Pilato o raya batho ba ba batlang go bolaya Jesu a re: “Ga ke a bona sepe se se phoso se se tsamaisanang le dilo tse lo mo latofatsang ka tsone. Tota e bile, Herode le ene ga a bona phoso epe.” (Luke 23:14, 15) Pilato o dirisa leano le lengwe go leka go boloka Jesu, o raya batho a re: “Go ya ka tlwaelo ya lona, ke tshwanetse go lo gololela legolegwa lengwe ka Tlolaganyo. Ka jalo, a lo batla gore ke lo gololele Kgosi ya Bajuda?”—Johane 18:39.

Pilato o itse legolegwa le le bidiwang Barabase, yo o itsegeng e le senokwane, a sa ikobele molao e bile e le mmolai. Ka jalo, Pilato o botsa jaana: “Lo batla gore ke golole mang, Barabase kgotsa Jesu yo go tweng ke Keresete?” E re ka batho ba tlhotlhelediwa ke baperesiti ba bagolo, ba kopa gore ba gololelwe Barabase, e seng Jesu. Pilato o botsa jaana gape: “Lo batla gore ke golole mang mo go ba babedi bano?” Batho ba goa ba re: “Barabase”!—Mathaio 27:17, 21.

Pilato o botsa jaana a kgobegile marapo: “Jaanong ke dire eng ka Jesu yo go tweng ke Keresete?” Batho ba goa jaana: “A a kokotelwe mo koteng!” (Mathaio 27:22) Ga ba tlhabiwe ke ditlhong go batla gore monna yo o se nang molato a bolawe. Pilato o ba botsa jaana: “Goreng? Monna yono o dirile eng se se bosula? Ga ke a bona sepe se se phoso se se ka dirang gore a bolawe; ka jalo, ke tla mo otlhaya ke bo ke mo golola.”—Luke 23:22.

Go sa kgathalesege maiteko a ga Pilato a go batla go golola Jesu, batho bano ba ba shakgetseng ba goa jaana ba le seoposengwe: “A a kokotelwe mo koteng!” (Mathaio 27:23) Baeteledipele ba bodumedi ba dirile gore batho ba itshware ka tsela e e sa tshwanelang mme ba batla go tsholola madi! Madi ao ga se a senokwane sengwe kgotsa mmolai mongwe fela. Ke madi a monna yo o se nang molato, yo malatsi a le matlhano pele ga foo a neng a amogelwa mo Jerusalema e le Kgosi. Fa e le gore barutwa ba ga Jesu ba teng, ba didimetse fela e bile batho ga ba ba lemoge.

Pilato o lemoga gore se a se kopang ga se thuse ka sepe. Modumo o a oketsega, ka jalo o tsaya metsi a bo a tlhapa diatla fa pele ga batho ba bantsi. O ba raya a re: “Ga ke na molato wa loso lwa monna yono. Lona bonang gore lo tswa jang.” Seo ga se dire gore batho ba fetole maikaelelo a bone. Go na le moo ba re: “Rona le bana ba rona re tla rwala maikarabelo a loso lwa gagwe.”—Mathaio 27:24, 25.

Le fa gone Pilato a eletsa go dira se se siameng, o bona go le botoka gore a ba kgotsofatse. Ka jalo, go dumalana le se ba se batlang, o ba gololela Barabase. O laela gore Jesu a apolwe a bo a kgwathisiwe.

Fa Jesu a sena go itewa botlhoko jalo, masole a mo tsenya mo ntlong ya segosi ya ga Pilato. Setlhopha sa masole se a phuthega se bo se tswelela ka go mo sotla. Ba loga serwalo sa mmitlwa ba bo ba se mo rwesa ba se gatelela mo tlhogong ya gagwe. Gape masole a tsenya lotlhaka mo seatleng sa gagwe sa moja ba bo ba mo apesa kobo e khibidu e e tshwanang le e e aparwang ke dikgosi. Ba bua jaana ba mo sotla: “Dumela, wena Kgosi ya Bajuda!” (Mathaio 27:28, 29) Mo godimo ga moo, ba mo kgwela mathe le go mo faphola mo sefatlhegong. Ba tsaya lotlhaka loo lo lo thata mo go ene ba bo ba mo itaya ka lone mo tlhogong mme seo se dira gore mmitlwa wa “serwalo” seo se se mo tlontlololang e tsenelele mo letlalong la tlhogo ya gagwe.

Tsela e Jesu a itshwereng ka seriti ka yone le e a itshoketseng dilo tseno tsotlhe ka yone, e kgatlha Pilato fela thata mme e mo tlhotlheletsa gore a batle go ithola boikarabelo gape, a re: “Bonang! Ke mo tlisa kwa go lona kwa ntle gore lo itse gore ga ke bone molato ope mo go ene.” A Pilato o akanya gore fa a ntshetsa Jesu kwa bathong bano, a gobetse e bile a elela madi ba tla fetola mogopolo? Fa Jesu a ntse a eme fa pele ga batho bano ba ba dipelo di thata, Pilato o ba raya a re: “Bonang! Ke ene yo!”—Johane 19:4, 5.

Le fa Jesu a iteilwe botlhoko e bile a gobetse, o tswelela a itshwere ka seriti e bile a ritibetse mo Pilato a kgonang go lemoga seo, ka gonne mafoko a gagwe a bonala a bontsha tlotlo e bile o utlwela Jesu botlhoko.