1931-НҖИ йылың яз айларыды. Мешхур Плейел концерт залының гирелгесинде 23 юртдан гелен мыхманлардан яңа аяк басара ер ёкды. Улы такси улаглары гөрнүкли ёлагчыларыны залың өңүнде дүшүрйәрдилер ве тизден меркези зал 3 мүңе голай адамдан долды. Олар концерт гөрмәге дәл-де, шол дөвүрде вагыз ишине ёлбашчылык эден Җозеф Рутерфорд доганы диңлемәге гелипдилер. Онуң тәсирли нутуклары француз, немец ве поляк диллерине терҗиме эдилйәрди. Рутерфорд доганың батлы сеси тутуш залың ичине яңланярды.

Парижде гечирилен бу конгрес Францияның вагыз ишини дүйбүнден өзгертди. Рутерфорд доган дүрли юртдан гелен месихчилери, эсасанам, яшлары Францияда китап пайлаян, ягны пионер болуп гуллук этмәге хөвеслендирди. Етгинҗек вагты шол конгресе гатнашан Җон Кук атлы иңлис доган «Яшлар, пионер болуп гуллук этмәге сизе гөк астында хич зат пәсгел бермесин!» диен толгундырыҗы чагырышы хич вагт ятдан чыкармандыгыны айдяр *.

Соңра миссионер гуллугына башлан Җон Кук доган ялы башга-да көп доган-уялар «Македония гелмек» барадакы чагырыша сеслендилер (Рес. иш. 16:9, 10). Нетиҗеде, Франциядакы пионерлериң саны 1930-нҗы йылда 27-ден 1931-нҗи йыла ченли 104-е етди; бир йылың ичинде шейле өсүшиң болмагы дийсең хайран галдыряр. Эмма шол пионерлериң көпүси француз дилинде гепләп билмейәрди. Онда олар дил билен баглы кынчылыклара, етер-етмезчилиге ве екелик дуйгусына нәдип дөз гелдилер?

Дашары юртдан гелен пионерлер Патышалык барадакы хабары карточкалар аркалы вагыз эдйәрдилер, себәби бу олара говы көмек эдйәрди. Парижде батыргайлык билен вагыз эден бир немец доган шейле ятлаяр: «Биз Худайымызың гудратының гүйчлүдигини билйәрдик. Вагыз эденимизде адамлардан горкымыз болмаса-да, „Шу карточканы окамагыңызы хайыш эдйәрис“ диен сөзлери ятдан чыкарарыс өйдүп, йүрегимиз агзымыза гелйәрди. Эмма биз эдйән ишимизиң өрән ваҗыпдыгына дүшүнйәрдик».

Көп отаглы җайларың гаравуллары көпленч вагыз этмәге гелйән пионерлери ковярдылар. Бир гезек гапыда отуран гаравулларың бири гахарланып, французча говы билмейән ики саны иңлис уядан кими гөрмәге гелендиклерини сораяр. Шонда уяларың бири гаравулың гахарыны көшешдирҗек болуп дурка, гапының йүзүндәки язга гөзи дүшйәр. Онда: «Гапының җаңыны басың» диен сөзлер барды. Уя бу өй эесиниң адыдыр дийип пикир эдйәр-де, бегенип: «Биз „Гапының җаңыны басың“ диен ханымы гөрмәге гелдик»  диййәр. Шол ыхласлы пионерлер бу ягдайдан говы дегишме билен баш алып чыкярлар.

1930-нҗы йылларда Франциядакы адамларың көпүси, шол санда дашары юртдан гелен пионер доган-уялар хем гарып яшаярдылар. Иңлис дилинде геплейән Мона Бзоска уя пионер ёлдашы билен башдан гечирен вакаларыны ятлап, шейле диййәр: «Бизиң яшаян еримиз гаты йөнекейди ве гышың гүни отагы йылатмак улы алада болярды. Өйүмиз гаты совук болансоң, биз ирден эл-йүзүмизи ювмак үчин көпленч күрүшгедәки сувуң йүзүнден бузлары дөвүп айырмалы болярдык». Шол пионерлер аматлы шертлерде яшамаяндыгы үчин рухдан дүшдүлерми? Элбетде, ёк! Оларың бири өз дуйгусыны ики сөзде беян эдип: «Бизиң артык задымызам, кем задымызам ёкды» диййәр (Мат. 6:33).

Шейле-де бу батыргай пионерлер екелик дуйгусына гаршы гөрешмели болярдылар. 1930-нҗы йылларың башында Франциядакы вагызчыларың саны 700-ден көп дәлди ве оларың энчемеси юрдуң дүрли күнҗегине уградылды. Бу пионерлере шатлыгыны йитирмезлиге нәме көмек этди? Пионер ёлдашы билен шейле кынчылыга душ гелен Мона уя: «Биз екелик дуйгусыны еңмек үчин, Җемгыетимизиң эдебиятларыны ызыгидерли окаярдык. Шол дөвүрде бизиң икиленч идеглеримиз ве Мукаддес Язгылар окувымыз болмансоң, агшамларына машгаламыза, эсасанам, бейлеки пионерлере хат язып, вагызда болан гызыклы вакалары гүррүң берйәрдик ве бири-биримизи рухландырярдык» дийип ятлаяр (1 Сел. 5:11).

Шол җанаямаз пионерлер кынчылыклара гарамаздан, догры гарайшы сакладылар. Муны оларың Францияда пионер болуп гуллук эденлеринден бирнәче йыл геченсоң, филиала язан хатларындан хем гөрсе боляр. 1931—1935-нҗи йылларда янёлдашы билен Францияның әхли ерине айланып, вагыз эден Энни Крегин атлы месх эдилен уя гечмишине сер салып, шейле диййәр: «Биз өрән багтлы яшаярдык ве дурмушымыз гызыклы вакалардан долуды! Пионерлер хөкмүнде биз агзыбир топардык. Павлус ресулың айдышы ялы, „Мен экдим, Аполлос суварды, йөне өсдүрйән Худайдыр“. Энчеме йыл мундан озал адамлара көмек этмәге гатнашанымызда, бу сөзлериң бизиң дурмушымызда ерине етендигине дийсең бегенйәрис» (1 Кор. 3:6).

Шол пионерлер Худая көпрәк гуллук этмек ислейән доган-уялара чыдамлы ве ыхласлы болмак бабатда аҗайып гөрелде галдырдылар. Шу гүнлер Францияда 14 мүңе голай умумы пионер бар. Көп доган-уялар башга дилде гечирилйән топарларда ве йыгнакларда гуллук эдйәрлер *. Өңки йылларда гуллук эден доган-уялар ялы, олар хем вагыз этмегине гөк астында хич бир задың пәсгел бермегине ёл бермейәрлер! (Франциядакы архивимизден).