Nongo u mbanyiman Aôndo ugen sember varen ngern sha kpande u yôôn kasua ér: “U ngu or u u nyiman Aôndo yôô? Ior umiliôn imôngo nyiman Aôndo.” Kwaghngeren ve ne tese ér ve na Aôndo jighjigh ga.

Hide vegher ugen yô, ior kpishi mba ve senge ér ve na Aôndo jighjigh yô mba eren akaa inja er Aôndo ngu ga nahan. Bishôp u tamen u adua u Fada ugen ôr kwagh u ior mba ken côôci na ér: “Nyian ne, or môm nana fatyô u nengen ieren yase man fan ér se mba Mbakristu ga, sha ci u ieren yase kaha a i mbanyiman Aôndo la ga.”

Mbagen tume ityough u eren akaa a ve je ve de u henen sha kwagh u Aôndo kuaa. Ve nenge ér ngu ica hiinii, gande u una wase ve. Ambaaior ne nga keren Aôndo shighe u kwagh a tser ve shin kwagh a gbe ve la tseegh, inja er Aôndo ngu anye u ka ve tindi zum u kwagh a gbe ve la tseegh nahan.

Mbagenev yô mba eren akaa a kwaghaôndo ve a tesen la ga, alaghga ka sha ci u ve nenge ér, ka a inja u dondon atesen la ga. U tesen ikyav yô, ior mba zan adua u fada ken tar u Jamani kpishi na jighjigh ér ka kwaghbo u nomsoor man kwase lun imôngo cii masen zuan ivese ga, man mhen ne zua sha kwagh u côôci ve man Bibilo i tese la ga. (1 Mbakorinte 6:18; Mbaheberu 13:4) Nahan kpa, ka mbazan adua u fada tseegh ga, mbazan mbaadua mbagenev kpa nenge ér, er ior kpishi ve ze adua nahan kpa, mba eren akaa a ve ne jighjigh a mi la ga. Mbahemenev mba kwaghaôndo kpishi vaa iyol ér, ieren i iov vev mba ve ze adua la ngi er i̱ “mba ve ne Aôndo jighjigh ga” la nahan.

Akav a se tese sha heen ne na yô, mpin due ér: Mimi je kwagh gba se a Aôndo? Ikyaa ne hii ica i gba je, ka kwagh u nyian a mi ga. I pase ape yange ikyaa ne due la ken mhii u Bibilo je. De se time sha akaa a ayange ikyaa due sha mi la ken takerada u Genese, tsô se zua a mlumun sha mpin ne.