Yange i marem ken Riga, gartamen u tar u Latvia la. Ngô wase yesem vea anmgbian wam u kwase, u m dondo sha a na la. Shin er Ngô wase zaan adua u Fada nahan kpa, se zaan adua shighe u i lu eren iniongo i kwaghaôndo tseegh. Yange m na jighjigh mer tahav mbu hemban cii mbu, kpa er m lu iyev yô, asaren agen kpishi danem.

M ngur vesen yô, ngôm nenge ér m ngu a mfe u soghon kwagh avegher avegher, shi hiden kangen her. Er se lu a akaa kpishi a me fatyô u soghon yô, a gbaan u ngôm una undum hen ya tswen, una yem mape yô, i za un iyol kpishi. Kwagh ne na yô, ngôm nam anakwati u ikyav mbi numben a mi, u yange i doom u zuan vough vough shi hiden saghen yô. Kwagh ne yange zua sha isharen yam igen, isharen ne lu agugu u nahan. Ngôm yange za wam ken kwe u mba gban gesa u ayemegh sha agugu, mba i yilan ve ér Zelta Mopēds (shin The Golden Moped) la. Yange m hii u gban ayem a mbaagugu mba kiriki; shighe kar yô, m hingir u gban ayem a mbaagugu mba i gbe ayem a mi jim jim la.

Yange m ngôôr fan kwagh ga, nahan ica i gbe ga yô, m fa u eren anumbe a bo, a i eren a tsough tso tsough ne tsema tsema. M ya iyua i or u hemban ayem a sha agugu, i tar u Latvia la kwa tar, kua i ityar i i yer ér Baltic States la kwa har.

Shighe u m hingir icôr-kwagh ken ayem a gban sha agugu la, Mbashiada mba Yehova hii u lamen a shiôr yam, u i yer un ér Evija (u va hingir kwase wam la). Yange zua a ityakerada ve igen, i i lu a ijiir i ngeren adereshi pinen ér i va hen Bibilo a na yô. Nahan a nger a tindi a mi. Ica i gba ga maa Mbashiada iorov uhar va her a na, maa ve hii u henen Bibilo a na. Kwagh ne zam iyol ga, kpa hen shighe la, kwagh gbam sha kwagh u kwaghaôndo ga.

Shighe kar yô, Mbashiada mbara lu henen Bibilo vea Evija, nahan ve lôhôm ér m tema her m ungwa. M tem yô, m  ungwa akaa a ve ôr la doom. Kwagh u yange hemba kôron mo ken ishima yô, lu ityendezwa i Bibilo i kaa ér tar ua va hingir paradiso la. U tesen ikyav yô, yange i tesem kwagh u i er ken Pasalmi 37:10, 11 la. Ijiir la kaa ér: “Shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.” Yange m ungwa kwagh u ityendezwa la nahan doom kpen kpen.

Yange seer gban mo ishima u fan Aôndo. Nahan m hii u kaven er ukwaghaôndo kpishi ve lu mba mimi ga yô. Kpa atesen a Bibilo kôrom ken ishima, sha ci u yange pase akaa vough vough shi wanger kpaa.

Er m za hemen u henen Bibilo la, m mase kaven er uma a gbe Yehova kwagh kpishi, shi a ker un iyol tsung yô. (Pasalmi 36:9) Ivur Bibilo ne yange i na yô, m kera soo mer uma wam a lu sha zongo ga, nahan m de u gban ayem sha agugu. Kpa m gema m soo u eren kwagh u una va Yehova a icivir yô. Kwagh ne na yô, iti i m za kpishi la man icivir i m lu a mi la kua msaanyol u m zuan a mi sha u gban ayem sha agugu la cii kera lum kwagh u vesen ga.

Ken inyom i 1996 la, m za mkohol u ityar ityar u Mbashiada mba Yehova er hen gar u Tallinn, ken tar u Estonia, ikyua a agirigi u m gbaan ayem sha agugu her la. Yange m nenge a ior mba ken ityar kposo kposo hen mkohol la, ve lu ken mzough shi ve lu ken bem kpaa. U tesen ikyav yô, yange ikpa saa Kwaseshiada ugen, nahan m hen mer una tsa a zua a mi ga. Nahan kpa, ica gbe ga yô, Kwaseshiada ugen zua a ikpa la, hide a hanma kwagh ker gedee. Kwagh ne kpiligh mo iyol kpishi! Maa m hingir u fan er Mbashiada ve dondon atindiakaa a Bibilo yô. Mo vea Evija se za hemen u henen Bibilo, nahan ken inyom i 1997 la, i er se batisema, se hingir Mbashiada mba Yehova.

Azende am agen kpe, sha ci u ayem a ve gbaan sha mbaagugu sha ihyundu la. Er m lu henen Bibilo yô, m va hingir u kaven mer m ngu a tom u eren sha ci u Yehova, u̱ a ne se uma la. Mkav la yange yima uma wam.

Mo vea Evija yange se zua a ian i civirigh i eren tom shin afishi a branci a Mbashiada mba Yehova a ken gar u Riga la anyom anyiin. Hegen ne, se mba yesen wan wase u kwase, Alise saan saan shi wasen un er a lu vesen ne ser, Yehova a doo un ishima. Shi m zua a ian i civirigh igen, i hanma kasua yô, ka m tôô iyange i môm m za sôr umato kua akaa agen hen afishi a geman kwagh. Saan mo iyol kpishi er m lu eren tom u injaa a mfe u yange m zua a mi iyev la nahan! Sha kpôô yô, zan zan hegen kpa, m ngu soghon kwagh avegher avegher shi hiden kangen her.

Ian i civirigh i mo man tsombor wam se lu a mi i pasen ior kwagh u un u a lu Aôndo u mimi tswen la gbam kwagh tsung. M wuese kwagh u yange m hen ken Bibilo la kpishi. Sha kpôô yô, ityendezwa i tar u he u paradiso la gema uma wam!