Tese Ônov ou

Shem Nenge a Isholibo i Ikyov Ihiar

SHEM, wan u Noa yange war mkur u tar ugen, gema nyôr ken ugenegh. U fa ityôkyaa i yange na ve i tim tar u hiihii u Shem lu keregh la man er yange hii ve un man tsombor na war nyôr ken tar ugenegh kpa?— * De se lam sha kwagh ne.

Bibilo kaa ér shighe u Shem lu iyev la, “isholibo i or” kehe sha won. Lu kwagh u “bo tseegh gbem” ior henen sha mi ye. Nahan u fa kwagh u Aôndo er kpa?— Yange va a mngerem ma deemee va tim botar la kera. Apostoli Paulu nger ér: “Tar u u lu hen shighe la, [mngerem ma deemee va sha u], u tim kera.”—Genese 6:5; 2 Peteru 3:6.

U fa er yange hii ve Aôndo tim tar la kera kpa?— Ior mba tar la lu ubombaiorov shi lu kwagh u “bo tseegh gbem” ve henen sha mi ye. Yesu ôr kwagh sha kwagh ne. A kaa ér, er “mngerem ma deemee lu a va ga la,” ior mban lu yan tar, ve lu “yan akaa, man akaa” shi ve lu “eren kasev, nan kasev ken unoo” kpaa. Yesu shi kaa ér: ‘Ve fa ga zan zan mngerem ma deemee va, va kuwa a ve cii kera.’—Mateu 24:37-39.

Kanyi ior mbara yange ve fa ga shin ve nenge a mi ga?— Noa, ter u Shem lu or u “yôôn kwagh u perapera,” kpa ior mbara kegh ato a kwagh u lu yôôn la ga. Noa yange ungwa imo i Aôndo, nahan a er tso u una tôô un vea tsombor na, vea war Mngerem ma Deemee yô. Lu Noa man kwase na man mbayev vev, ka Shem man Ham man Yafeti je la, kua kasev vev tseegh yange ve ver ishima ve fa kwagh u Aôndo soo ér ve er la ye. Ikpelaior igen cii er kwagh u sha asema ve tseegh, nahan i tim ve kera sha Mngerem ma Deemee.—2 Peteru 2:5; 1 Peteru 3:20.

Hii shighe u Mngerem ma Deemee va la je, Shem man tsombor na tsa ken tso nôngo u kuman inyom jimin cii ve ve mase duen shin tso la, haan angahar sha tareghinyaa ye. Ubombaiorov cii kera lu ga, kpa ica gba ga tsô kwagh kôr gema. Kanaan u lu wan u anmgbian u Shem u i yilan un ér Ham la, er kwaghbo u vihin tsung, nahan Noa kaa ér: “Ifan i̱ kôr Kanaan.” Wan u wan u Ham, Nimrodi, kpa lu bo or. Yange hendan a Aôndo u mimi, Yehova, shi kaa a ior ér ve maa gôgôyou  u taven, u i yilan ér Babel la, sha er iti ve ia za gwa sha won yô. U hen wer kwagh ne lu Shem man ter na ken ishima nena?—Genese 9:25; 10:6-10; 11:4, 5.

Yange doo ve ga, Yehova kpa doo un ga. U fa kwagh u Yehova er kpa?— Yange nzughul zwa u ior mbara sha er ve de ongo ayol a ve ga yô. Ior mban maa de u maan gôgôyou u ve lu maan la, ve sambe ve yem sha ajiir kposo kposo vea mba ve lamen zwa môm a ve yô. (Genese 11:6-9) Kpa Aôndo nzughul a zwa u Shem man tsombor na ga. Yange nzughul a zwa ve ga sha er vea lu imôngo kangenaa shi vea wasen ayol a ve u eren Aôndo tom yô. U fa anyom a Shem er Yehova tom kpa?

Shem tsa anyom 600. Yange lu anyom 98 shighe u Mngerem ma Deemee lu a va ga la, shi tsa kuma anyom 502 shighe u mngerem uma kera la. Se na jighjigh ser yange wase Noa u gban tso shi tan ior icin sha kwagh u Mngerem ma Deemee ma ma lu van la. U hen wer ken anyom a hemban 500 a Shem tsa sha won, shighe u mngerem ma Deemee kar kera la, yange lu eren nyi? Noa yila Yehova ér “Aôndo u Shem.” A̱ shi nan kpa Shem yange za hemen u eren Yehova tom shi wasen mba hen tsombor na sha u ve kpa ve er nahan yô. Shighe kar yô, i va mar Aberaham man Sara man Isaka ken tsombor u Shem.—Genese 9:26; 11:10-31; 21:1-3.

Hen ase sha kwagh u tar u nyian, u isholibo i lu ngeen ker seer a seer, hii sha ayange a Shem la je zan zan nyian la. Kanyi ia er u?— Bibilo kaa ér ngu “karen kera.” Kpa gema ver ikyav sha ityendezwa ne: “ [Or] u nan eren ishima i Aôndo yô, nan ngu lun gbem sha won.” Nahan, aluer se er ishima i Aôndo yô, alaghga se lu ken mbara mba vea war vea nyôr ken tar u he u Aôndo la. Nahan, sha iwasen i Aôndo yô, zum la se lu uma shin tar, se ember gbem sha won!—1 Yohane 2:17; Pasalmi 37:29; Yesaia 65:17.

[Ngeren u shin kpe]

Mbampin:

○ Ka tar u nyi Shem hii lun kere, man ka atôakyaa ahar a nyi yange na ve Aôndo tim u kera?

○ Shem yange tsa kuma nena, man lu nyi oro?

○ Kanyi ica a gba ga tsô ia er tar nee?

○ Se er nyi ve se fatyô u waren mkur u tar nee?