Nineve lu gartamen u Tartor u Ashiria. Lu zegegar u lun a ayouator a doon man utempel kua ugodobi mba gbanger shi girgar na civir kpishi. Profeti Nahum, u lu Orheberu la yila gar la ér “gar u awambe.”—Nahum 3:1.

Kwagh u i ôr sha Nineve la lu nahan vough, gadia akaakperan a ken iyou i tor Senakeribi i ken Nineve la tese ér tar u Ashiria yange u er ior ican kpishi. Kwaghkperan ugen tese er i kange or u ken uikyangen ugen ave, upilambaiorov ve kighir un shin inya, ugen di a lu urugh nan nombor tsuan yô. Ngeren mba sha ikpandeawen tese ér yange a yemen a ior ken uikyangen yô, i ta ve utsuwe sha ahenga shin sha ityumbujôôgh, i urugh ve a mi. Yange i gba mtom ma ator a atiator a i lu yemen a ve uikyangen la, i har ve sha mon er ka ishiligh nahan.

Or u timen sha akaa a shin inya ugen ken Ashiria u tsuaa la pase er yange a za hemba ma gar ityav ve i camber a mba i ker ve la yô. A kaa ér: “Hanma gbenda u tor u Ashiria yange una za hemba ityav una kar cii yô, i ta mtom ma iorov atihi atihi; yange a̱ nande mbayevnomso man mbayevkasev uma ga yô, i ver ve her sha ci u ican i hemban vihin cii ken hemen; yange i mande nomso sha kon, gayô i huwa ve kwavyolough uma, gayô i ongor ve ashe, shin i tôndo ve ave man angahar, gayô i kura ve atô kua ahenga.”

Aôndo yange wa Mbayuda tindi ér: “Zum u ú maa iyou i he yô, wa igyar sha haav mbu i sha, kase cii sha er ú va a ibo i awambe sha iyou you ga, aluer or nana osogh sha nana gba yô.” (Duteronomi 22:8) Er Mbayuda mba tsuaa mbara eren akaa sha toryoughough yô, yange i gba u a wa igyar kpee sha u kuran ve.

Ayou a Mbaiserael kpishi yange a lu a tembe sha ityough nagh. Toryoughough lu kpam ijiir u teman sha mi tseen oo, shi zuan a ahumbe a kundun iyol gayô eren ityom i hen ya igen. Toryoughough lu ijiir i yaven kundu kundu sha shighe u iceenyolough. (1 Samuel 9:26) Orsule yange nan tsen samuyia sha toryoughough cii nan wua mwem a mi ye, gayô nan tsen atam a tur shin a wain sha mi.—Yosua 2:6.

Toryoughough shi lu ijiir i ior civir Aôndo u mimi, mbagen di civir ieev her yô. (Nehemia 8:16-18; Yeremia 19:13) Apostoli Peteru yange unde sha toryoughough atetan, za er msen. (Aerenakaa 10:9-16) Yange a er atumbe sha andar a avilegh sha toryoughough yô, u lu ijiir i doon u memen her.

Takerada u pasen akaa a Bibilo ugen kaa ér, yange i maa ayou a Mbaiserael a lu a gogo u unden sha toryoughough “ken won u iyou, a lian sha iyou shon.” Sha nahan yô, yange or hungwan sha toryoughough u nan a u nyôron ken iyou shio. Ka nahan ve Yesu ta icin sha kwagh u yevese undun gar shighe u i gbe torough torough u timin un la ér: “U nan lu sha tor kpaa, nana̱ de hongo sha u tôôn ikyav mbi ken iyou i nan ga” ye.—Mateu 24:17.