Aôndo Za Hana?

Setemba 11, 2001: Sha ahwa 8:46 pepe, igirgi i vesen igen purugh za ta sha iyou i sha aôndo i yange i lu vegher u ken imbusutarimese hen ijiir i í yer ér World Trade Center ken gar u New York la. Kwagh ne lu mhii u num u mbawan tswam ta sha ajiir kposo kposo ken tar u Amerika yô. Hii hen shighe la zan zan miniti 102 nahan, ior kpe je kuma er iorov 3,000 nahan.

Disemba 26, 2004

Tar yange u tenger taveraa shin ityeku i í yer ér Indian Ocean la. Mtenger ne mough a agôndoamnger a wuan ior va ta sha ityar 11, kua ningitar u Afrika u lu ica a ijiir i mtenger la je kuma er ukilomita 3,000 nahan la. Ken iyange i môm tseegh, ior kpe iorov 150,000, mbagenev ken iyengeior ne saa a saa, shi ior mba hemban er miliôn môm nahan kera lu a ya u tsan ga.

Agusutu 1, 2009: Orgen u kuman anyom 42 lu nahan tso-injin vea wan na u lun anyom 5. Ve za ta sha tsembe ugen u i mande sha ikyon yô. Or la kpe her. Wan na gema kpe sha iyange i dondon la. Anmgbian u or ne u kwase u ule kpishi yô, kaa ér: “Se lu eren msen sônon Aôndo ser, a̱ er ivande, a̱ war un [wanakiriki la].”

Ka wea ôr kwagh u mbawan tswam mba ve te num sha ma ijiir shin kwagh u ma aahe u sha gbaaôndo ken ipipaabaver, gayô kwagh ka una er u u̱ vihin nahan, ka i lu inja er Aôndo ngu nengen kwagh u a lu eren ne ga nahanaa? Ka u hen wer Aôndo undu se shinii? Bibilo na mlumun u surun se ishima, er i tese ken ngeren u dondon ne nahan.

[Ape i zough a ufoto mban yô u sha peeji 3]

© Dieter Telemans/Panos Pictures

PRAKASH SINGH/AFP/Getty Images

© Dieter Telemans/Panos Pictures