Mukaddes Kitabyň Ylham kitabynyň grek dilindäki «Apokalipsis» diýen ady «aýan etmegi» ýa-da «äşgär etmegi» aňladýar. Bu at Ylham kitabynyň adynyň näme aňladýandygyny görkezip, onda gizlin syrlar we ýazylanyndan köp ýyl geçensoň boljak wakalar aýan edilýär. Ondaky pygamberlikleriň köpüsi entek doly ýerine ýetmedi.

Ylham kitabynyň mazmuny

•   Giriş (Ylham 1:1—9).

•   Isa pygamberiň ýedi ýygnaga ýazan hatlary (Ylham 1:10—3:22).

•   Hudaýyň gökdäki tagtynda oturan görnüşi (Ylham 4:1—11).

•   Yzly-yzyna utgaşýan görnüşler:

  •   Ýedi möhür (Ylham 5:1—8:6).

  •   Ýedi surnaý, soňky üç surnaýyň çalynmagy üç betbagtçylygyň boljakdygyny aňladýar (Ylham 8:7—14:20).

  •   Ýedi käse, olaryň hersindäki bela Hudaýyň ýer ýüzüne dökjek hökümini aňladýar (Ylham 15:1—16:21).

  •   Hudaýyň duşmanlarynyň ýok ediljekdigi baradaky görnüşler (Ylham 17:1—20:10).

  •   Hudaýyň gökde we ýer ýüzünde etjek ajaýyp işleri baradaky görnüşler (Ylham 20:11—22:5).

•   Netije (Ylham 22:6—21).

Ylham kitabynyň manysy

1.   Bu kitapdaky sözler Hudaýa gulluk edýän adamlary gorkuzmaýar, gaýtam, umyt berýär. «Apokalipsis» sözüni eşidenlerinde köp adamlaryň uly betbagtçylyk göz öňüne gelýär. Emma Ylham kitabynyň başyndan ahyryna çenli aýdylýan zatlar ony okaýan, düşünýän we şoňa görä ýaşaýan adamlara köp peýda getirýär (Ylham 1:3; 22:7).

2.   Ylham kitabynda göni manyda düşünip bolmaýan birnäçe «alamatlar» ýa-da görnüşler ulanylýar (Ylham 1:1).

3.   Ylham kitabyndaky gahrymanlaryň we alamatlaryň köpüsi Mukaddes Kitabyň beýleki kitaplarynda-da agzalýar:

   •   Ýehowa «gökdäki» hak Hudaý we ähli zadyň Ýaradyjysy (5 Musa 4:39; Zebur 103:19; Ylham 4:11; 15:3).

   •   Isa Mesih «Hudaýyň Guzusy» (Ýahýa 1:29; Ylham 5:6; 14:1).

   •   Şeýtan Iblis Hudaýyň duşmany (1 Musa 3:14, 15; Ýahýa 8:44; Ylham 12:9).

   •   Beýik Wawilon — gadymy Wawilon şäheri ýaly, Ýehowa Hudaýyň we onuň halkynyň duşmany hem-de ýalan dinleriň dörän ýeri (1 Musa 11:2—9; Işaýa 13:1, 11; Ylham 17:4—6; 18:4, 20).

   •   «Deňiz» — Hudaýa garşy çakýan zalym adamlar (Işaýa 57:20; Ylham 13:1; 21:1).

   •   Gadymy döwürde mukaddes çadyrda Hudaýa sežde etmek üçin ulanylýan zatlar: äht sandygy, aýnadan ýasalan deňze meňzeş bir zat (ýuwunmak üçin legen), çyralar, ýakymly ysly tütetgi, gurbanlyk sypasy (2 Musa 25:10, 17, 18; 40:24—32; Ylham 4:5, 6; 5:8; 8:3; 11:19).

   •   Wagşy haýwanlar — ynsan hökümetleri (Danyýar 7:1—8, 17—26; Ylham 13:2, 11; 17:3).

   •   Göçme manyda ulanylýan sanlar (Ylham 1:20; 8:13; 13:18; 21:16).

4.   Ylham kitabyndaky görnüşler «Halypamyzyň güni», ýagny 1914-nji ýylda Hudaýyň Patyşalygynyň berkarar bolmagy we Isa Mesihiň patyşalyk edip başlamagy bilen baglanyşyklydyr (Ylham 1:10). Şol sebäpli biz bu kitapda aýdylýan zatlaryň köpüsiniň biziň günlerimizde ýerine ýetjekdigine ynamly bolup bileris.

5.   Biz Mukaddes Kitabyň beýleki kitaplary ýaly, Ylham kitabyndaky aýdylýan zatlara-da düşünip bileris. Munuň üçin biz Hudaýdan akyldarlyk dilemeli we Mukaddes Kitaba gowy düşünýän adamlardan kömek soramaly (Resullar 8:26—39; Ýakup 1:5).