1. Er nan ve or u nahan igirgi ka nan dondo akaa a i nger shin inya la, nan yenge igirgir i nan iyol cii ve nan mase moughono?

HANMA shighe u i gbe u or u nahan igirgi i purugh nana mough a i yô, ka nan vande nengen ér kwagh môm za igirgi la iyol ga. I nger akaa hemba 30, a ka i gba u nana nenge ér nga eren tom sha inja cii ve, nana mase moughon yô. Aluer nan yenge akaa ne iyol sha inja ga tsô nan mough yô, igirgi la ia fatyô u za gban timin ior beee. Kpa u fa or u nahan igirgi u i hembe doon u nana yengen akaa ne iyol hanma shighe, nana nengen ér nga eren tom tsembelee kpa? Ka or u nan naha igirgi ica i gbe la je! Sha ci u imba or la nana fatyô u haan iyol inya, kera nengen hanma kwagh u i gbe u a nenge sha igirgi la ga tsô maa nana mough.

2. Ka nyi i gbe u Mbakristu vea karen vea nengene?

² Er ka i gba u or u nahan igirgi u wan kwagh ikyo nana dondo akaa a i nger shin inya la nahan, we kpa akaa nga kpishi a u fatyô u karen nengen sha er zum u u nyer ken ashighe a ican je kpa, jighjigh wou u nan una lu her taveraa yô. Wea sember eren batisema shin wea civir Aôndo anyom kpishi hegen kpa, gba kpee u hanma shighe yô u karen jighjigh wou u nan u nengen, una za shimi shi Yehova Aôndo una doo u ishima sha mimi yô. Aluer u ngu eren nahan hanma shighe man sha gbashima ga yô, u va hingir u kpen ken jijingi. Bibilo ta se icin ér: “Or u nan fe er nan tile yô, nana̱ ver ishima er nana kera va gba ga yô.”—1 Kor. 10:12.

3. Ka nyi yange gba u Mbakristu mba ken Galatia vea ere?

³ Yange gba u Mbakristu mba ken Galatia vea kar jighjigh ve u nan vea nenge una za shimi yô, shi vea fa er ve kera lu uikyangen sha ikyev i Tindi ga yô. Nagh ku Yesu na sha iyol na la wase Mbakristu mba ve ne un jighjigh la u fan Aôndo sha gbenda u hemban doon cii; inja na yô, lu u vea fatyô u hingir ônov mba Aôndo! (Gal. 4:9) Lu u Mbagalatia mbara vea venda atesen a Mbayuda mba ve lu hanger ér saa Mbakristu ve kura Tindi u Mose la; ka nahan man vea fatyô u va hingir ônov mba Aôndo ye.  Kera kpa Atôatyev a i tsôngo a ga la vande lun sha ikyev i Tindi u Mose la ga! Yange gba u Mbayuda vea vese ken jijingi, Atôatyev kpa nahan. Inja na yô, gba u ve cii vea fa ér saa vea kura Tindi u Mose la ve vea hingir mbaperapera sha ishigh ki Aôndo ga.

4, 5. Ka nyi Paulu yange wa Mbagalatia, man kwaghwan ne ngu se a iwasen nena?

⁴ Ityôkyaa i apostoli Paulu nger washika la hen Mbagalatia yô, lu u wan Mbakristu mba mimi cii kwagh ér ve de undun mimi u Bibilo u ve fe la, ve̱ hiden ve̱ eren akaa a ve vande den la ga. Yehova yange mgbegha apostoli ne nger kwagh ne ér i lu mba ken atôônanongo a ken Galatia mbara tseegh a taver ve asema ga, kpa a taver mbacivir un cica cii asema u tilen ken mimi dông.

⁵ Doo u se cii se umbur er yange er ve se due ken ikyangenev mbi ken jijingi, se hingir Mbashiada mba Yehova yô. Kwagh u una wase u u̱ umbur kwagh ne yô, hen sha mbampin mba uhar mban: U umbur akaa a yange u er ve u kuma u a er u batisema la kpa? U umbur akaa a yange u er ve u fa Aôndo, un kpa fa u, nahan u kera lu uikyangen ken jijingi ga la kpa?

6. Ka akaa a nyi se lu timen sha mini?

⁶ Akaa nga ataankaranyiin, a se cii yange se er cii ve se mase va fan Aôndo yô. Akaa ne nga er ngeren u ken jijingi u nengen ker karen jighjigh wase nahan. Nga ken ngeren u kiriki u a lu a itinekwagh ér  “Akaa a Or a Er Ve A Er Nan Batisema shi Nana Za Hemen u Vesen ken Jijingi La.” Aluer se mba umbur akaa a ataankaranyiin ne hanma shighe yô, kwagh la una wase se u taver ken jijingi, se kera yem keren akaa a taregh ga. Er or u nan naha igirgi ica i gbe kpa nan hee iyol inya ga, ka nan vande nengen ken ngeren u umbur nan akaa a ken igirgi a i gbe u nana yenge a iyol la ve nana purugh a aikyôr shio nahan, we kpa aluer u ngu umbur akaa a ataankaranyiin ne yô, u za hemen u tilen sha mimi.

7. Ka nyi i gbe u se erene, man ka sha ci u nyi?

⁷ Ngeren u or u nahan igirgi la ngu a umbur nan ér hanma kwa u i lu u nana mough a igirgi cii yô, gba u nana nenge ér akaa a i nger la nga eren tom tsembelee. Se kpa se fatyô u karen ayol a ase kua akaa a se eren hanma shighe, a yange i er se batisema je se hii u eren la nengen. Paulu yange nger Timoteu washika kaa ér: “Kwaghôron u dedoo u u zough a mi hen mo yô, a̱ lu u ikyav i zan sha mi sha kwagh u jighjigh u nan man dooshima u ken Kristu Yesu.” (2 Tim. 1:13) “Kwaghôron u dedoo” ne ngu ken Mkaanem ma Aôndo. (1 Tim. 6:3) Ka a gera a gera kpelan foto u kwagh tseegh kpa, kwaghkpelan la a nôngo u tesen se er kwagh shon a lu yô. Kape “kwaghôron u dedoo” la kpa ngu a wase se u kaven kwagh u vesen u Yehova a soo ér se̱ er je la. Se lu timen sha akaa a ka i gba u se er cii ve a er se batisema la, nahan se nenge sea lu dondon gbenda u mimi ne vaanaa yô.

8, 9. (a) Er nan ve i doo u mfe man jighjigh u nan wase una za hemen u vesene? (b) Tese ikyav er i gbe hange hange u se vese ken jijingi yô, man er i hii ve i gbe u se za hemen u vesen yô.

⁸ Kwagh u hiihii yô, gba u se lu a mfe. U dondon yô, se lu a jighjigh u nan. Kpa gba u se za hemen u vesen sha igbenda i ihiar ne cii. (2 Tes. 1:3) Or ka nana vesen yô, nan geman inja sha igbenda kposo kposo. Ka a kaa ér kwagh “vese” yô, mba kaan ér kwagh la seer indi man ityaven. Sha nahan yô, gba u zum u se er batisema kpa, se za hemen u vesen ken jijingi seer a seer.

⁹ Se fatyô u tôôn mvese wase u ken jijingi la karen sha gbenda u kon ka u vese la. Kon ka ua vese ua tav sha tsung nahan i doo kenger kpen kpen, hemban je yô, shighe u amishe a u a ze shin inya kpishi yô. U tesen ikyav yô, ikyon i sedar i ken Lebanon igen doo u kenger sha ci u i tav je kuma er iyou i taven sha i lun a ukpo 12 nahan, shi ka i wa amishe a yem ica shi a taver kpaa. Ka i kehe  je i lu u saa a kar kor u lihen, u kuman angahar 40 ve, ua tser itine na ye. (Icam 5:15) Kon ka u vese fele fele sha hiihii la. Er amishe a u a lu samber shi yemen shin inya seer a seer la, itine i u kpa ka i gbanger shi i taven i seer a seer. Ken masejime yô, ka i lu ican u fan er kon shon u lu vesen yô. Kape mvese wase u Mbakristu la kpa a lu je la. Alaghga se vese fele fele ken jijingi shighe u se hii Bibilo i henen la, nahan á er se batisema. Anmgbianev asev mba ken tiônnongo vea nenge a mvese la nahan, a doo ve kpishi. Alaghga se hii pania u eren shin a na se ityom igen ken tiônnongo je kpaa. Kpa er anyom aa lu karen la, alaghga mvese wase u ken jijingi ne una kera lu tseer tseer er sha hiihii la nahan ga. Nahan kpa, a gba u jighjigh wase u nan man mfe wase la una lu vesen seer a seer zan zan se ar “sha mlu u igyandenor man ikyaren i mluyol u m-iv u Kristu la.” (Ef. 4:13) Nahan mvese wase u Mbakristu la ngu er kon u u te mende, u vese zan zan u hingir zegekon u doon kenger la nahan.

10. Gba kpee u Mbakristu mba ve vie ken jijingi la je kpa vea za hemen u vesen her sha ci u nyi?

¹⁰ Kpa gba u mvese wase ne una kure heela ga. Gba u mfe wase una seer shi jighjigh wase u nan kpa una seer zan shimi. Nahan akaa ne a wase se se wa amishe gbang ken mkaanem ma Aôndo. (Anz. 12:3) Anmgbianev mba nomso man mba kasev kpishi ken tiônnongo er kwagh ne. Anmgbian ugen u a er tom u ortamen i hembe anyom ikyundugber yô kaa ér, zan zan hegen kpa un ngu zan hemen u vesen ken jijingi her. A kaa ér: “M seer zuan a mkav u ken Bibilo kpishi je. Hanma shighe yô, ka m keren igbenda i he i me dondo atindi man akaawan a ken Bibilo la sha avegher kposo kposo yô. Shi hemba maan mo iyol hegen u eren tom u pasen kwagh la cii.”

11. Ka se seer fan Yehova er ayange a lu karen la nena?

¹¹ Kwagh ugen u se er ve se tese ser se mba vesen ken jijingi yô, ka u seer kporom hen Yehova, u a lu Ijende yase man Ter wase la. A soo ér se fa ser se doo un ishima shi un soo ér i kpe se iyol kpaa, vough er wanye ka nana lu vea ter u nan ve i lu nan nahan, shin er ka sea lu vea ijende yase i ishima ishima ve i lu se nahan. Kpa er u fe nahan, se fatyô u lun a Yehova kôôsôô ken iyange i môm tseegh tsô ga. Gba u shighe a kar ve se va hingir u fan un shi soon un ye. Nahan aluer u soo u seer fan Yehova yô, kange ishima wer u ver shighe u henen Mkaanem nam ayange ayange. Shi ôron hanma ngeren u ken Iyoukura man Awake! u i dugh a mi cii, kua ityakerada igen i henen Bibilo a mi.

12. Ka nyi i gbe u se er ve se za hemen u lun a Yehova kôôsôô?

¹² Azende a Aôndo ka a seer vesen ken jijingi sha u eren mbamsen sha ishima i  môm shi kohol imôngo a mbacivir un mbagenev. (Ôr Malaki 3:16.) Yehova “veren ato sha zamber ve.” (1 Pet. 3:12) Ka sea yila Yehova ken msen ser a wase se yô, a ungwa, er ormaren u lun a dooshima nahan. Nahan yô, gba u se ‘taver ishima sha msen u eren.’ (Rom. 12:12) Saa Aôndo una wase se ve se za hemen u lun uigyandenmbaiorov ken jijingi ye. Se kôrcio u hemban ameen a shin tar ne, a a taver tsung ne, sha tahav asev ga. Aluer se kera taver ishima sha msen u eren ga yô, se nyume ayol a ase agee a Aôndo a kegh iyol u nan se hanma shighe la. Ka u er mbamsen ve kôr inya jee? Shin u nenge wer gba u ú seer sôron gbenda u u lamen a Aôndo laa? —Yer. 16:19.

13. Cii man se seer vesen ken jijingi yô, gba kpee u se luun imôngo vea mbacivir Yehova mbagenev sha ci u nyi?

¹³ Doo Yehova a mba ve “suur sha a Na” la; sha nahan yô, shighe u se va fe Aôndo la kpa, gba u shi se za hemen u kohol imôngo vea mbagenev mba ve fe un la hanma shighe ken tiônnongo. (Nah. 1:7) Er akaa a nan se iyolkpen a mgbough ken tar ne yô, doo u se luun imôngo vea anmgbianev asev mba nomso man mba kasev mba ka ve na se ishimataver la. Aluer u ngu kohol a anmgbianev imôngo yô, ka mbamtsera mba nyi u zua a mini? U zua a mbagenev ken tiônnongo mba vea taver we ishima u “lun a dooshima man aeren a dedoo” yô. (Heb. 10:24, 25) Saa se luun imôngo vea mba i sar ve u civir Aôndo er se nahan la ve se fatyô u tesen ayol a ase dooshima u Apostoli Paulu yange kaa a Mbaheberu ér ve lu a mi la ye. Cii man se lu a imba dooshima ne yô, gba u se eren akaa vea Mbakristu mbagenev. Yô, nôngo zaan mbamkombo hanma shighe cii, shi waan zwa ker kpaa.

14. Gba u se za hemen u geman ishima shi undun asorabo ase hanma shighe cii sha ci u nyi?

¹⁴ Cii man se hingir Mbakristu sha hiihii la, yange se gema ishima shi se de asorabo a ase. Nahan kpa, mgemshima ka kwagh u i gbe u se tese icin i môm tseegh ga yô. Er se yen yô, se mba ngôôr gban ken isholibo ga. Isholibo ngi er iyô, i i we iyol i lu keghen u gberen se nahan. (Rom. 3:9, 10; 6:12-14) Se lu nen tsevaa, se wa nen ikyo sha mbamyen mba se nengen a mi ken a vese la. Kwagh er doo yô, Yehova ngu wan ishima a vese er se lu nôngon a mbamyen asev shi geman uma wase ne. (Fil. 2:12; 2 Pet. 3:9) Kwagh u vesen u una wase se yô, ka u eren tom a shighe wase man akaa a ase sha inja, palegh u keren akaa a van se tseegh a mtsera la. Anmgbian u kwase ugen nger ér: “Yange i maren ken mimi, kpa m vesen yô, gbenda u m gema nengen kwagh u Yehova la kaha kposo a mbagenev kpishi. Yehova yange cier mo iyol kpishi, nahan m nenge mer mayange me fatyô u eren kwagh u doon un kpaa ga.” Shighe kar yô, anmgbian u kwase ne hii u gban ica a Yehova, sha ci u a er akaabo imôngo ken uma na. A kaa ér: “Lu sha ci u Yehova doom ishima ga ze, kpa lu sha ci u m fa un tsembelee ga. Nahan kpa, m er msen taveraa, maa m hii u den akaabo a m lu eren la.” Shi a kaa ér: “Yehova yange hemen mo vough er ter ka a hemen wan u kiriki nahan, lu wasen mo u hemban mbamtaver mba m lu tagher a mi la môm môm, lu tesen mo kwagh u gba u me er la sha dooshima.”

15. Ka nyi i lu ilian hen Yesu man Ter na ga?

¹⁵ Za hemen u ‘ôron ikpelaior’ loho u dedoo. Ortyom u Aôndo yange ôr Peteru man mbaapostoli mbagenev mkaanem man shighe u i yima ve ken purusu la. (Aer. 5:19-21) Tom u pasen kwagh hanma kasua la kpa ka kwagh ugen u i gbe u se wa ikyo sha mi yô. Kwagh u jighjigh wase u nan man tom wase u pasen kwagh la ngu ilian hen Yesu man Ter na ga. (Mpa. 2:19) Gba u se lu a mnenge u ortamen u se vande ôron kwagh na sha ijime la; a akaa ér: “Ka tom wase u pasen kwagh ne u hembe gban se kwagh cii ye.”

16. Er nan i doo u se hide se hen sha kwagh u iyoltseghan yase?

¹⁶ Hide hen sha kwagh u iyoltseghan you  la. Kwagh u hemban cii u se lu a mi yô, ka ikyar i se ye vea Yehova kangenaa la. Yehova fa mba nav. (Ôr Yesaia 44:5.) Time sha kwagh u ikyar i u ye vea Yehova la, nahan sôn un a wase u za hemen u lun a na kôôsôô. Shi umbur batisema wou la kpaa, de hungur iyange i hange hange ne ga. Kwagh ne una wase u u̱ fan er batisema wou la a tese ikyav i kwagh u injaa u hemban cii, u yange u tsua u eren yô.

17. Er nan i lu u saa se wa ishima ve se za hemen u lun kôôsôô a Yehova?

¹⁷ Shighe u Paulu lu ngeren washika hen Mbagalatia la, a pase ve er i gbe u vea waan ishima yô. (Gal. 6:9) Nyian kpa gba kpee u Orkristu nana waan ishima. Ú tagher a atsan, kpa Yehova una wase ú u nôngon a a. Za hemen u sônon un icighan jijingi. Una gema ijungwen you la ia hingir iember, ishimavihin you kpa ia hingir bem, nahan a pever we iyol kpishi. (Mat. 7:7-11) Hen sha kwagh ne: Aluer inyon i sha kpa Yehova ngu koson i yô, hide we u a doo u ishima shi u tsough u eren ishima na la ve, una kera wa u ikyo ga yee? (Mat. 10:29-31) Wea tagher a nyi mtaver je kpaa, de hir ijime ga; de yen ishima kpaa ga. Er se lu ior mba Yehova a fe se yô, se mba a averen kpishi!

18. ‘Er u va fe Aôndo ne,’ ka nyi u soo u eren hegene?

¹⁸ Sha nahan yô, wea sember fan Yehova shi a er u batisema yô, mase shin nyi hegene? Za hemen u seer fan Yehova, vese hingir or u vian ken jijingi. Man aluer wea er batisema anyom aa kar imôngo di yô, mase shin nyi hegene? We kpa gba u ú za hemen u seer fan Yehova. Doo u mayange se nenge ser se fa kwagh Yehova vindi vindi, shi ma kwagh u una vihi se a na je kpa ngu ga ze. Kpa doo u hanma shighe yô, se karen se nengen aluer mlu wase vea Yehova Aôndo, u a lu Ter wase man Ijende yase la, una lu taver seer a seer yô.—Ôr 2 Mbakorinte 13:5, 6.