Isaia 40:1-31
40 Modimo wa lona a re, “Gomotsang, gomotsang batho ba me.+
2 Buang le pelo ya* Jerusalema,Mme lo mo itsise gore tirelo ya gagwe e a tshwanetseng go e dira e dirilwe,Lo mo itsise gore molato wa gagwe o itshwaretswe.+
O amogetse tuelo e e feletseng* ya maleo otlhe a gagwe go tswa mo seatleng sa ga Jehofa.”+
3 Mongwe o* goa a le kwa nageng a re:
“Baakanyang tsela ya ga Jehofa!+
Direlang Modimo wa rona tsela e kgolo+ e e ralalang sekaka.+
4 A mokgatšha mongwe le mongwe o katelwe,Le thaba nngwe le nngwe le thota nngwe le nngwe di isiwe kwa tlase.
Lefatshe le le magwata le tshwanetse go rethefadiwa,Le lefatshe le le tletseng maje le tshwanetse go nna lebala.+
5 Kgalalelo ya ga Jehofa e tla senolwa,+E bile batho botlhe* ba tla e bona,+Gonne molomo wa ga Jehofa o buile seno.”
6 Reetsang! Mongwe a re: “Tlhaeletsa!”
Mme yo mongwe a re: “Ke tlhaeletse ke reng?”
“Batho botlhe ba* tshwana le bojang jo botala.
Lorato lwa bone lo lo sa kgaotseng lo tshwana le lelômô* la naga.+
7 Bojang jo botala bo a omelela,Lelômô le a swaba,+Ka gonne mohemo* wa ga Jehofa o foka mo go lone.+
Eleruri batho ba tshwana fela le bojang jo botala.
8 Bojang jo botala bo a omelela,Lelômô le a swaba,Mme lefoko la Modimo wa rona le nna ka bosakhutleng.”+
9 Tlhatlogela kwa thabeng e e kwa godimo,Wena mosadi yo o tlisetsang Siona dikgang tse di molemo.+
Tsholetsa lentswe la gago ka maatla,Wena mosadi yo o tlisetsang Jerusalema dikgang tse di molemo.
Le tsholetse, o se ka wa boifa.
Itsise metse ya Juda o re: “Modimo wa lona ke yono.”+
10 Morena Molaodimogolo Jehofa o tla tla a le maatla,E bile lebogo la gagwe le tla busa mo boemong jwa gagwe.+
Modimo o tla a tshotse maduo a gagwe,Le tuelo e a duelang ka yone e fa pele ga gagwe.+
11 O tla tlhokomela* letsomane la gagwe fela jaaka modisa.+
O tla phutha dikwanyana mmogo ka lebogo la gagwe,E bile o tla di tshola mo sehubeng sa gagwe.
Tse di anyisang o tla di etelela pele ka lorato.+
12 Ke mang yo o lekantseng metsi mo seatleng sa gagwe,+A bo a lekanya magodimo ka paralatso ya seatla sa gagwe?*
Ke mang yo o neng a phuthela lerole la lefatshe mo selekanyong+Kgotsa a lekanya dithaba ka dilekanyi,Le dithota ka dikale?
13 Ke mang yo o lekantseng* moya wa ga Jehofa,E bile ke mang yo o ka nnang mogakolodi wa gagwe gore a mo kaele?+
14 O ne a botsa mang gore a tlhaloganye,Kgotsa ke mang yo o mo rutang tselana ya tshiamiso,Kgotsa yo o mo rutang kitso,Kgotsa yo o mmontshang tsela ya temogo ya boammaaruri?+
15 Ditšhaba di tshwana le lerothodi le le tswang mo kgamelong,E bile di tshwana le lerolenyana le le mo dikaleng.+
O tsholetsa ditlhaketlhake fela jaaka lerole le le boleta.
16 Tota le Lebanona ga e a lekana go dira gore molelo o tswelele o tuka,*Le diphologolo tsa yone tsa naga ga di a lekana go nna setlhabelo se se fisiwang.
17 Ditšhaba tsotlhe di ntse jaaka sengwe se se iseng se nne teng fa pele ga gagwe;+O di kaya e se sepe, e le lefela.+
18 Lo ka bapisa Modimo le mang?+
Ke eng se lo ka mo tshwantshang le sone?+
19 Mmetli o dira modingwana,*Mothudi wa tshipi o o manega gauta,+A bo a o direla dikeetane tsa selefera.
20 Motho o tlhopha setlhare sengwe e le moneelo wa gagwe,+Setlhare se se se kitlang se bola.
O batla mmetli yo o setswerereGore a mo direle setshwantsho se se betlilweng se se se kitlang se wa.+
21 A ga lo itse?
A ga lo ise lo utlwe?
A ga lo a bolelelwa go tswa kwa tshimologong?
A ga lo a tlhaloganya bosupi jo bo sa bolong go nna teng go tloga fa metheo ya lefatshe e ne e nna gone?+
22 Go na le Yo o nnang kwa godimo ga lefatshe le le kgolokwe,*+Mme ba ba nnang mo go lone ba tshwana le ditsiakgope.
O phutholola magodimo jaaka lesire,E bile o a tsharolola jaaka tente e go nniwang mo go yone.+
23 O pagolola badiredibagolo mo maemong a boneE bile o dira gore baatlhodi* ba lefatshe e nne batho ba e seng ba sepe.
24 Ga ba ise ba lengwe,Ga ba ise ba jalwe,Kutu ya bone ga e ise e mele medi mo lefatsheng,Mme ba a budulelwa ba bo ba omelela,E bile ba tsewa ke phefo jaaka lotlhaka.+
25 Modimo yo o Boitshepo a re: “Lo ka ntshwantsha le mang lo ntekanya le ene?
26 Tsholeletsang matlho a lona kwa legodimong mme lo bone.
Ke mang yo o bopileng dilo tseno?+
Ke Ene yo o bolotsang lesomo la tsone ka palo;O di bitsa tsotlhe ka maina.+
E re ka a na le maatla a magolo a a boitshegang e bile a na le nonofo e kgolo,+Ga go na epe ya tsone e e tlhaelang.
27 Ke ka ntlha yang fa wena Jakobe, le wena Iseraele o bua o re,‘Jehofa ga a bone tsela ya me,E bile Modimo ga a ntirele tshiamiso epe’?+
28 A ga o itse? A ga o ise o utlwe?
Jehofa, Mmopi wa dikhutlo tsa lefatshe, ke Modimo ka bosakhutleng.+
Ga a ke a lapa kgotsa a felelwa ke nonofo.+
Tlhaloganyo ya gagwe ga e ka ke ya tlhaloganngwa.+
29 O naya yo o lapileng maatlaE bile ba ba se nang nonofo o ba naya maatla a magolo.+
30 Basimane ba tla lapa e bile ba tla felelwa ke nonofo,Makawana a tla kgopiwa a bo a wa,
31 Mme ba ba solofetseng mo go Jehofa ba tla nna le maatla gape.
Ba tla phaphasela ka diphuka jaaka bontsu.+
Ba tla siana mme ga ba kitla ba felelwa ke nonofo;Ba tla tsamaya mme ga ba kitla ba lapa.”+
Dintlha Tse di Kwa Tlase
^ Kgotsa “Buang ka tsela e e gomotsang le.”
^ Kgotsa “O amogetse go menagane sebedi.”
^ Seheb., “Lentswe la mongwe le.”
^ Seheb., “nama yotlhe.”
^ Seheb., “Nama yotlhe e.”
^ Kgotsa “sethunya.”
^ Kgotsa “moya.”
^ Kgotsa “disa.”
^ Ke go tloga kwa bofelong jwa monwana wa kgonotšwe go fitlha kwa monwaneng o monnye fa motho a phutholotse seatla. Bona Dintlha B14.
^ Kgotsa gongwe “tlhalogantseng.”
^ Kgotsa “ga e ka ke ya kgona go ntsha dikgong tse di lekaneng.”
^ Kgotsa “sefikantswe se se bopilweng.”
^ Kgotsa “sediko.”
^ Kgotsa “babusi.”
