Luun er iyange ngi ga yô, kwagh u uma môm ma a lu sha tar ga. Iyange ka i ta iwanger sha er ikyon ia wa ahu, shi ia kpar, shi ia ume atam, shi ia wa ake man isham yô. Shi iyange ka i wase amise a ikyon a zua a mngerem shin inya, ma kondo zan zan ma nyôr sha ahu, shi ma due sha ahumbe.

Ura ka iyua i doon tsung i Aôndo a ne se yô. Ka a na iyiav mbi mende sha tar, sha er se ya yô. Aôndo ka a nôô ura u sen sha, shi a na se iyiav sha ashighe a mbi, shi a na se kwaghyan kpishi, shi a iv asema a ase a msaanyol.

Uter kpishi ishima ka i nyian ve er vea er ve vea na icombor ve kwaghyan man akondo a kuma ve yô. Nenge kwagh u Ruamabera a kaa ne: “Nenge nen dedoo sha kwagh u inyon i purugh; ngi lôôn iyiav ga, shi ngi sundan shin ngi kohol iyiav ken ayou kpaa ga. Kpa Ter wen u sha la koson i. Ne hemba gban kwagh a i gaa?”—Mateu 6:25, 26.

“Hen nen kwagh sha gbenda u ufaluwa mba ken toho ve vesen la. . . . Kpa me kaa ne, [Tor] Solomon a iengem na cii je kpa, mayange i wuha un iyol er mô ve nahan ga. Aluer imendenev mbi ken toho mbi ka mbi lu uma nyian, kper i kende mbi ken usu la je kpa, Aôndo ngu wuhan mbi iyol nahan yô, hide ne ve una wuha ne iyol a hemba nahan ga yee?”—Mateu 6:28-30.

Er Aôndo a ne se kwaghyan man akondo yô, ka keng una fatyô u nan se akaa agen a kwagh a gbe se a mi ayange yange la kpaa. Aluer se mba keren u eren ishima i Aôndo yô, una ver iniôngon yase i kahan iyiav la doo doo, gayô una wase se se zua a tom sha er se fatyô u zuan a inyaregh ki kuren mbamgbe asev yô.—Mateu 6:32, 33.

Sha kpôô yô, ka sea time sha kwagh u iyange man ura man inyon i purugh man ufaluwa nahan, se zua a atôakyaa a injaa a Aôndo una doo se ishima yô. Ngeren u a dondo ne una tese er Aôndo u a gbe se la a lamen a uumace yô.