E hēai ni a matou faifeau e totogi i te matou fakalāpotopotoga. Nai lo tēnā, e vē ko te kamataga o te fakapotopotoga Kelihiano, ko nā toeaina tauhi e auhia ma tofia ke kavea ma “leoleomāmoe o te Ekalehia a te Atua.” (Galuega 20:28) Ko nā toeaina iēnei ko ni tāne matutua fakateagaga e leoleo ki latou i te fakapotopotoga ma ko ni leoleo-mamoe, “nahe faia ma he loto hē kātoatoa. Ke kavea tautou tautua ko he mea e fofou moni koutou ke koutou faia, kae nahe vē ko he mea ke maua ai ni autou tupe.” (1 Petelu 5:​1-3) He ā te latou galuega e fai mo ki tatou?

E manatu mamafa ma puipui ki tatou. Ko nā toeaina e takitaki ma fehoahoani ki te puipuiga fakateagaga o te fakapotopotoga. E malamalama ki latou kua tuku atu e te Atua te tulaga tāua tēnei, e hē fia pule malohi nā toeaina ki nā tino o te Atua, i lo tēnā, e fehoahoani atu ki te ola lelei ma te fiafia o ki tatou. (2 Kolinito 1:​24) E vē ko te tokaga o he leoleo-mamoe oi tauhi ana mamoe takitahi, ko nā toeaina e taumafai ke iloa nā tino takitahi o te fakapotopotoga.​—Fataoto 27:23.

E akoako mai ki matou e ki latou i te auala e fai ai te finagalo a te Atua. I nā vaiaho takitahi, e tauhi lelei e nā toeaina nā hauniga o te fakapotopotoga ke fakamalohi ai to tatou fakatuatua. (Galuega 15:32) Ko nā tāne iēnei e tuku katoatoa atu ma takitaki foki ki tatou i te galuega tālaki, e galulue ma koleni tatou i nā vaega uma o te tālakiga.

E fōki mai e ki latou te fakalotomalohi totino. E manatu mamafa mo nā manakoga fakateagaga o ki matou tautokatahi, hōvē e ahiahi mai nā toeaina ki o matou kāiga pe ko te Fale o Hauniga ke kavatu he fehoahoani ma ni fakamafanafanaga mai nā Tuhituhiga Paia.​—Iakopo 5:​14, 15.

E hē gata i to latou galuega tēnei e fai i te fakapotopotoga, kae ko te tokalahiga o nā toeaina e galulue mo ni totogi ma e i ei o latou tiute taukave fakakāiga e fano ki ei te latou taimi ma te taukikilaga. E tatau oi fakaali atu ki ei to tatou fakaaloalo ki nā uho galulue lelei iēnei.​—1 Tehalonia 5:​12, 13.

• Ko he ā te tiute o nā toeaina o te fakapotopotoga?

• Ko ni ā nā auala e fakaalia e nā toeaina te fiafia totino ki a te ki tatou?