Mbacivir Yehova ka vea nôngon ér vea er ishima na nahan, iniôngon ve la i gba un kwagh je he? Alaghga mbagenev vea kaa ér ei, sha ci u ve senge ér kwagh gba Aôndo a vese ga. Kpa mba ve kaan nahan la gema mba zan Aôndo gwa sha kwagh u a eren ga yô. Bibilo i i lu Mkaanem nam la pase kwagh na wang. I̱ kaa a vese jighilii ér Yehova fa iniôngon i mba ve civir un sha jighjigh la. Ôr ase mkaanem ma apostoli Paulu, ma i nger ken Mbaheberu 11:6 la.

Ka nyi se er ve a doo Yehova a vese? Paulu nger ér: “Á fatyô u doon Aôndo ishima ga, saa sha jighjigh u nan.” Fa wer Paulu ngu ôron ér taver u eren ishima i Aôndo a jighjigh u nan shio ga. Kpa apostoli ne kaa ér a jighjigh u nan shio yô, á fatyô ga. Se fatyô u ôron kwagh ne sha gbenda ugen ser, jighjigh u nan ka kwagh u hange hange u i gbe u se lu a mi keng ve se er ishima i Aôndo yô.

Se na jighjigh nan ve a doo Yehova? Gba u se na Aôndo jighjigh sha atôakyaa ahar. Hiihii yô, gba u se ‘na jighjigh keng ser ngu.’ Aluer se mba a akperan a tan ser ngu yô, a er nan ve se fatyo u eren ishima naa? Nahan kpa, jighjigh u nan u mimi la saa sha u fan ser Aôndo ngu tseegh ga, gadia ujijingimbabov je kpa na jighjigh ér Yehova ngu. (Yakobu 2:19) Jighjigh u se ne ser Aôndo ngu la a mgbegha se u tesen jighjigh u nan la sha u eren akaa a aa na a doo Aôndo a vese yô.—Yakobu 2:20, 26.

Ityôkyaa i sha uhar yô, gba u se “na jighjigh keng” ser Aôndo “ne mba ve lu keren Un la injar.” Or u nan lu a jighjigh u nan u mimi yô, ka nan lu a vangertiôr ér iniôngon i nan i eren akaa a aa na a doo Aôndo a nan la ia saa ishe ga. (1 Mbakorinte 15:58) Aluer se mba a akperan a tan sha tahav shin isharen i Yehova a lu a mi i nan se injar la yô, a er nan ve se fatyô u eren ishima naa? (Yakobu 1:17; 1 Peteru 5:7) Or u nan kur ikyaa ér Aôndo we ikyo sha kwagh wase ga, shi iniôngon yase kpa fe i ga shi ne se kwagh mgbeghaa ga yô nan fa Aôndo u Bibilo i pase kwagh na la ga.

Ka unô Yehova ngu a na ve injara? Paulu kaa ér ka “mba ve lu keren Un la.” Takerada ugen u pasen asember a ken Bibilo kaa ér ishember i ken zwa Grika i i gem ér “keren” la ngi ôron kwagh u “u zenden keren” ga, kpa ngi ôron kwagh u u van hen Aôndo “ken mcivir” la. Takerada u pasen asember a ken Bibilo ugen di pase ér i ter ishember i ken zwa Grika i pasen ieren ne sha gbenda u tesen ér mba eren kwagh kpoghuloo shi mba hemban eren un a akaa agen cii. Yehova ne mba jighjigh ve u nan ka a mgbegha ve u civir un a ishima i môm man sha gbashima la injar.—Mateu 22:37.

Yehova ne mba ve civir un sha jighjigh la injar nena? A tôndo zwa u va nan ve injar i doon tsung ken hemen, i i tese ér, ne kwagh mgbeghaa shi ngu a dooshima yô, injar la ka uma u tsôron ken Paradiso shin tar. (Mpase 21:3, 4) Hegen je kpa, mba ve lu keren Yehova la mba zuan averen a injaa tsung. Icighan jijingi man kwaghfan u a dugh ken Mkaanem ma Aôndo la wase ve u zuan a kwagh u injaa ken uma ve.—Pasalmi 144:15; Mateu 5:3.

Mimi je, Yehova ka Aôndo u a fe iniôngon i mba ve civir un sha jighjigh, a ishima ve i môm, shi iniôngon ve la i gbe un kwagh kpaa yô. Er u fe nahan yô, kwagh la iv u a isharen i seer kporom hen a na kpa? Aluer ka nahan yô, er nan u seer henen gbenda u u fatyô u lun a imba jighjigh u nan u Yehova una na u injar sha mi mgbeghaa la, shi tesen jighjigh u nan shon ga?