Bahebera 9:1-28
9 Jaanong kgolagano ya pele e ne e na le ditaelo tsa go direla Modimo tirelo e e boitshepo le lefelo le le boitshepo+ mo lefatsheng.
2 Gonne go ne ga agiwa karolo ya ntlha ya motlaagana, e mo go yone go neng go na le setlhomo sa dipone,+ tafole le dinkgwe tse di neelwang Modimo;*+ mme karolo eno e ne e bidiwa Lefelo le le Boitshepo.+
3 Mme kwa morago ga sesiro sa bobedi+ go ne go na le karolo ya motlaagana e e neng e bidiwa Boitshepo Jwa Maitshepo.+
4 Karolo eno e ne e na le leiswana+ la go fisa maswalo la gauta le letlole la kgolagano+ le le neng le manegilwe gauta gotlhe,+ le mo go lone go neng go na le nkgo ya gauta e e neng e na le mana+ le thobane ya ga Arone e e neng ya tlhoga malômô*+ le dikwalelo+ tsa kgolagano;
5 mme mo godimo ga lone go ne go na le ditšheruba tse di galalelang tse di neng di khurumeditse sekhurumelo* ka moriti wa tsone.+ Le fa go ntse jalo, ga se nako ya go bua ka dilo tseno ka botlalo.
6 Fa dilo tseno di sena go rulaganngwa jalo, baperesiti ba ne ba tsena ka metlha mo karolong ya ntlha ya motlaagana gore ba dire ditiro tse di amanang le tirelo e e boitshepo;+
7 mme gangwe ka ngwaga moperesiti yo mogolo o ne a tsena a le esi mo karolong ya bobedi ya motlaagana,+ mme o ne a tshwanetse go tsena a tshotse madi+ a a ntshetsang maleo a gagwe+ le maleo a batho+ ba a dirileng ba sa itse.
8 Moya o o boitshepo o bontsha gore ga go na ope yo o neng a bontshitswe tsela ya go tsena mo lefelong le le boitshepo fa motlaagana wa ntlha o ne o sa ntse o le teng.+
9 Motlaagana ono o emela se se leng teng gone jaanong,+ mme go ya ka thulaganyo eno, Modimo o sa ntse a isediwa dimpho le ditlhabelo.+ Le fa go ntse jalo, dilo tseno ga di kgone go dira gore segakolodi sa motho yo o direlang Modimo tirelo e e boitshepo se se ka sa nna le molato gotlhelele.+
10 Mme di amana fela le dijo le dinô le go dira gore dilo le batho ba nne phepa go ya ka Molao wa ga Moshe.*+ Molao oo o ne o bua ka dilo tse di mo lefatsheng+ mme di ne tsa tlhomiwa go fitlha ka nako e e beilweng gore dilo di tlhamaladiwe.
11 Le fa go ntse jalo, fa Keresete a tla, e ne e le moperesiti yo mogolo wa dilo tse di molemo tse di neng di setse di diragetse. O ne a tsena mo motlaaganeng o o botlhokwa thata, o o sa dirwang ka diatla e bile e se wa lefatshe leno.
12 O ne a tsena mo lefelong le le boitshepo, e seng ka madi a dipodi le a dipowana, mme ka madi a gagwe.+ O ne a tsena gangwe fela a bo a dira gore re gololwe* ka bosakhutleng.+
13 Gonne fa e le gore madi a dipodi le a dipoo+ le melora ya kgomo ya moroba* e e kgatšhiwang mo go ba ba leswafetseng, di dira gore mebele ya bone e nne phepa,+
14 a madi a ga Keresete+ ga a kitla a dira gore digakolodi tsa rona di nne phepa le go feta mo ditirong tse di se nang mosola*+ gore re direle Modimo yo o tshelang tirelo e e boitshepo?+ Gonne moya o o boitshepo* o ne wa mo thusa gore a neye Modimo botshelo jwa gagwe e le setlhabelo se se se nang molato.
15 Ke gone ka moo e leng motsereganyi wa kgolagano e ntšha,+ gore ka loso lwa gagwe a golole batho ka go ba rekolola+ mo maleong a ba a dirileng fa ba ne ba le mo kgolaganong ya pele, gore ba ba ileng ba bidiwa ba amogele tsholofetso ya go tshelela ruri.+
16 Gonne fa motho a dira tumalano le Modimo, motho yoo yo o e dirang o tshwanetse go swa,
17 ka gonne loso lo dira gore tumalano e tlhomame. Tumalano ga e bereke fa motho yo o e dirileng a sa ntse a tshela.
18 Ke gone ka moo kgolagano ya pele e neng e ka se ka ya bereka* kwantle ga madi.
19 Gonne fa Moshe a sena go bolelela batho botlhe ditaelo tsotlhe tsa Molao, o ne a tsaya madi a dipowana le a dipodi le metsi le wulu e khibidu le setlhatshana sa mosiama a bo a kgatšha buka* le batho botlhe,
20 a re: “Ano ke madi a kgolagano e Modimo a lo laetseng gore lo e boloke.”+
21 Gape o ne a kgatšha motlaagana le dijana tsotlhe tsa tirelo e e boitshepo ka madi.+
22 Go ya ka Molao wa ga Moshe, dilo tsotlhe di phepafadiwa ka madi+ e bile batho ga ba ka ke ba itshwarelwa maleo a bone fa go sa tshololwe madi.+
23 Ka jalo, go ne go tlhokega gore dilo tse di tshwantshetsang+ dilo tse di kwa magodimong di phepafadiwe ka tsela eno,+ mme dilo tse di kwa magodimong di tlhoka ditlhabelo tse di botoka go na le tseo.
24 Gonne Keresete ga a ka a tsena mo lefelong le le boitshepo le le dirilweng ka diatla,+ le le emelang selo sa mmatota,+ mme o tsene mo legodimong ka bolone,+ mo e leng gore gone jaanong o re emela fa pele* ga Modimo.+
25 Ga a dire seno gore a iketshe* setlhabelo gantsi, fela jaaka moperesiti yo mogolo a tsena mo lefelong le le boitshepo ngwaga le ngwaga+ ka madi a e seng a gagwe.
26 Go seng jalo, o ne a tla tshwanelwa ke go boga gantsi go tloga fa e sa le batho ba bopiwa.* Mme jaanong o iponaditse gangwe fela kwa malatsing a bofelo* gore a tlose boleo ka setlhabelo sa gagwe.+
27 Mme e re ka batho ba swa gangwe fela, mme morago ga moo ba bo ba atlholwa,
28 Keresete le ene o ne a iketsha setlhabelo gangwe fela gore a rwale maleo a batho ba le bantsi;+ mme fa a bonala lekgetlo la bobedi o tla bo a sa tlose boleo mme o tla boloka ba ba mmatlang ka tlhoafalo.+
Dintlha Tse di Kwa Tlase
^ Kgotsa “dinkgwe tse di bewang fa pele ga Modimo.”
^ Kgotsa “dithunya.”
^ Ka Segerika lefoko le le kayang sekhurumelo gape le ka kaya setlhabelo se motho a se ntshang gore Modimo a mo itshwarele.
^ Seger., “le dikolobetso tse di farologaneng.”
^ Seger., “rekololwe.”
^ Kgotsa “kgomo e e iseng e nne le namane.”
^ Seger., “ditirong tse di suleng.”
^ Seger., “yo ka moya wa bosakhutleng.”
^ Seger., “simololwa.”
^ Kgotsa “momeno.”
^ Seger., “fa pele ga sefatlhego sa.”
^ Kgotsa “ikentshe.”
^ Seger., “kwa bokhutlong jwa ditsamaiso tsa dilo.” Bona Ditlhaloso Tsa Mafoko.
