Dördünji Musa 25:1—18
25 Ysraýyllar Şitimde+ ýaşaýarka, mowap gyzlary bilen ahlaksyzlyk edip başladylar+.
2 Mowap gyzlary öz taňrylaryna gurbanlyk berende, ysraýyllary hem çagyrdylar+. Ysraýyllar olaryň gurbanlyklaryndan iýip, taňrylaryna sežde edip başladylar+.
3 Pegor Bagalyna sežde edip+ başlany üçin, Ýehowanyň ysraýyl halkyna gahary geldi.
4 Ýehowa Musa: «Şu zatlaryň başyny başlan adamlary öldür-de, gündiziň güni Ýehowanyň öňünde asyp goý. Şonda Ýehowanyň gazaby sowlar» diýdi.
5 Musa ysraýyl kazylaryna+: «Gidiň-de, Pegor Bagalyna sežde eden dogan-garyndaşlaryňyzy öldüriň»+ diýdi.
6 Ysraýyl jemagaty ýygnak çadyrynyň* agzynda dady-perýat edip durka, ysraýyllardan bir adam Musanyň we tutuş halkyň gözüniň alnynda midýan aýaly+ düşelgä getirdi.
7 Şonda Harun ruhanynyň agtygy, Algazaryň ogly Pinehas+ dessine ýerinden turdy-da, eline naýza alyp,
8 ýaňky adamyň yzyndan çadyra girdi. Pinehas olaryň ikisini-de naýzadan geçirip, naýzany midýan aýalyň garnyna* sokdy. Şonda ysraýyllaryň arasyndaky gyrgynçylyk togtady+.
9 Şol gyrgynçylykda 24 000 adam heläk bolupdy+.
10 Ýehowa Musa:
11 «Harun ruhanynyň agtygy, Algazaryň ogly Pinehas+ ysraýyllara lowlan gaharymy ýatyrdy. Ysraýyllar ýürekden wepaly bolmasa-da*+, Pinehasyň hatyrasyna olary bütinleý ýok etmedim. Halk başga taňrylara sežde etdi, emma Pinehas beýle biwepalyga göz ýummady*+.
12 Pinehasa aýt, men onuň bilen parahatlyk ähtini baglaşjak.
13 Şol ähte görä, Pinehas bilen nesilleri hemişe ruhany bolup hyzmat eder+. Halk başga taňrylara sežde etse-de, Pinehas Hudaýa biwepalyk edilmegine göz ýummady*+, ysraýyllaryň günäsini ýuwdy» diýdi.
14 Midýan aýal bilen öldürilen adam Saluwyň ogly, şimgonlaryň baştutany Zimridi.
15 Öldürilen midýan aýalyň ady bolsa Kozbidi. Kozbi midýan+ tireleriniň baştutany Zuruň+ gyzydy.
16 Biraz wagtdan Ýehowa Musa:
17 «Midýanlaryň üstüne çozup, derbi-dagyn ediň+.
18 Olar sizi günüňize goýmadylar, hile bilen Pegor taňrysyna sežde etdirdiler+. Midýan baştutanynyň gyzy Kozbi sebäpli başyňyza betbagtçylyk getirdiler. Pegor taňrysyna sežde edeniňiz üçin, size jeza berenimde, Kozbi öldürilipdi»+ diýdi.
Çykgytlar
^ Ýa-da: jyns agzasyna.
^ Ýa-da: Ysraýyllardan diňe özüme wepaly bolmagy talap etsem-de.
^ Ýa-da: çydap bilmedi.
^ Ýa-da: çydap bilmedi.
