Kporom Hen Aôndo

Er Kwagh u Ior Cii Ma Ve Eren sha u Civir Aôndo La

I LU nahan u pine wer, ‘Awashima u uma jim yô, ka nyi’ vee? Yehova gba se, na se tahav mbu pinen imba mpin la tseegh ga, kpa shi a wa isharen ken a vese i soon ser se zua a mlumun sha mpin ne. Kwagh er doo yô, Aôndo wase u dooshima er kwagh u una wase se se zua a mlumun la yô. Mlumun u a sar se tsung u zuan a mi la, ngu ken Bibilo i i lu Mkaanem nam la. Time ase sha mkaanem ma Tor Solomon ma i nger ken Orpasenkwagh 12:13 la, tsô u nenge.

Mlu u Solomon yange lu kaha a u ior mbagenev kpishi je. Nahan a fatyô u ôron akaa a or a er ve nana zua a msaanyol kua er uma u nan una lu a inja yô. Solomon lu a kwaghfan u kpilighyol shi lu a inyaregh kpishi shi lu tor u lun a tahav shi ker akaa a umace ve keren la cii kua inyaregh man itizan kpaa. (Orpasenkwagh 2:4-9; 4:4) Nahan, icighan jijingi mgbegha un, a kure ikyaa sha akaa aa a zua a mkav sha mi la, ér: “Ngun ka mkur u kwagh, u i vande ungwan la cii: Cia Aôndo, waan atindi Na ikyo; gadia ngun ka kwagh u ior cii ma ve er je ne.” Mkaanem man tese kwagh u a hembe lun a inja cii, u i gbe u or a er ve nana zua a mtsera yô.

‘Cia Aôndo.’ Alaghga se mbagenev yô kwagh u i kaa ér se cia Aôndo la, una doo se ga. Kpa mciem man ka mlu u dedoo u ken ishima. Mciem man ka ma kpan ka nan cian orvesen u nan u vihin tu gigh gigh ér nana va er kwagh u vihin nan la ga, kpa ka ma wanye u i sar nan tsung u eren kwagh u una doo ter u nan, ka nan lu a mi la. Takerada ugen kaa ér mcie u cian Aôndo la ka “icivir i ior nav ve ne un sha ci u a doo ve ishima shi ngu a tahav man mhembe la.” Mciem man ka ma mgbegha se u eren ishima i Aôndo sha ci u a doo se ishima shi se kpa se fa er se doo un ishima yô. Mciem ma mimi man, ka di kwagh u ken ishima tsô ga; kpa ka se tese ma sha aeren. Ka se er kwagh ne nena?

‘Waan atindi Na ikyo.’ Mcie u cian Aôndo la, ka a mgbegha se u ungwan imo na. Doo u se ungwan imo i Yehova. Er a lu Orgban wase yô, a fa gbenda u hemban doon cii u se eren akaa ken uma wase yô, vough er orvarenkwagh ka nan fa gbenda u hemban doon cii u a er tom a kwagh shon nahan. Heela tseegh ga, Yehova soo ér kwagh a za a vese i doo. A soo ér i saan se iyol, shi akaa a a soo ér se eren la kpa, ka sha ci u mkpeyol wase. (Yesaia 48:17) Apostoli Yohane yange ôr kwagh ne nahan ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yohane 5:3) Ka sea ungwan imo i Aôndo yô, se tese ser a doo se ishima, atindi a a we se la di a gema a tese ér se doo un ishima.

‘Ka kwagh u ior cii ma ve er je ne.’ Mkaanem man pase ityôkyaa i hange hange i i ne ve se cie Aôndo shi se ongo imo na kpaa yô. Ka kwagh u i gbe u se er je la, ka tom wase. Yehova ka Orgban se, nahan ka un a ne se uma ye. (Pasalmi 36:9) Shi gba u se ungwan imo na kpaa. Ka sea eren akaa ken uma wase er a soo la yô, se tese ser se mba eren kwagh u i gbe u se er la.

Nahan yô, awashima u uma yô, ka nyi? U ôron kwagh tan a ta aningir ga yô, ka kwagh shon je ne: Se mba heen sha ci u eren ishima i Aôndo. Kwagh ugen môm kpa ngu u una na uma wase una hemba lun a inja ga. Er nan u ker gbenda u seer fan akaa a Yehova a soo, kua er u er ve, uma wou una zua sha akaa shon ga? A doo Mbashiada mba Yehova kpishi u wasen we.