Efangele ya ga Mathaio 26:1-75
-
Baperesiti ba loga leano la go bolaya Jesu (1-5)
-
Jesu o tshelwa leokwane le le nkgang monate (6-13)
-
Jesu o keteka Tlolaganyo ya bofelo a bo a rekisiwa (14-25)
-
Go tlhomiwa ga Dijo Tsa Morena Tsa Maitseboa (26-30)
-
Jesu o bolelela pele gore Petere o tla mo itatola (31-35)
-
Jesu o rapela kwa Gethesemane (36-46)
-
Jesu o a tshwarwa (47-56)
-
O sekisiwa fa pele ga Sanehederine (57-68)
-
Petere o itatola Jesu (69-75)
26 Jaanong e rile Jesu a sena go bua dilo tseno tsotlhe, a raya barutwa ba gagwe a re:
2 “Lo a itse gore malatsi a le mabedi go tloga jaanong e tla bo e le Tlolaganyo,+ mme Morwa motho o tla tsenngwa mo diatleng tsa batho gore ba mmolaele mo koteng.”+
3 Foo baperesiti ba bagolo le baeteledipele ba ne ba phuthegela mo lolwapeng lwa moperesiti yo mogolo yo o neng a bidiwa Kaiafase,+
4 mme ba ne ba buisana+ gore ba tshware Jesu ba dirisa maano a boferefere mme ba mmolaye.
5 Le fa go ntse jalo, ba ne ba re: “E seng kwa moletlong, gore batho ba tle ba se ka ba tsosa dikhuduego.”
6 Fa Jesu a le kwa Bethani mo ntlong ya ga Simone yo o kileng a tshwarwa ke lepero,+
7 mosadi mongwe yo o neng a tshotse lebotlolo la alabasetere la leokwane le le nkgang monate le le jang madi a mantsi, o ne a mo atamela. Mme o ne a le tshela mo tlhogong ya gagwe fa a ntse a ja.*
8 E rile barutwa ba bona seno ba galefa mme ba re: “Ke ka ntlha yang fa mosadi yono a senya leokwane leno?
9 Gonne le ka bo le rekisitswe ka madi a mantsi a bo a newa bahumanegi.”
10 E re ka Jesu a ne a lemoga seno, o ne a ba raya a re: “Ke ka ntlha yang fa lo tshwenya mosadi yono? O ntiretse tiro e e molemo.
11 Gonne bahumanegi ba na le lona ka metlha,+ mme nna ga nkitla ke nna le lona ka metlha.+
12 Fa mosadi yono a ne a tshela leokwane leno le le nkgang monate mo mmeleng wa me, o ne a dira seno e le go baakanyetsa mmele wa me nako ya fa ke tla bo ke fitlhwa.+
13 Ammaaruri ke a lo bolelela, gongwe le gongwe fela kwa dikgang tse di molemo di rerwang gone mo lefatsheng, se mosadi yono a se dirileng le sone se tla bolelwa, e le go mo gopola.”+
14 Go tswa foo, mongwe wa baaposetoloi ba ba 12, yo o bidiwang Judase Isekariota,+ o ne a ya kwa baperesiting ba bagolo+
15 a bo a ba raya a re: “Lo tla nnaya eng gore ke lo mo neele?”+ Ba ne ba mo solofetsa dishekele tsa selefera di le 30.+
16 Ka jalo, go tloga ka nako eo, o ne a nna a batla nako e e siameng ya gore a ba rekisetse Jesu.
17 Ka letsatsi la moletlo wa Senkgwe Se se Se Nang Sebediso,+ barutwa ba ne ba tla kwa go Jesu ba bo ba re: “O batla gore re ye go go baakanyetsa kae gore o jele Tlolaganyo gone?”+
18 O ne a ba raya a re: “Yang kwa motseng kwa go Mokêtê mme lo mo reye lo re, ‘Moruti a re: “Nako ya me e e tlhomilweng e gaufi; ke tla ketekela Tlolaganyo le barutwa ba me kwa legaeng la gago.”’”
19 Ka jalo, barutwa ba ne ba dira jaaka Jesu a ne a ba laetse mme ba baakanyetsa Tlolaganyo.
20 Fa go nna maitseboa,+ o ne a nna fa tafoleng le barutwa ba gagwe ba ba 12.+
21 Fa ba ntse ba ja, o ne a ba raya a re: “Ammaaruri ke a lo bolelela, mongwe wa lona o tla nthekisa.”+
22 E re ka seno se ile sa ba hutsafatsa thata, mongwe le mongwe wa bone o ne a mo raya a re: “Morena, ga se nna gakere?”
23 O ne a ba araba a re: “Yo o tsenyang seatla sa gagwe le nna mo sejaneng, ke ene yo o tla nthekisang.+
24 Ke boammaaruri gore Morwa motho o a tsamaya, fela jaaka go kwadilwe ka ga gagwe. Le fa go ntse jalo, ruri monna yoo yo o rekisang Morwa motho o tla tlelwa ke ditlamorago+ tse di botlhoko!+ Go ka bo go nnile botoka fa monna yoo a ka bo a sa tsholwa.”+
25 Judase, yo o neng a tloga a mo rekisa, o ne a re: “Ga se nna, gakere Rabi?” Jesu a mo raya a re: “Ke wena yo o itseng.”
26 Fa ba ntse ba ja, Jesu o ne a tsaya senkgwe, mme fa a sena go rapela o ne a se ngathoganya,+ a se naya barutwa ba gagwe a bo a re: “Tsayang lo je. Seno se kaya mmele wa me.”+
27 O ne a tsaya senwelo se se nang le beine, a leboga a bo a ba se naya a re: “Nwang mo go sone lotlhe,+
28 ka gonne beine e e mo go sone e kaya ‘madi+ a me a kgolagano,’+ a a tla tshololelwang batho ba le bantsi+ gore ba itshwarelwe maleo.+
29 Le fa go ntse jalo ke a lo bolelela, go tloga jaanong ga nkitla ke tlhola ke nwa sepe se se dirilweng ka morara* go fitlha ka letsatsi le ke tla bong ke se nwa le lona se le sesha mo Bogosing jwa ga Rre.”+
30 La bofelo, fa ba sena go opela dipako,* ba ne ba tswa ba ya kwa Thabeng ya Lotlhware.+
31 Foo Jesu o ne a ba raya a re: “Lona lotlhe lo tla ntlhanogela ka ntlha ya se se tla ntiragalelang mo bosigong jono, ka gonne go kwadilwe jaana: ‘Ke tla itaya modisa, mme dinku tsa letsomane di tla gasama.’+
32 Le fa go ntse jalo, fa ke sena go tsosiwa, ke tla lo etelela pele ke ya kwa Galalea.”+
33 Mme Petere o ne a mo raya a re: “Le fa ba bangwe botlhe ba ka go tlhanogela ka ntlha ya se se tla go diragalelang, nna ga nkitla ke go tlhanogela!”+
34 Jesu o ne a mo raya a re: “Ammaaruri ke a go bolelela, mo bosigong jono, pele ga mokoko o lela, o tla bo o intatotse gararo.”+
35 Petere o ne a mo raya a re: “Tota le fa nka tshwanelwa ke go swa le wena, ga nkitla ke go itatola.”+ Barutwa ba bangwe botlhe le bone ba ne ba bua se se tshwanang.
36 Go tswa foo, Jesu o ne a ya le barutwa ba gagwe kwa lefelong le le bidiwang Gethesemane,+ mme a ba raya a re: “Nnang fa fatshe fano, nna ke ya fale ke ya go rapela.”+
37 O ne a tsaya Petere le bomorwa Sebede boobabedi, mme o ne a simolola go hutsafala le go tshwenyega thata.+
38 Foo o ne a ba raya a re: “Ke tshwenyegile fela thata. Nnang fano, lo nne lo disitse le nna.”+
39 Mme o ne a tsamaela kwa pele sekgalanyana, a khubama* a bo a rapela a re:+ “Rara, fa go kgonega, a senwelo seno+ se mphete. Le fa go ntse jalo, a go se ka ga direga thato ya me, mme go direge thato ya gago.”+
40 O ne a boela kwa barutweng bao ba bararo mme a ba fitlhela ba robetse a bo a raya Petere a re: “A lo ne lo ka se nne lo disitse le nna ura e le nngwe fela?+
41 Nnang lo disitse+ e bile lo rapele lo sa kgaotse,+ gore lo tle lo se ka lwa tsena mo thaelong.+ Gone moya o tlhaga,* mme nama yone e bokoa.”+
42 O ne a tsamaya gape lekgetlo la bobedi mme a rapela a re: “Rra, fa go sa kgonege gore senwelo seno se fete ke sa se nwa, a thato ya gago e diragale.”+
43 O ne a boa gape mme a ba fitlhela ba robetse, ka gonne ba ne ba otsela thata.
44 O ne a ba tlogela gape a ya go rapela lekgetlo la boraro, a bua se se tshwanang.
45 Go tswa foo, o ne a boela kwa barutweng mme a ba raya a re: “Eno ga se nako ya gore lo bo lo robetse e bile lo ikhuditse. Nako ya gore Morwa motho a tsenngwe mo diatleng tsa baleofi e gorogile.
46 Emang, a re tsamayeng. Bonang, yo o nthekisitseng o gorogile.”
47 Fa a sa ntse a bua, mongwe wa baaposetoloi ba ba 12 e bong Judase, o ne a tla a na le batho ba bantsintsi ba tshotse ditšhaka le melamu, ba rometswe ke baperesiti ba bagolo le baeteledipele.+
48 Jaanong yo o mo rekisitseng o ne a ba boleletse gore o tla ba naya sesupo, a re: “Ope fela yo ke mo sunang, ke ene; lo mo tshware.”
49 O ne a ya ka tlhamalalo kwa go Jesu mme a mo raya a re: “Dumela, Rabi!” a bo a mo suna.
50 Mme Jesu o ne a mo raya a re: “Mogaetsho, o tlile go dira eng fano?”+ Foo ba ne ba tla mme ba tshwara Jesu.
51 Jaanong mongwe wa ba ba neng ba na le Jesu o ne a somola tšhaka ya gagwe mme a kgaola tsebe ya motlhanka wa moperesiti yo mogolo.+
52 Foo Jesu o ne a mo raya a re: “Busetsa tšhaka ya gago mo kgetsaneng ya yone,+ ka gonne botlhe ba ba dirisang tšhaka ba tla bolawa ka tšhaka.+
53 Kgotsa a o akanya gore ga ke kgone go kopa Rre gore gone jaanong a nneye mephato e feta 12 ya baengele?+
54 Fa nka dira jalo, Dikwalo di ne di tla diragadiwa jang tse di buang gore seno se tshwanetse go direga ka tsela eno?”
55 Ka nako eo, Jesu o ne a raya batho bao a re: “A lo tlile go ntshwara lo tshotse ditšhaka le melamu jaaka e kete lo tlile go tshwara sekebekwa? Letsatsi le letsatsi ke ne ke tlhola ke na le lona mo tempeleng ke ruta,+ le fa go ntse jalo lo ne lwa se ka lwa ntshwara.+
56 Mme dilo tseno tsotlhe di diragetse gore mekwalo* ya baporofeti e tle e diragadiwe.”+ Foo barutwa botlhe ba ne ba mo tlogela ba tshaba.+
57 Batho ba ba neng ba tshwara Jesu ba ne ba mo isa kwa go Kaiafase+ moperesiti yo mogolo, kwa bakwadi le baeteledipele ba neng ba phuthegetse gone.+
58 Mme Petere o ne a tswelela a mo setse morago a le kgakajana, go ya go fitlha kwa lolwapeng lwa moperesiti yo mogolo. Fa a sena go tsena mo teng, o ne a nna le batlhokomedi ba ntlo gore a bone gore go tla felela jang.+
59 Jaanong baperesiti ba bagolo le maloko otlhe a Sanehederine ba ne ba batla bosupi jwa maaka ka Jesu gore ba mmolaye.+
60 Le fa go ntse jalo, ga ba a ka ba bo bona, le fa gone basupi ba le bantsi ba maaka ba ile ba tla.+ Moragonyana go ne ga tla ba le babedi
61 ba bo ba re: “Monna yono o kile a re, ‘Ke kgona go digela tempele ya Modimo fa fatshe ke bo ke e aga mo malatsing a le mararo.’”+
62 Foo moperesiti yo mogolo o ne a ema mme a mo raya a re: “A ga o bue sepe? A ga o utlwe bosupi jo batho bano ba bo ntshang ka wena?”+
63 Le fa go ntse jalo, Jesu o ne a didimala fela.+ Ka jalo, moperesiti yo mogolo o ne a mo raya a re: “Ke go laela gore o ikane ka Modimo yo o tshelang gore o tla bua boammaaruri mme o re bolelele gore a o Keresete, Morwa Modimo!”+
64 Jesu o ne a mo raya a re: “Se o se buang ke boammaaruri. Le fa go ntse jalo ke a lo bolelela, go tloga jaanong lo tla bona Morwa motho+ a ntse ka fa seatleng sa moja sa Modimo yo o Maatla+ mme a tla a le mo marung a legodimo.”+
65 Foo moperesiti yo mogolo o ne a gagola diaparo tsa gagwe tsa ka fa ntle mme a re: “Monna yono o tlhapaditse! Goreng re sa ntse re tlhoka basupi ba bangwe? Lo utlwile gore o tlhapaditse.
66 Lo akanya eng?” Ba ne ba mo araba ba re: “O tshwanetse go swa.”+
67 Go tswa foo, ba ne ba mo kgwela mathe mo sefatlhegong+ ba bo ba mo itaya ka mabole.+ Ba bangwe ba mo faphola mo sefatlhegong,+
68 ba bo ba re: “Keresete ke wena, fa e le gore o moporofeti, re bolelele gore ke mang yo o go iteileng?”
69 Jaanong Petere o ne a ntse kwa ntle mo lolwapeng, mme mosetsana* mongwe o ne a ya kwa go ene a bo a re: “Le wena o ne o na le Jesu wa Mogalalea!”+
70 Mme o ne a itatola fa pele ga bone botlhe, a re: “Ga ke itse gore o bua ka eng.”
71 Fa a tswela kwa kgorong ya lolwapa, mosetsana yo mongwe o ne a mo lemoga mme a raya ba ba leng foo a re: “Monna yono o ne a na le Jesu wa Monasaretha.”+
72 Mme o ne a itatola gape a bo a bua jaana a tiisitse: “Ga ke itse monna yono!”
73 Morago ga lobakanyana, ba ba neng ba eme foo ba ne ba tla mme ba raya Petere ba re: “Eleruri le wena o mongwe wa bone, ka gonne tota le tsela e o buang ka yone* e a go senola.”
74 Foo o ne a simolola go tlhapatsa a bo a ikana a re: “Ga ke itse monna yono!” Mme ka yone nako eo mokoko o ne wa lela.
75 Petere o ne a gopola se Jesu a neng a se bua fa a ne a re: “Pele ga mokoko o lela, o tla bo o intatotse gararo.”+ Mme o ne a tswela kwa ntle a bo a lela mo go botlhoko.
Dintlha Tse di Kwa Tlase
^ Kgotsa “fa a ntse ka go sekama fa tafoleng.”
^ Kgotsa “diterebe; moretlwa.”
^ Kgotsa “difela; dipesalema.”
^ Seger., “a wela fa fatshe ka sefatlhego.”
^ Kgotsa “o a rata.”
^ Kgotsa “dikwalo.”
^ Mosetsana yono e ne e le lelata.
^ Kgotsa “loleme lwa gago.”
