“Re ne ra lemoga gore re ratiwa mo go maswe!” Ao ke mafoko a a neng a buiwa ke mosadi mongwe wa kwa Ukraine fa a sena go utlwa lekwalo la botlhokwa le le neng le badiwa ke Stephen Lett wa Setlhopha se se Laolang sa Basupi ba ga Jehofa. Ke mongwe wa Basupi ba le 165 000 ba ba neng ba reeditse Mokaulengwe Lett fa a ne a etetse naga eo ka mafelobeke a May 10 le 11, 2014.

Lekwalo leo mmogo le dipuo tse di theilweng mo Baebeleng, di ne di ranoletswe mo dipuong di le tlhano le go neelwa mo Diholong Tsa Bogosi di ka nna 1 100 tse di neng di gokagantswe ka Internet go ralala Ukraine.

Mo go one mafelobeke ao, Mark Sanderson wa Setlhopha se se Laolang o ne a bala lekwalo leo ka nako ya thulaganyo e e neng e tshwaretswe kwa Russia. Thulaganyo eo e ne e ranoletswe mo dipuong tse 14 mme batho ba le 180 413 go tswa mo diphuthegong di feta 2 500 tsa kwa Belarus le Russia, ba ne ba gokagantswe ka Internet.

Lekwalo leo le le tswang kwa Setlhopheng se se Laolang le ne le kwaletswe diphuthego tsotlhe tsa kwa Russia le Ukraine. Ofisi ya lekala ya kwa Russia e ne ya kwala jaana fa e sena go utlwa Mokaulengwe Sanderson a bala lekwalo leo ka Se-Russia: “Bakaulengwe le bokgaitsadi ba ne ba itumetse tota go bona gore Setlhopha se se Laolang se amegile thata ka bone. Go ne go ntse jaaka e kete Setlhopha se se Laolang se re tlamparetse rotlhe fela.”

Lekwalo leo le ne le kwaletswe go kgothatsa le go nonotsha Basupi ba dinaga tseo tse di neng di wetswe ke dikhuduego tsa sepolotiki. Le ne le rotloetsa bakaulengwe gore ba tswelele ba se “karolo ya lefatshe” ka go se tseye letlhakore mo dikgannyeng tsa dipolotiki.—Johane 17:16.

Gape Setlhopha se se Laolang se ne sa kgothaletsa Basupi gore ba tswelele ba rapela, ba ithuta e bile ba akanya thata ka Lefoko la Modimo gore ba nne ba atamalane thata le Jehofa. Bareetsi ba ne ba gopodiwa gore le fa ba ka lebana le teko epe fela, ba ka tshepa tsholofetso eno ya Modimo e e mo go Isaia 54:17: “Sebetsa le fa e ka nna sefe se se tla bopiwang kgatlhanong le wena ga se kitla se atlega.”

Setlhopha se se Laolang se ne sa konela lekwalo leo ka go re: “Re lo rata fela thata. Tsweetswee tlhomamisegang gore lo nna lo le mo megopolong ya rona le gore re kopa Jehofa gore a lo thuse.”

Ofisi ya lekala ya Basupi ba ga Jehofa ya kwa Ukraine e ne ya bua jaana ka ketelo eo: “Bakaulengwe ba ne ba itumela thata go bona gore Setlhopha se se Laolang se ba rata tota. Go tla ga ga Mokaulengwe Lett le Sanderson mo Ukraine le mo Russia ke bosupi jo bo tlhatswang pelo jwa gore batho ba Modimo ba seoposengwe e bile go bontshitse bakaulengwe gore Jehofa le Jesu ba ba rata fela thata e bile ba amega ka bone. Rotlhe re a dumela gore ba tlile ka nako e e tshwanetseng e bile re nonotshitswe gore re tswelele pele re direla Jehofa go sa kgathalesege mathata ape fela a re kopanang le one.”