Baatlhodi 4:1-24
4 Mme fa Ehude a sena go swa, Baiseraele ba ne ba dira se se bosula gape mo matlhong a ga Jehofa.+
2 Ka jalo, Jehofa o ne a ba tsenya* mo seatleng sa ga Jabine kgosi ya Kanana,+ yo o neng a busa kwa Hasore. Molaodi wa masole a gagwe e ne e le Sisera, yo o neng a nna kwa Haroshethe+ wa ditšhaba.*
3 Baiseraele ba ne ba lelela kwa go Jehofa,+ ka gonne Jabine o ne a na le dikara tsa ntwa di le 900 tse di nang le disekele tsa tshipi,*+ mme o ne a gatelela Baiseraele setlhogo+ dingwaga di le 20.
4 Jaanong moporofeti+ Debora, mosadi wa ga Lapidothe, ke ene a neng a itsise dikatlholo tsa Modimo kwa Iseraele ka nako eo.
5 O ne a tle a nne ka fa tlase ga setlhare sa gagwe sa mokolane* fa gare ga Rama+ le Bethele+ mo kgaolong e e dithaba ya Eferaime; Baiseraele ba ne ba tle ba tlhatlogele kwa go ene gore a ba atlhole.
6 O ne a laela gore Barake+ morwa Abinoame a bidiwe kwa Kedeshe-nafetali+ mme a mo raya a re: “A Jehofa, Modimo wa Iseraele ga a ntsha taelo? ‘Tsamaya mme o ye kwa* Thabeng ya Tabore, mme o tseye banna ba le 10 000 ba ga Nafetali le ba ga Sebulone o tsamaye le bone.
7 Ke tla tlisa Sisera, molaodi wa masole a ga Jabine, kwa go wena mmogo le dikara tsa gagwe tsa ntwa le mephato ya gagwe kwa molapong wa Kishone,+ mme ke tla mo tsenya mo seatleng sa gago.’”+
8 Foo Barake o ne a mo raya a re: “Fa o tsamaya le nna, ke tla ya, mme fa o sa tsamaye le nna, ga nkitla ke tsamaya.”
9 Debora o ne a re: “Ruri ke tla tsamaya le wena. Le fa go ntse jalo, letsholo le o yang kwa go lone ga le kitla le go tlisetsa kgalalelo, ka gonne Jehofa o tla tsenya Sisera+ mo seatleng sa mosadi.” Go tswa foo, Debora o ne a ema mme a tsamaya le Barake kwa Kedeshe.+
10 Barake o ne a biletsa Sebulone le Nafetali+ kwa Kedeshe, mme banna ba le 10 000 ba ne ba tsamaya le ene. Debora le ene o ne a tsamaya le ene.
11 Jaanong Hebere wa Mokene o ne a kgaogane le Bakene,+ ditlogolwana tsa ga Hobabe, mogwegadiagwe Moshe,+ mme tente ya gagwe e ne e tlhomilwe gaufi le setlhare se segolo kwa Saananime, e e kwa Kedeshe.
12 Ba ne ba begela Sisera gore Barake morwa Abinoame o ne a tlhatlogetse kwa Thabeng ya Tabore.+
13 Ka yone nako eo, Sisera o ne a phutha dikara tsotlhe tsa gagwe tsa ntwa di le 900 tse di nang le disekele tsa tshipi* le mephato yotlhe e e neng e na le ene, ba tswa mo Haroshethe wa ditšhaba ba ya kwa molapong wa Kishone.+
14 Jaanong Debora o ne a raya Barake a re: “Ipaakanye, ka gonne leno ke letsatsi le Jehofa a tla tsenyang Sisera mo seatleng sa gago ka lone. A Jehofa ga a tsamaye fa pele ga gago?” Mme Barake o ne a fologa mo Thabeng ya Tabore a setswe morago ke banna ba le 10 000.
15 Go tswa foo, Jehofa o ne a tlhakatlhakanya+ Sisera le dikara tsotlhe tsa gagwe tsa ntwa le masole otlhe fa pele ga tšhaka ya ga Barake. La bofelo Sisera o ne a fologa mo kareng ya gagwe mme a tshaba ka dinao.
16 Barake o ne a lelekisa dikara tsa ntwa le masole ao go ya go fitlha kwa Haroshethe wa ditšhaba. Ka jalo, masole otlhe a ga Sisera a ne a wa ka tšhaka; go ne ga se ka ga sala ope wa bone.+
17 Mme Sisera o ne a tshaba ka dinao a ya kwa tenteng ya ga Jaele+ mosadi wa ga Hebere+ wa Mokene, ka gonne go ne go na le kagiso fa gare ga ga Jabine+ kgosi ya Hasore le ba lelapa la ga Hebere wa Mokene.
18 Foo Jaele o ne a tswa a ya go kgatlhantsha Sisera mme a mo raya a re: “Tla kwano morena wa me, tsenela kwano. O se ka wa boifa.” Ka jalo, o ne a tsena mo tenteng ya ga Jaele, mme a mo khurumetsa ka kobo.
19 Go tswa foo, Sisera o ne a mo raya a re: “Tsweetswee, ntshiele metsinyana ka gonne ke nyorilwe.” Ka jalo, Jaele o ne a bula modutwana* wa mashi mme a mo naya gore a nwe,+ morago ga moo a mo khurumetsa gape.
20 Sisera o ne a mo raya a re: “Ema fa kgorong ya tente, mme fa mongwe a tla a bo a go botsa a re, ‘A go na le monna fano?’ o re, ‘Nnyaa.’”
21 Le fa go ntse jalo, Jaele mosadi wa ga Hebere o ne a tsaya sepekere se setona le hamore.* Go tswa foo, fa Sisera a sa ntse a thulametse e bile a lapile, o ne a ya kwa go ene a nanabela a bo a kokotela sepekere seo mo matlhakoreng a tlhogo ya gagwe, a se phunyeletsa fa fatshe, mme Sisera o ne a swa.+
22 Barake o ne a goroga a lateletse Sisera mme jaanong Jaele o ne a tswa a ya go mo kgatlhantsha mme a mo raya a re: “Tla kwano ke go bontshe monna yo o mmatlang.” O ne a tsena mo teng le ene, mme a fitlhela Sisera a rapame a sule, sepekere se setona se phunyeleditse mo matlhakoreng a tlhogo ya gagwe.
23 Ka jalo mo letsatsing leo, Modimo o ne a fenya Jabine kgosi ya Kanana fa pele ga Baiseraele.+
24 Baiseraele ba ne ba nna ba lwa le Jabine kgosi ya Kanana,+ go fitlha ba mmolaya.+
Dintlha Tse di Kwa Tlase
^ Seheb., “rekisetsa.”
^ Kgotsa “Haroshethe-ha-goime.”
^ Seheb., “dikara tsa tshipi.”
^ Seheb., “setlhare sa mokolane sa ga Debora.”
^ Kgotsa “Rulaganya banna ba gago mo.”
^ Seheb., “dikara tsa tshipi.”
^ Bona Ditlhaloso Tsa Mafoko.
^ Kgotsa “hamole.”
