“Ke rolela batho ba lona hutshe ka gonne ba rata go direla Bogosi Jwa Modimo ka dipelo tsa bone tsotlhe. Re lebogela matsapa a magolo a lo a tsayang go thusa badumedi mmogo le lona le batho ba bangwe.”

Ao ke mafoko a a mo lekwalong le le neng la kwalwa ke ratoropo ya Atlanta, Georgia, U.S.A. e bong Kasim Reed. O ne a amogela Basupi ba ga Jehofa ba ba neng ba tlile go tshwara dikopano tse dikgolo di le tharo mo toropong eo.

Khansele ya Toropo ya Atlanta le yone e ne ya bolela fa e amogela batlakopanong botlhe. E ne ya re: “Go na le Basupi ba ga Jehofa ba ka nna dimilione di le robedi mo lefatsheng lotlhe, ba ba tswang mo . . . merafeng e e farologaneng e bile ba godisitswe ka ditsela tse di sa tshwaneng, mme gone . . . lotlhe lo kopanngwa ke selo se le sengwe fela . . . [Lo] batla go galaletsa Jehofa, Modimo yo go buiwang ka ene mo Baebeleng yo gape e leng Mmopi wa dilo tsotlhe.”

Dikopano di le tharo di ne tsa tshwarelwa koo ka July le August 2014, tse pedi tsa tsone ka Seesemane mme e le nngwe ka Se-Spain. Batlakopanong ba ne ba tswa kwa dinageng di ka nna 128 mme thulaganyo ya Seesemane e ne ya ranolelwa mo puong ya se-Russia le Sejapane. Palogotlhe ya batho ba ba nnileng gone mo dikopanong tseno tse tharo e ne e le 95 689.

Ka 2014, Basupi ba ga Jehofa ba ne ba tshwara dikopano tse dikgolo tsa boditšhabatšhaba di le 24 mo dinageng di le robongwe, go akaretsa le tse 16 tse di neng tsa tshwarelwa mo mafelong a a farologaneng kwa United States.