Ekesodo 15:1-27
15 Ka nako eo, Moshe le Baiseraele* ba ne ba opelela Jehofa pina eno:+
“Mma ke opelele Jehofa ka gonne o kwa godimo thata.+
O latlhetse pitse le mopalami wa yone mo lewatleng.+
2 Jah* ke nonofo ya me le maatla a me, ka gonne o mpolokile.+
Yono ke Modimo wa me, mme ke tla mmaka;+ Modimo wa ga rre,+ mme ke tla mo tlotlomatsa.+
3 Jehofa ke motlhabani yo o maatla.+ Jehofa ke leina la gagwe.+
4 O latlhetse dikara tsa ga Faro le masole a gagwe mo lewatleng,+Mme batlhabani ba gagwe ba ba gaisang botlhe ba nwetse mo Lewatleng le Lehibidu.+
5 Metsi a a gogomogang a ne a ba khurumetsa; ba ne ba nwela kwa tengteng jaaka leje.+
6 Seatla sa gago sa moja Jehofa, se na le maatla a magolo;+Seatla sa gago sa moja Jehofa, se tšhwetlakanya mmaba.
7 Ka tlotlomalo ya gago e kgolo, o kgona go latlhela ba ba go tlhaselang fa fatshe;+O romela bogale jwa gago jo bo tukang, bo ba laila jaaka lotlhaka.
8 O ne wa dira gore metsi a kgobokane ka mohemo o o tswang mo marobeng a dinko tsa gago;A ne a ema a sa tshikinyege, a thibela merwalela;Metsi a a gogomogang a ne a gatsela mo pelong ya lewatle.
9 Mmaba o ne a re: ‘Ke tla ba latelela! Ke tla ba tshwara!
Ke tla kgaoganya se ke se gapileng go fitlha ke kgotsofala!
Ke tla somola tšhaka ya me! Seatla sa me se tla ba fenya!’+
10 O ne wa budulela ka mohemo wa gago, lewatle la ba khurumetsa;+Ba ne ba nwela jaaka lloto mo bophadiphading jwa metsi.
11 Jehofa, ke mang yo o tshwanang le wena mo medimong?+
Ke mang yo o tshwanang le wena, wena yo o boitshepo thata?+
Wena yo o tshwanetseng go boifiwa ka dipina tsa pako, wena yo o dirang dikgakgamatso.+
12 O ne wa otlolola seatla sa gago sa moja, mme lefatshe la ba kometsa.+
13 Ka lorato lwa gago lo lo sa kgaotseng, o ne wa etelela pele batho ba o ba golotseng;+Ka nonofo ya gago, o tla ba kaela kwa lefelong le le boitshepo le o nnang kwa go lone.
14 Ditšhaba di tshwanetse go utlwa;+ di tla roroma;Banni ba Filisitia ba tla aparelwa ke ditlhabi tse dikgolo.
15 Ka nako eo dikgosana* tsa Edoma di tla tshoga;Mme babusi ba ba maatla* ba Moabe ba tla roroma.+
Banni botlhe ba Kanana ba tla nyema mooko.+
16 Ba tla welwa ke letshogo le poifo.+
Ba tla nna fela ba sa tshikhinyege jaaka leje ka ntlha ya bogolo jwa lebogo la gago
Go fitlha batho ba gago ba feta fa kgaolong ya bone Jehofa,Go fitlha batho ba o ba tlhophileng+ ba feta fa kgaolong ya bone.+
17 O tla ba tlisa o bo o ba jala mo thabeng ya boswa jwa gago,+Mo lefelong le o le ipaakanyeditseng gore o nne mo go lone Jehofa,Mo lefelong le le boitshepo le o le dirileng ka diatla tsa gago Jehofa.
18 Jehofa o tla busa e le kgosi ka bosakhutleng le go ya go ile.+
19 Fa dipitse tsa ga Faro le dikara tsa gagwe tsa ntwa le bapalami ba gagwe ba dipitse ba tsena mo lewatleng,+Foo Jehofa o ne a busetsa metsi a lewatle mo go bone,+Mme batho ba Iseraele ba ne ba tsamaya mo mmung o o omileng mo gare ga lewatle.”+
20 Foo moporofeti Miriame, kgaitsadie Arone, o ne a tsaya moropana ka seatla mme basadi botlhe ba mo sala morago ka meropana ba bina.
21 Miriame o ne a araba banna ka go opela a re:
“Opelelang Jehofa, gonne o kwa godimo thata.+
O latlhetse pitse le mopalami wa yone mo lewatleng.”+
22 Moragonyana Moshe o ne a etelela Baiseraele pele go tswa kwa Lewatleng le Lehibidu, mme ba ne ba ya kwa nageng ya Shure ba bo ba tsamaya malatsi a le mararo mo nageng, mme ba ne ba se ka ba bona metsi.
23 Ba ne ba goroga kwa Mara,*+ mme ba ne ba palelwa ke go nwa metsi a kwa Mara ka gonne a ne a le bogalaka. Ke gone ka moo a neng a bitsa lefelo leo Mara.
24 Ka jalo, batho ba ne ba simolola go tla kwa go Moshe ba ngongorega,+ ba re: “Re tla nwa eng?”
25 O ne a goela kwa go Jehofa+ mme Jehofa a mmontsha setlhare sengwe. Fa a se latlhela mo metsing, metsi a ne a nna monate.
Ke gone kwa Modimo a neng a ba tlhomela molao le kgang e e tshwanetseng go atlholwa e bile ke gone kwa a neng a ba leka+ gone.
26 O ne a re: “Fa o ka reetsa lentswe la ga Jehofa, Modimo wa gago ka kelotlhoko o bo o dira se se siameng mo matlhong a gagwe mme o reetsa ditaelo tsa gagwe ka kelotlhoko o bo o boloka melao yotlhe ya gagwe,+ ga nkitla ke go tlisetsa malwetse ape a ke neng ka a tlisetsa Baegepeto+ ka gonne ke nna Jehofa yo o go fodisang.”+
27 Morago ga moo ba ne ba goroga kwa Elime, kwa go neng go na le metswedi ya metsi e le 12 le ditlhare tsa mokolane di le 70. Ka jalo, ba ne ba kampa foo fa thoko ga metsi ao.
Dintlha Tse di Kwa Tlase
^ Kgotsa “banna ba Iseraele.”
^ “Jah” ke khutshwafatso ya leina Jehofa.
^ Dikgosana tse go buiwang ka tsone ke dikgosana tsa lotso.
^ Kgotsa “bagateledi.”
^ Mo go kayang “Bogalaka.”
