Ku ka kwagh u doon ga. Ior kpishi mba soon u lamen sha kwagh u kuugh ga. Nahan kpa, ku ua fatyô u tseren hanmô wase cii, a lu hegen gayô ken hemen. Soho u kuugh vihi kpen kpen shi u nyoon kpaa.

Ku u ormaren wase shin or u se vese, shin wan wase cii ngu nenge u van se abur abur. Ku ua fatyô u tseren se kpoo shin se nyôr ken mlu u una za a vese zan zan a za due ken ku yô. A̱ lu nyi je ia er kpa, se fatyô u palegh mnyoon u ku ka u va a mi la ga, shi ka u er i kunda iyol.

Orgen u ter na yange kpe ku u aikyôr yô, mba yer un ér Antonio, a pase wener: “Ka inja er or va senda u ya, yem a amakuli nahan. Gbenda ngu u u fatyô u hiden va nyôron hen ya la ga. Ka u mase nengen a ya wou ken ishima tseegh tsô. Kpa ka kwagh u vihin u u va tagher a mi je ne. Ka u er ka mnyam ciem nahan, sha ci u kwagh shon er vihi kpishi, kpa kwagh ngu u ú er ga.”

Kwase ugen mba yer un ér Dorothy, un kpa yange imba kwagh ne er un; nom na kpe undu un shighe u lu anyom 47 la, nahan a kange ishima ér una ker mbamlumun sha akaa agen a a tsume un sha kwagh u kuugh yô. Er tesen ken Makeranta u Iyange Memen yô, mayange a nenge ér or ka nana kpe yô, kwagh u nan bee je ve ga. Nahan kpa, gema fa kwagh u ngu a er or shighe u nan kpe la jighilii ga. Nahan a pine Pastô na u ken côôci i Anglican la ér: “Ka nyi ka i er se shighe u se kpe laa?” Pastô la gema kaa a na ér: “Or môm kpa fa jighilii ga. Se kpe tsô se fa.”

Inja na yô, se mba a kwagh u eren ga, saa se “kpe tsô se fa” shinii? Ma gbenda ngu u se kar ve se fa ser mimi je, or ka nana kpe kpa kwagh u nan bee ga yôô?