Jesu o sa tswa go naya barutwa ba gagwe kgakololo e e molemo ya gore ba dirise jang dikhumo tse ba nang le tsone. Mme ga se bone fela ba ba mo reeditseng. Bafarasai le bone ba teng foo, mme ba tshwanetse go akanyetsa kwa teng ka kgakololo eno ya ga Jesu. Goreng? Ka gonne “ba rata madi.” Fa ba utlwa se Jesu a se buang, ba ‘simolola go mo tshega ka tshotlo.’—Luke 15:2; 16:13, 14.

Le fa go ntse jalo, seno ga se tshose Jesu. O ba raya a re: “Lo ipolela lo siame fa pele ga batho, mme Modimo o itse se se mo dipelong tsa lona. Gonne selo se batho ba se tseelang kwa godimo, se ferosa sebete mo matlhong a Modimo.”—Luke 16:15.

Bafarasai ga ba bolo go ‘tseelwa kwa godimo ke batho,’ mme jaanong ke nako ya gore boemo joo bo fetoge. Batho bano ba ba tseelwang kwa godimo ka gonne ba humile, ba ba nang le maemo mo dipolotiking le mo bodumeding, jaanong ba tshwanetse go kokobediwa. Batho ba maemo a a kwa tlase ba ba lemogang gore ba tlhoka go itse Modimo, ke bone ba ba tshwanetseng go godisiwa. Jesu o bua jaana a bontsha sentle gore go na le phetogo e kgolo e e diregang:

“Molao wa ga Moshe le mafoko a baporofeti a ne a nna gone go fitlha Johane a tla. Go tloga ka nako eo, go rerwa dikgang tse di molemo tsa Bogosi Jwa Modimo, mme batho ba mefuta yotlhe ba dira ka natla gore ba tsene mo go jone. Eleruri, go motlhofo gore legodimo le lefatshe di fete go na le gore ntlhanyana e le nngwe ya tlhaka ya Molao e se ka ya diragala.” (Luke 3:18; 16:16, 17) Mafoko ano a ga Jesu a bontsha jang gore phetogo eno e a direga?

Baeteledipele bano ba Bajuda ba ba boikgogomoso, ba ipolela gore ba ikobela Molao wa ga Moshe. Gopola gore fa Jesu a ne a fodisa monna yo o neng a foufetse kwa Jerusalema, Bafarasai ba ne ba bua jaana ka boikgogomoso: “Rona re barutwa ba ga Moshe. Re a itse gore Modimo o buile le Moshe.” (Johane 9:13, 28, 29) Boikaelelo jwa Molao o Modimo a neng a o neile Baiseraele a dirisa Moshe, e ne e le go isa batho ba ba boikokobetso kwa go Mesia, ka mafoko a mangwe kwa go Jesu. Johane Mokolobetsi o ne a tlhalosa gore Jesu ke Kwana ya Modimo. (Johane 1:29-34) Go simologa ka nako ya bodiredi jwa ga Johane, Bajuda ba ba boikokobetso, segolobogolo bahumanegi, ba ntse ba utlwa ka “Bogosi Jwa Modimo.” Batho botlhe ba ba batlang go nna babusiwa ba Bogosi Jwa Modimo le go solegelwa molemo ke Bogosi joo, ba ka amogela “dikgang tse di molemo.”

Molao wa ga Moshe o fitlheletse boikaelelo jwa one, ka gonne o thusitse batho gore ba lemoge gore Mesia ke mang. Go ise go ye kae, batho ba Modimo ba tla bo ba sa tlhole ba patelesega go o ikobela. Ka sekai, Molao oo o ne o letla motho gore a ka tlhala ka mabaka a a farologaneng, mme jaanong Jesu o tlhalosa gore “mongwe le mongwe yo o tlhalang mosadi wa gagwe a bo a nyala yo mongwe o dira boaka, e bile ope fela yo o nyalang mosadi yo o tlhadilweng, o dira boaka.” (Luke 16:18) Ruri mafoko ano a galefisa Bafarasai bano ba ba ratang go baya melao mo go sengwe le sengwe!

 Jaanong o dira setshwantsho se se bontshang gore phetogo eno e kgolo go le kana kang. Setshwantsho seno se bua ka banna ba babedi, ba maemo a bone a fetogang ka tsela e e gakgamatsang. Fa o ntse o sekaseka setshwantsho seno, gopola gore bangwe ba batho ba ba reeditseng Jesu ke Bafarasai ba ba ratang madi, ba ba tseelwang kwa godimo ke batho.

Jesu a re: “Go ne go na le monna mongwe wa mohumi yo o neng a tle a apare diaparo tsa letsela le le phepole le tse di dirilweng ka letsela le le boleta, a ijesa monate letsatsi le letsatsi e bile a tshela botshelo jwa manobonobo. Mme mokopi mongwe yo o bidiwang Lasaro o ne a tle a tlisiwe fa kgorong ya gagwe, mme o ne a dule mathopa mo mmeleng otlhe e bile o ne a eletsa go ja dilo tse di wang mo tafoleng ya monna wa mohumi. Tota le dintša di ne di tlhola di tla go latswa mathopa a gagwe.”—Luke 16:19-21.

Bafarasai ba rata madi, ka jalo ga go pelaelo gore Jesu o tshwantsha bone le “monna wa mohumi.” Gape baeteledipele bano ba Bajuda, ba rata go apara diaparo tse di magasigasi tse di turang. Mo godimo ga dikhumo tse ba ka tswang ba na le tsone, go lebega e kete Modimo o ba segofatsa go feta batho ba bangwe. Jesu o ba tshwantsha le monna yo o apereng seaparo se se phepole e le go bontsha gore ba rata maemo a a kwa godimo, mme letsela le lesweu le le boleta le bontsha gore ba itsaya ba siame.—Daniele 5:7.

Baeteledipele bano ba ba humileng ba ba boikgogomoso, ba leba jang bahumanegi ba maemo a a kwa tlase? Ba a ba nyatsa ka gonne ba ba bitsa ʽam ha·ʼaʹrets, kgotsa batho ba naga (lefatshe), ba ba sa  itseng Molao e bile ba sa tshwanelwe ke go o rutwa. (Johane 7:49) Seno se tlhalosa sentle boemo jwa “mokopi mongwe yo o bidiwang Lasaro,” yo o eletsang go ja ‘dilo tse dinnye tse di wang mo tafoleng ya monna wa mohumi.’ Fela jaaka Lasaro yo mmele wa gagwe o tletseng mathopa, batho bano ba ba humanegileng ba lebelwa kwa tlase, jaaka e kete ba a lwala ka tsela ya tshwantshetso.

Boemo jono jo bo hutsafatsang bo ntse bo le gone ka lobaka lo loleele, mme gone Jesu o a itse gore jaanong ke nako ya gore maemo a batho ba ba tshwanang le monna wa mohumi le a batho ba ba tshwanang le Lasaro, a fetoge ka tsela e e gakgamatsang.

Jesu o tswelela a tlhalosa kafa maemo a banna bano a fetogang ka gone ka tsela e e gakgamatsang. A re: “Jaanong fa nako e ntse e tsamaya, mokopi yoo o ne a swa mme baengele ba ne ba mo tseela kwa letlhakoreng la ga Aborahame. Monna wa mohumi le ene o ne a swa mme a fitlhwa. Fa a le mo Lebitleng o ne a tsholetsa matlho a gagwe, ka gonne o ne a utlwa botlhoko, mme o ne a bona Aborahame a le kgakala thata mme Lasaro a le fa letlhakoreng la gagwe.”—Luke 16:22, 23.

Batho ba ba reeditseng Jesu ba a itse gore Aborahame ga a bolo go swa le gore o mo Lebitleng. Dikwalo di tlhalosa sentle gore ga go na ope yo o mo Lebitleng kgotsa mo Sheole, yo o kgonang go bona kgotsa go bua, go akaretsa le Aborahame. (Moreri 9:5, 10) Jaanong, baeteledipele bano ba akanya gore Jesu o kaya eng ka setshwantsho seno? Ke eng se Jesu a ka tswang a batla go se gatelela ka batho ba maemo a a kwa tlase le ka baeteledipele ba bodumedi ba ba ratang madi?

Jesu o sa tswa go tlhalosa gore go tla nna le phetogo, fa a re ‘Molao wa ga Moshe le mafoko a Baporofeti a ne a nna gone go fitlha Johane Mokolobetsi a tla, mme go tloga ka nako eo go rerwa dikgang tse di molemo tsa Bogosi Jwa Modimo.’ Ka jalo, ka ntlha ya go rera ga ga Johane le Jesu Keresete, Lasaro le monna wa mohumi ba a swa mo maemong a bone a pele, ba bo ba amogela maemo a masha fa pele ga Modimo.

Ke kgale batho ba maemo a a kwa tlase ba ba ikokobeditseng ba sa newe tshono ya go ithuta ka Modimo. Mme jaanong ba bona thuso fa ba amogela molaetsa wa Bogosi, o la ntlha o neng o rerwa ke Johane Mokolobetsi mme gone jaanong o rerwa ke Jesu. Pele ga moo, ba ne ba tshwanelwa ke go tshela ka mafofora a ‘dilo tse di wang mo tafoleng ya tshwantshetso’ ya baeteledipele ba bodumedi. Gone jaanong ba fepiwa ka dithuto tsa botlhokwa tse di tswang mo Dikwalong, segolobogolo dilo tse di kgatlhang tse Jesu a ba tlhalosetsang tsone. Go ntse jaaka e kete kgabagare ba mo maemong a a amogelesegang mo matlhong a ga Jehofa Modimo.

Go farologana le bone, baeteledipele ba bodumedi bone ba gana go amogela molaetsa wa Bogosi o  Johane a neng a o rera le o Jesu a ntseng a o rera. (Mathaio 3:1, 2; 4:17) Tota e bile, ba galefisiwa kgotsa ba tlhokofadiwa ke molaetsa oo, o o buang ka katlholo e e fisang e e tswang kwa Modimong. (Mathaio 3:7-12) Baeteledipele bano ba bodumedi ba ba ratang madi, ba ne ba ka imologa tota fa Jesu le barutwa ba gagwe ba ne ba ka kgaotsa go rera molaetsa wa Modimo. Ba tshwana le monna wa mohumi wa setshwantsho sa ga Jesu, yo o reng: “Rre Aborahame, nkutlwele botlhoko mme o rome Lasaro gore a tsenye ntlha ya monwana wa gagwe mo metsing a bo a tla go tsidifatsa loleme lwa me, ka gonne ke mo botlhokong jo bo ngomolang pelo mo molelong ono o o fisang.”—Luke 16:24.

Mme gone seo se ka se direge. Bontsi jwa baeteledipele bano ba bodumedi ga ba kitla ba fetoga. Ba ganne go reetsa se se kwadilweng ‘mo dibukeng tsa ga Moshe le tsa Baporofeti,’ tse di ka bong di ba thusitse go dumela gore Jesu ke Mesia yo o rometsweng ke Modimo le gore ke Kgosi. (Luke 16:29, 31; Bagalatia 3:24) Gape ga ba ikokobetse e bile ga ba itetle go tlhotlhelediwa ke batho ba ba humanegileng ba ba amogelang Jesu, ba jaanong ba amogelwang ke Modimo. Barutwa ba ga Jesu bone ba ka se fetole boammaaruri e le fela gore ba kgotsofatse baeteledipele ba bodumedi kgotsa ba ba imolole. Mo setshwantshong seno, Jesu o tlhalosa ntlha eno ka mafoko ano a “Rre Aborahame” a a bolelang monna wa mohumi:

“Ngwanaka, gakologelwa gore o ne o itumelela dilo tse di molemo ka botlalo fa o sa ntse o tshela, mme Lasaro ene o ne a amogela dilo tse di bosula fela. Le fa go ntse jalo, gone jaanong ene o a gomodiwa fano, mme wena o mo botlhokong jo bo ngomolang pelo. E bile mo godimo moo, go na le khuti e kgolo thata fa gare ga rona le lona, gore ba ba batlang go tswa fano ba ya kwa go lona ba se ka kgona, le gore batho ba ba ka koo ba se ka ba kgabaganyetsa ka kwano.”—Luke 16:25, 26.

Ruri go a tshwanela gore phetogo eno e e gakgamatsang e direge! Seno se felela ka gore maemo a baeteledipele ba bodumedi le a batho ba ba boikokobetso ba ba mogelang jokwe ya ga Jesu, a fetoge. Batho bano ba ba boikokobetso ba a lapolosiwa e bile ba a fepiwa ka tsela ya tshwantshetso. (Mathaio 11:28-30) Phetogo eno e tla bonala sentle mo dikgweding di le mmalwa fa kgolagano ya Molao e tla bo e emisediwa ke kgolagano e ntšha. (Jeremia 31:31-33; Bakolosa 2:14; Bahebera 8:7-13) Fa Modimo a tla bo a tsholola moya o o boitshepo ka letsatsi la Pentekosete ya 33 C.E., go tla bonala sentle gore Modimo o amogela barutwa ba ga Jesu, e seng Bafarasai le ditsala tsa bone.