Va sé kôndo nen sha uwo u TER . . . , A̱ tese se igbenda Na, se kpaa sé zende sha igbenda Na.”​—⁠Yesaia 2:​2, 3.

Ka wea unde sha uwo yô, u nenge i yem ica shi u fa ijiir i u za ve kwagh a er u ga yô. Kape nyian ne kpa ior umiliôn imôngo sha tar mba ve fe igbenda i Aôndo i i pase ken Bibilo la, ve lu geman uuma vev sha gbenda u wasen ve je la. (2 Timoteu 3:​16, 17) Kwagh u ve lu eren ne na yô, ve hii u ‘zenden sha igbenda i Aôndo,’ nahan doo un a ve shi ngu kuran ve kpaa.

U ungwa loho la shi u lumun wer Aôndo a kura u sha dooshima na la ken ayange a ican ne kpa? Se mba taver we ishima ser time sha akav a ken Ruamabera, a i tese ken ngeren u kiriki u a baa sha ngeren ne la tsembelee. Ngeren la ter akaa a a lu tesen ér se mba ken a “ayange a masejime” yô. A doo Mbashiada mba Yehova mba hen ijiir you u wasen we sha hanma gbenda u i gbe u a wase u ve u zua a mfe u ken Ruamabera la, man er u er tom a mi kpaa yô. Shin u fatyô u zuan a mbamlumun sha mbampin ou hen ijiir yase i sha Intanet i www.mr1310.com/⁠⁠tiv la. Nenge ape i nger ér ATESEN A BIBILO > MBAMPIN MBA BIBILO I NE MLUMUN SHA MI LA.