A GO na le motho yo o neng a ka kgona go nna a ikanyega mo Modimong fa a lekwa botlhoko le fa go nna kutlo ga gagwe go ne go se kitla go dira gore a duelwe? Eo ke potso e e neng ya bodiwa le go arabiwa mo kgannyeng e e amang monna mongwe yo o bidiwang Jobe.

Fa Baiseraele ba ne ba sa ntse ba le kwa Egepeto, mongwe wa losika lwa ga Aborahame e bong Jobe, o ne a nna kwa motseng o gompieno o bidiwang Arabia. Mo go yone nako eo, baengele kwa legodimong ba ne ba kokoana fa pele ga Modimo, mme Satane wa motsuolodi le ene o ne a le teng. Pele ga pokano eo ya kwa legodimong, Jehofa o ne a tlhalosa kafa a ikanyang motlhanka wa gagwe yo o ikanyegang e bong Jobe ka gone. Tota e bile, Jehofa o ne a re ga go motho ope yo o neng a ikanyega jaaka Jobe. Mme Satane ene o ne a re Jobe o direla Modimo fela ka gonne Modimo a mo segofatsa e bile a mo sireletsa. A re fa Jobe a ne a ka tseelwa dilo tsotlhe tsa gagwe, o ne a tla tlhapatsa Modimo.

Modimo o ne a letla Satane gore a amoge Jobe dikhumo tsa gagwe le bana ba gagwe mme morago ga moo a mo lwatsa. E re ka Jobe a ne a sa lemoge gore Satane ke ene a mmakelang dilo tseno tsotlhe, o ne a sa tlhaloganye lebaka la go bo Modimo a mo letleletse gore a welwe ke diteko tseno. Le fa go ntse jalo, Jobe ga a ka a tlhanogela Modimo.

Ditsala tse tharo tsa maaka di ne tsa etela Jobe. Mo metlotlong e meleele e ba nnileng le yone e e kwadilweng mo bukeng ya Jobe, banna bano ba ne ba leka go dira gore Jobe a akanye gore Modimo o ne a mo otlhaela maleo mangwe a a a dirileng mo sephiring. Ba ile ba bo ba bolela gore Modimo ga a rate batlhanka ba gagwe e bile ga a ba tshepe. Jobe ga a ka a reetsa maaka a ba neng ba a bua. O ne a re o ikemiseditse go nna a bolokile bothokgami go fitlha a swa!

Mme phoso e Jobe a neng a e dira ke go leka go ipolela kafa a neng a siame ka gone. Lekawana lengwe le le bidiwang Elihu, le le neng le ntse le reeditse puisano eo yotlhe, le lone le ne la bua sengwe. Elihu o ne a kgalemelela Jobe go bo a palelwa ke go lemoga gore go tlotlomadiwa ga bolaodi jwa ga Jehofa Modimo go botlhokwa thata go feta go tlotlomadiwa ga motho ope fela. Gape o ne a kgalemela le ditsala tsa maaka tsa ga Jobe ka bogale.

Morago ga moo, Jehofa Modimo o ne a bua le Jobe, a baakanya tsela e a neng a akanya ka yone. Jehofa o ne a umaka dilo tse dintsi tse di kgatlhang tsa popo go ruta Jobe gore motho ga se sepe fa a bapisiwa le bogolo jwa Modimo. Jobe o ne a nna boikobo mme a amogela kgakololo ya Modimo. E re ka Jehofa a le ‘pelonomi tota mo go bontsheng lorato e bile a le kutlwelobotlhoko,’ o ne a fodisa Jobe, a oketsa dikhumo tsa gagwe go menagane gabedi a bo a mo segofatsa ka bana ba le lesome. (Jakobe 5:11) E re ka Jobe a ile a nna a ikanyega mo go Jehofa le fa a ne a lekwa botlhoko, o ne a atlega go araba kgwetlho ya ga Satane ya gore batho ga ba kitla ba nna ba ikanyega mo Modimong fa ba lekwa.

—E tswa mo bukeng ya Jobe.