Johane wa Ntlha 3:1-24
3 Eleruri Rara o re rata thata,+ mo a ileng a re naya tshiamelo ya go bidiwa bana ba gagwe!+ Mme ke sone se re leng sone. Ke gone ka moo lefatshe le sa re itseng,+ ka gonne ga le ise le mo itse.+
2 Baratwa, jaanong re bana ba Modimo,+ mme gone ga re itse gore mebele ya rona e tla lebega jang mo nakong e e tlang.+ Re a itse gore fa a iponatsa re tla tshwana le ene, ka gonne re tla mmona fela jaaka a ntse.
3 Mme mongwe le mongwe yo o solofelang mo go ene o a iphepafatsa,+ fela jaaka ene yoo a le phepa.
4 Mongwe le mongwe yo o dirang boleo, gape o tlola molao, ka jalo boleo ke go tlola molao.
5 Gape lo a itse gore Jesu o ne a tla gore a tlose maleo a rona,+ mme ga a na boleo.
6 Mongwe le mongwe yo o nnang a le seoposengwe le ene ga a dire boleo;+ ope fela yo o dirang boleo ga a mo itse e bile ga a dumele mo go ene.
7 Bana ba bannye, a go se nne le ope yo o lo tsietsang; motho yo o dirang se se siameng o siame, fela jaaka Jesu a dira se se siameng.
8 Yo o dirang boleo o tswa mo go Diabolo, ka gonne Diabolo o ntse a leofa go tloga kwa tshimologong.*+ Ke gone ka moo, Morwa Modimo a neng a tla gore a tle go senya ditiro tsa ga Diabolo.+
9 Mongwe le mongwe yo e leng ngwana wa Modimo ga a dire boleo,+ ka gonne moya* wa Gagwe o o boitshepo o nna o le mo mothong yoo, mme ga a ka ke a dira boleo, ka gonne ke ngwana wa Modimo.+
10 Bana ba Modimo le bana ba ga Diabolo ba bonala ka seno: Mongwe le mongwe yo o sa direng se se siameng le yo o sa rateng mokaulengwe wa gagwe ga a tswe mo Modimong.+
11 Gonne go tloga kwa tshimologong lo utlwile molaetsa ono, gore re tshwanetse go ratana;+
12 ga re a tshwanela go tshwana le Kaine, yo o neng a tswa mo go Satane* mme a bolaya monnawe.+ Mme goreng a ne a mmolaya? Ka gonne dilo tse a neng a di dira di ne di le bosula,+ mme tse monnawe a neng a di dira di ne di siame.+
13 Bakaulengwe, lo se ka lwa gakgamadiwa ke gore lefatshe le lo tlhoile.+
14 Go ne go ntse jaaka e kete re ne re sule, mme jaanong re a tshela,+ ka gonne re rata bakaulengwe.+ Yo o sa rateng bakaulengwe o sa ntse a le mo losong.+
15 Mongwe le mongwe yo o tlhoileng mokaulengwe wa gagwe ke mmolai,+ mme lo a itse gore ga go na mmolai ope yo o tla nnang le botshelo jo bo sa khutleng.+
16 Re itse lorato, ka gonne Jesu Keresete o ne a re swela,+ mme re patelesega go swela bakaulengwe ba rona.+
17 Le fa go ntse jalo, ope fela yo o nang le dilo tse a itshedisang ka tsone mme a bona mokaulengwe wa gagwe a tlhoka a bo a sa mo tlhomogele pelo, a tota a ka re o rata Modimo?+
18 Bana ba bannye, ga lo a tshwanela go bua fela lo re lo a ratana,+ mme lorato lwa lona lo tshwanetse go bonala ka se lo se dirang+ e bile lo tshwanetse go nna lwa boammaaruri.+
19 Re tla itse ka seno gore re tswa mo boammaaruring, e bile re tla itlhatswa pelo gore Modimo o a re rata.
20 Le fa gone dipelo tsa rona di ka re bona molato ka dilo dingwe, a re gopoleng gore Modimo o mogolo go feta dipelo tsa rona e bile o itse dilo tsotlhe.+
21 Baratwa, fa dipelo tsa rona di sa re bone molato, re na le kgololesego ya go bua le Modimo;+
22 mo godimo ga moo, e re ka re ikobela ditaelo tsa gagwe e bile re dira dilo tse di mo itumedisang, o tla re naya sengwe le sengwe se re se kopang.+
23 Eleruri, eno ke taelo ya gagwe: gore re nne le tumelo mo leineng la Morwawe e bong Jesu Keresete+ le gore re ratane+ fela jaaka a re laetse.
24 Mo godimo ga moo, yo o bolokang ditaelo tsa gagwe o nna a le seoposengwe le ene, mme le ene o seoposengwe le motho yoo.+ Mme ka ntlha ya moya o a neng a re naya one, re a itse gore o nna a le seoposengwe le rona.+
Dintlha Tse di Kwa Tlase
^ Kgotsa “go tloga fela fa a ne a simologa.”
^ Seger., “peo.” Go tewa peo e e kgonang go tshola kgotsa e e ungwang.
^ Seger., “yo o boikepo.” Bona Ditlhaloso Tsa Mafoko.
