Ko Lepeka ko he fafine na alofa ki a Ieova. Ko te igoa o tana āvaga ko Ihaako. Na alofa foki ia ki a Ieova. Na fetaui vēhea ia Lepeka ma Ihaako? He ā te auala na fakafiafia ai e ia ia Ieova? Ke akoako atili ki tatou e uiga ki a te ia.

Ko nā mātua o Ihaako ko Apelaamo ma Hala. Na nonofo ki lāua i Kanana, ko he fenua e hē tāpuaki ai nā tino ki a Ieova. Kae na fofou ia Apelaamo ke āvaga tona ataliki ki he fafine e tāpuaki ki a Ieova. Ko tēnā lā, na uga atu ai tana kaukauna, hōvē ko Elihaia, ke hakili he āvaga ma Ihaako i te kogāfenua e takua ko Kalana, te fenua e nofo ai iētahi kāiga o Apelaamo.

Na malaga fakatahi ia Elihaia ma iētahi kaukauna a Apelaamo. Na mamao lele te malaga. Na kave e ki latou ni kamela e hefulu e uta ai ni meakai ma ni meaalofa. E iloa vēhea e Elihaia, pe ko ai te fafine ka filifili mo Ihaako? I te taimi na pa atu ai ia Elihaia ma iētahi kaukauna ki Kalana, na mālōlō ki latou i he vaikeli auā na iloa e Elihaia e i ei nā tino e toeitiiti ōmamai ke maua ni vai. Na tatalo ai ki a Ieova ma taku atu: ‘Kāfai e fehili atu au ki he fafine talavou ke foki mai ki a te au ni vai ma foki mai ni vai mo aku kamela, ka iloa e au ko te fafine tēnei kua filifili e koe.’

Mulimuli ake na hau ai Lepeka ki te vaikeli. E lea mai te Tuhi Paia ko ia e gali lele. Na fehili atu Elihaia mo he vai ke inu, ma  lea mai ia: ‘Kua lelei. Ka foki atu ki a te koe te vai ma kaumai he vai mo nā kamela.’ Ke mafaufau ki ei! Ko nā kamela e inu lahi ki te vai, ko tēia lā na fano ma toe fano ia Lepeka ki te vaikeli. E kē kitea i te ata te galue mamafa o ia?​— Na ofo ia Elihaia ki te auala na tali ai e Ieova tana tatalo.

E lahi nā meaalofa gali na foki atu e Elihaia ki a Lepeka. Na valakaulia e Lepeka Elihaia ma iētahi kaukauna ki te fale o tona kāiga. Na fakamatala e Elihaia te mafuaga na uga atu ai ia e Apelaamo ma te auala na tali ai e Ieova tana tatalo. Na fiafia te kāiga ke āvaga ia Lepeka ki a Ihaako.

Kae ko he ā tō manatu, pe na fofou ia Lepeka ke fakaipoipo ki a Ihaako?​— Na iloa e Lepeka na uga atu Elihaia e Ieova. Ko tēia lā, i te taimi na fehili atu ai te kāiga o Lepeka pe kua fofou ia ke fano ki Kanana ke fakaipoipo ki a Ihaako, na lea atu vēia: ‘Io, ko au e fia fano.’ I te taimi lava tēnā, na olo fakatahi ai ma Elihaia. I te taunukuga o ki lāua ki Kanana, na fakaipoipo Lepeka ki a Ihaako.

Ina kua fai e Lepeka te mea na fofou Ieova ke ia faia, nā fakamanuia ai ia e Ieova. Mulimuli ake, i ni tauhaga kua leva, na fānau mai ia Iehu mai tona kāiga! Kāfai ko koe e vē ko Lepeka ma fakafiafia Ieova, ka fakamanuia atu foki koe.