U soo wer i kpe u iyol kua tsombor wou shi ne tsa gbem sha wonoo? Sar ú u va lun ken tar u kwaghnyoon man ican i yan man ku cii vea kera lu ga laa? Imba tar la ka mnyamciem ga. Shi kpuaa tsô tar u he u perapera la ua va, sha ci u Yehova wa ishima ér kwagh a lu nahan. Nenge er i pase mkur u awashima na ne ken Mpase 21:3-5 yô.—Ôr.

“[Aôndo] Una ese ve mliam sha ashe kera cii.” (Mpase 21:4) Ka mliam ma nyi nahan una ese kera? Ka mliam ma kwagh ka a doo se kpishi ve se vaa, shin ma ma sôron se ashe la ga. Ityendezwa i Aôndo la ngi ôron kwagh u mliam ma se vaan sha ci u se mba yan ican shi se mba zungwen la. Aôndo una ese se mliam mara kera tseegh tsô ga; akaa a vihin a a eren se ve se vaan la cii, una kar a a kera vindi vindi, ka ican i yan man ijungwen je la.

“Ku ua kera lu ga.” (Mpase 21:4) Ka nyi igen ia er se i vihin se ve se vaa je a hemba ku, u u lu orihyom wase laa? Yehova una pase uumace mba ungwan imo na sha ikyev i ku una tuhwa. Una er kwagh ne nena? Una kar a kwagh u a ve a ku jim jim la kera: Ka isholibo i Adam, i se ye dyako u i la. (Mbaromanu 5:12) Yehova una hide a uumace sha mlu u vough sha nagh ku ipaan ku Yesu kura. * Nahan orihyom u masetyô u a lu ku la, “á tim un kera.” (1 Mbakorinte 15:26) Uumace mba ve civir Aôndo sha mimi la vea lu sha tar, er Aôndo a soo ér ve lu la, vea lu ken mkpeyol u vough gbem sha won.

“Ican kpaa ia kera lu je ga.” (Mpase 21:4) Ka ican i nyi nahan ia kera lu ga? Zayol u ken ishima man u ken ityou man mbamnyoon mba isholibo man myen ve ne ve ican i tser ior umiliôn umiliôn la cii, vea kera lu ga.

Shi kpuaa tsô uumace vea de u vaan shi vea kera kpeen ga shi ican a kera eren ve ga. Alaghga u pine wer, ‘Kpa a lu hana? Alaghga ityendezwa i Aôndo ne ka kwagh u sha shiinii?’ Ei. Nenge er i hii ve i lu sha ga yô. Hiihii yô, ityendezwa la hii ér, “tenti u Aôndo ngu hen ior,” man ka shin tar ior ve lu ye. (Mpase 21:3) Sha uhar yô, ityendezwa la i ôr kwagh u tar, ape “ku ua kera lu ga” yô, ka tar u ku u lu ker, kpa ua va kera lu ga yô. Ma shighe môm kpa ku ngu a er sha ga, kpa shin tar yô, ku hii u wuan ior ka kwagh u nyian a mi ga. Sha nahan yô, kwagh ne tese wang je ér, ka shin tar ityendezwa i sha kwagh u mkpeyol la ia kure ye.

Yehova soo ér se na jighjigh a ityendezwa na i tar u he, u perapera la. Aôndo pasen averen a una va a mi la been yô, a bum ér: “Nenge M ngu geman akaa cii hingir a he.” Shi A kaa er: “Akaaôron ne ka a jighjigh man ka a mimi kpaa.” (Mpase 21:5) Er nan u seer fan er we kua ior ou kpa ne fatyô u lun mbacivir Aôndo mba vea va nenge er ityendezwa na ne ia kure la ga?