M vese hen gar u Los Angeles, ken kpentar u California, ken tar u Amerika, hen atô u mbayev mba man mcimbim ma bom shi eren agboro sha ugodobi. I mar se se lu ataratar, mo m lu wan u sha uhar.

Ngôm yese se ken kwaghaôndo u Mbaprotestanti. Nahan shighe u m lu gumor la, m lu nguhar môm ken Kristu, ku gen ken tar. M nyôr atsam, nahan m waan atsam vea mbaatsamev ken adua sha iyange i Lahadi. Ayange agen cii, m shi sha u zan uiniôngo, man mcimbim shi m eren jimba.

M lu a ityoronshima, nahan hanma kwagh cii m tôô m nôngo num a mi mer me hemba. Ityesen i kwaghaôndo wam la wasem ga. Yange m kaa mer, “Iyevoron ka i Ter, m gema m ngu ikyagh ki numugh nav.” Shighe u m lu ken makeranta, ken mbee u kwavanyom u 1960 la, m dondo ieren i mbapatii mba i yilan ve ér Black Panthers, mba ve eren ayôôso kpoghuloo sha kwagh u ian i ior ve lu a mi i eren kwagh u ve soo la yô. Nahan m nyôr mzough u mbayevmakeranta u suen kwagh ne. Ashighe kpishi se er ayôôso ken makeranta, nahan i cir makeranta anshighe a wa karen.

Er m lu a ityoronshima yô, ayôôso a eren yinan mo. Nahan mo kpa m hii u eren akuraior agen a m kôr a ihyom la afer. U tesen ikyav yô, shighe ugen la mo vea azende am se za nenge ufiim mba ve tese atsan a yange i er ior i Afrika mba i kôr ve ikpan ken tar u Amerika la yô. Kwagh la na ishima vihi se, nahan se hii u gbidyen ior-nyian hen ijiir i tesen fiim la je. Maa se due se gba zenden hen ikyasen la keren ior-nyian mbagenev se gbidye.

Shighe u m zulum anyom ikyundu la, mo vea anmgbianev av mba nomso cii se lu eren aferakaa kpoghuloo. Nahan udasenda soo u kôron se wuhen. Anmgbian wam u kiriki ugen yange nyôr nongo u mbaaferev ugen, nahan m luun vea ve. Yange m lu saan ishe gban a gba kera.

Mbamaren mba ijende yam igen lu Mbashiada mba Yehova. Yange ve lôhôm mbamkombo vev. Sha iyange i m hii zan la je, m nenge er Mbashiada ve lu kposo a Mbakristu mbagenev cii yô. Hanma or lu a Bibilo shi nan lu bughun nengen ker. Agumaior kpa na akaaôron! Yange doom kpishi er m fa mer Aôndo ngu a iti ér Yehova, shi i lu yilan i kpaa  yô. (Ekesodu 6:3) Ior mba ken tiônnongo la lu mba ve due ken akuraior kposo kposo yô, kpa ikyav tese wang ér ve lu eren kwagh u mbavia a mbavia ga.

Yange m soo u henen Bibilo vea Mbashiada sha hiihii la ga, kpa m gema m soo u zan mbamkombo vev. Tugh mbu gen la, m nyôr mkombo vea Mbashiada, nahan azende am agen yem u za nengen amar mape. Maa ve za gbidye gumor ugen her, u venda u nan ve jakeeti na i sha ikyôvor ki inyamegh yô, ve wua je. Sev mbu aven yô, ve lu lamen dang sha kwagh shon. I lu ôron ve ijir ken koti sha ikyaa shon je kpa, ve wa ikyo ga. Mbagenev kpishi ken a ve, i kure ve ijir ér ve tsa ken purusu zan zan ve kar kpen. Yange saan mo iyol kpishi er m lu a ve imôngo hen tugh mbura ga yô. M kaa ken ishima mer me de uma la me hii u henen Bibilo.

Er m lu vea ior mbakôron akuraior agen ihyom gbem yô, m nenge ieren i Mbashiada kpiligh mo iyol. Ikyav i tesen yô, Orshiada ugen u lu or-nyian yô lu zan zende ken tar ugen, nahan wa ônov nav unyiin sha ikyev i or-il ugen maa yem. Shi tsombor u or-nyian ugen na or-il ugen ijiir i tsan hen ya ve. Yange m na jighjigh mer ieren i Mbashiada mba Yehova zua sha mkaanem ma Yesu ma ken Yohane 13:35 man vough: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” Yange m fa je mer, m zua a anmgbianev mba mimi.

Er m lu henen Bibilo la, m hii u nengen mer gba u me gema mhen wam. Nahan m kange ishima mer me eren kwagh ken bem, shi m nenge mer ka kwagh u i hembe doon u me er je la. (Mbaromanu 12:2) M lu nôngon eren akaa ne kure kure. Ken uwer u Janawari 1974 la, i erem batisema m hingir Orshiada u Yehova.

Shin er m er batisema nahan kpa, gba u me za hemen u kighir ityoronshima yam la. Ikyav i tesen yô, shighe ugen la m lu pasen kwagh sha uya uya, maa orgen va iim redio shin mato, tsô m cir a na. M za zulum a na u me kôr un yô, pase redio gba, yevese yem. M va ngur ôron anmgbianev yô, ortamen ugen pinem ér: “Stephen, wea ker or la nahan, ma u er a na nena?” Mpin la yange na m seer henen kwagh shi wasem u nengen er i doo u me za hemen u eren kwagh ken bem yô.

Ken uwer u Oktoba 1974 la, m hii u eren tom u, tesen ior Bibilo ahwa 100 ken hanma uwer. Shighe kar yô, m na iyol yam u za eren tom shin afishi a shin itine a Mbashiada mba Yehova, ken Brooklyn, New York. Ken inyom i 1978 la, m hide hen gar u Los Angeles u va nengen sha ngôm zum u lu dedoo ga yô. Anyom nga kar ahar yô, m vôso Aarhonda, kwase wam u doon mo ishima. Yange wasem se nenge sha ngôm zan zan kar kpen. Shighe kar yô, mo vea Aarhonda se za Makeranta u Watchtower u Gileadi la, maa i tindi se ken tar u Panama, ape se lu eren tom u mishen zan zan nyian la.

Hii shighe u m er batisema la je, m tagher a akaa kpishi a mea ker iyol tsaha ga ma m er ipila yô. Kpa m hen u keren bem, nahan or ka nana bamem kpa, m kar sha ving. Kwase wam kua ior mbagenev kpishi wuese mo sha kwagh ne. Mo iyol yam kpa kpiligh mo iyol! Ka sha tahav av m hingir nahan ga. Kpa m na jighjigh mer kwagh ne tese er Bibilo i lu a tahav mbu geman or yô.—Mbaheberu 4:12.

Bibilo tesem kwagh u injaa u me er a uma wam yô, kua u eren kwagh ken bem sha mimi. M kera gbidyen or ga, ka m wasen a wase ior mer ve fa Aôndo sha er a saan ve iyol yô. Orgen u yange kôron ihyom ken makeranta je kpa m hen Bibilo a na. Shighe u i er un batisema kera yô, se tsa ken iyou i môm anshighe wa karen. Se mba ijende zan zan nyian. Mo vea kwase wam se hila hen Bibilo a iorov mba hemban 80, se wase ve ve hingir Mbashiada mba Yehova.

M wuese Yehova kpishi er a wasem m zough a kwagh u injaa ken uma wam shi i saan mo iyol kpishi hen atô u anmgbianev mba mimi yô.