Сиз машгалаңызы багтлы этмәге җан этсеңиз-де, гарашылмадык ягдай йүзе чыканда, шатлыгыңызы йитирмегиңиз мүмкин (Вагыз китабы 9:11). Биз кынчылыга учрасак-да, Худай бизе сөйги билен көмек эдйәр. Эгер Мукаддес Язгыларың принциплерине эерсеңиз, сиз ве машгалаңыз хатда агыр кынчылыклара-да дөз гелмеги башарарсыңыз.

МУКАДДЕС ЯЗГЫЛАРДА НӘМЕ ДИЙИЛЙӘР: «Әхли гам-гуссаңызы Онуң үстүне атың, себәби Ол сизиң гамхорыңыздыр» (1 Петрус 5:7). Кынчылыга учраныңызда, Худайы гүнәкәрлемели дәлдигини хич хачан унутмаң (Якуп 1:13). Сиз Худая якынлашсаңыз, Ол сизе иң говы көмеги берер (Ишая 41:10). Шонуң үчин Худая «йүрегиңизи дөкүң» (Зебур 62:8).

Сиз хер гүн Мукаддес Язгылары окасаңыз, гөвнүңиз гөтерилер. Сиз Ехованың «бүтин теселлилер Худайыдыгына» гөз етирерсиңиз (2 Коринтослылар 1:3, 4; Римлилер 15:4). Ол сизе «хер хили дүшүнҗеден ёкары болан Худайың парахатчылыгыны» берҗекдигини вада берйәр (Филипилилер 4:6, 7, 13).

МАСЛАХАТ

• Калбыңыз рахат болуп, догры пикирленип билер ялы Ехова дога эдиң

• Хәзирки ягдайыңызда нәме эдип билҗекдигиңиз хакда ойланып, шоңа гөрә бир карара гелиң

МУКАДДЕС ЯЗГЫЛАРДА НӘМЕ ДИЙИЛЙӘР: «Пайхаслы адам билим газаняндыр; акылдарың гулагы билим агтаряндыр» (Сүлейманың тымсаллары 18:15). Сизиң ягдайыңыз билен багланышыклы әхли зады билиң. Машгалаңызың хер бир агзасына нәме герекдигине дүшүниң. Мунуң үчин олар билен геплешиң ве олары диңләң (Сүлейманың тымсаллары 20:5).

Эгер доган-гарындашлардан бири арадан чыкан болса, гынаняндыгыңызы гөркезмәге чекинмәң. Хатда Исаның хем «агландыгыны» унутмаң (Яхя 11:35; Вагыз китабы 3:4). Шейле-де етерлик дынҗыңы ве укыңы алмак ваҗып (Маркус 6:31). Шонда гам-гуссаңыз еңиллешер.

МАСЛАХАТ

• Эгер машгала агзаларыңыз өзара геплешмеги эндик эдинен болсалар, хатда бетбагтчылык болса-да, олар сиз билен аркайын гүрлешип билерлер.

• Шейле ягдайы башындан гечирен адамлар билен геплешиң

МУКАДДЕС ЯЗГЫЛАРДА НӘМЕ ДИЙИЛЙӘР: «Дост хер вагт сөййәндир; доган болса аладалы гүн үчин догландыр» (Сүлейманың тымсаллары 17:17). Достларыңыз сизе көмек этмек ислеселер-де, белки, олар нәдип көмек этҗекдигини билйән дәлдирлер. Шонуң үчин олара өзүңизе нәхили көмек герекдигини айтмага чекинмәң (Сүлейманың тымсаллары 12:25). Шейле-де Мукаддес Язгыларың принциплерине эерип билер ялы, оңа дүшүнйән адамлардан көмек сораң. Оларың Мукаддес Язгыларың эсасында берйән маслахатлары сизе көмек эдер (Якуп 5:14).

Сиз Худая ынанян ве вадаларына бил баглаян адамлар билен ызыгидер гүррүңдеш болсаңыз, өзүңизе герекли көмеги аларсыңыз. Шейле-де сиз көмеге мәтәч адамлара гөвүнлик берсеңиз, калбыңызда рахатлык дуярсыңыз. Олара Ехова ве онуң вадаларына ынаняндыгыңызы гүррүң бериң. Мәтәч адамлара көмек этмеги довам эдиң ве сөйги билен аладаңызы эдйән адамлардан өзүңизи четде тутмаң (Сүлейманың тымсаллары 18:1; 1 Коринтослылар 15:58).

МАСЛАХАТ

• Якын достларыңыз билен геплешиң ве оларың көмегини кабул эдиң

• Өзүңизе нәме көмек герекдигини ачык айтмага чекинмәң