Ka sha ityôkyaa i nyi nahan or a er u iyua ve ia doo u kpishi? Se mbagenev kpishi a saan se iyol a iyua i or ne se sha ci u se doo nan ishima la, kpa i nan ne se sha ci u gba kpee u nana er nahan la yô, a saan se iyol a mi ga. Mba gbe eren or iyua ga, saa ka i lu sha ityôkyaa. Ityôkyaa la ngi se kwagh u vesen. U hemban cii yô, kwagh ka a gba Aôndo sha ityôkyaa la. Time ase sha mkaanem ma Aôndo yange na apostoli Paulu nger ken 2 Mbakorinte 9:7 la.

Er nan ve Paulu yange nger mkaanem mara? Yange soo u taver Mbakristu mba ken Korinte ishima ér ve na iwasen sha tom u wasen Mbakristu mba ken Yudia, mba yange gba u a wase ve la. Yange kighir a kighir Mbakorinte ér ve na iwasenaa? Ei, a nger ér: “Hanma or nana̱ na er nan we ken ishima i nan la nahan, i̱ de lu zunguluu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.” De se time nen sha kwaghwan ne zulee.

“Er nan we ken ishima i nan la.” Paulu kaa ér Orkristu u mimi ka nan er iyua sha ci u nan vande wan “ken ishima” i nan u eren nahan. Kwagh ne tese ér Orkristu ka nan hen sha mbamgbe mba Orkristu ugen zumbee. Orfantakerada ugen kaa ér ishember i ken zwa Grika i i gem ér “wa” la, “ngi ôron kwagh u or vande kangen ishima sha mi yô.” Sha nahan yô, Orkristu ka nan hen sha mbamgbe mba Mbakristu mbagenev tsembelee, nahan nan hen kwagh u nana er ve a kure mbamgbe mbara yô.—1 Yohane 3:17.

“I de lu zunguluu ga, i̱ de lu sha apera kpaa ga.” Paulu ter igbenda ihiar i eren iyua, i i gbe u Mbakristu mba mimi vea palegh yô, ka iyua i nan zunguluu man sha apera shin sha mkighir la. Inja i ishember i ken zwa Grika i i gem ér “zunguluu” la ér, “sha ishima i nan ga (shin sha lanshima).” Takerada ugen kaa ér, or u nan kwagh zunguluu shin sha lanshima la ka nana naan or inyaregh kpa, nan “zungwen shin ishima ér ka u kia kera lu ki nan ga.” Or u nan ne kwagh sha mkighir yô ka nan na sha ci u gba kpee u nana er nahan. Ka an ken a vese je nana soo u ngohol imba iyua i or ne nan sha mkighir shin sha lanshima la sha wono?

“Ka or u nan ne kwagh sar sar la je nan doo Aôndo ishima ye.” Paulu kaa ér aluer Orkristu ngu nan iyua yô, nana na i sar sar. Sha kpôô yô, or ka nana na kwagh sha ci u nan nenge ér doo u nana er nahan yô, nan zua a msaanyol. (Aerenakaa 20:35) Msaanyol u or u nan ne kwagh saan saan la ka a due ken igbar. Jighilii yô, ishember i “sar sar” la ia fatyô u lun mlu u ken ishima u or u nan kwagh, kua ieren i nan kpaa. Or ka nana na se kwagh sar sar yô, kwagh la a kôr se ken ishima. Shi ka nan na i saan Aôndo iyol kpaa. I gema ivur ne ken Bibilo igen ér: “Ior mba nagh ku doo ve ishima la ve doo Aôndo ishima.”

Mkaanem ma Aôndo na apostoli Paulu nger ne ka kwaghwan u una wase Mbakristu u nan kwagh yô. A lu shighe wase shin agee a ase shin akaa a se lu a mi la se lu nan kpa, se tsua nen a ishima yase u eren nahan, shi i lu sha ci u doo se sha mimi u nan mbagenev kwagh mgbeghaa, hemban je yô mba ve lu ken ibanave mbara. Aluer se mba nan kwagh nahan yô, a saan se iyol shi Aôndo kpa a doo un a vese, “gadia ka or u nan ne kwagh sar sar la je nan doo Aôndo ishima ye.”