Fora “Basupi ba ga Jehofa ke baagi ba ba tlotlang melao ya Repaboliki. . . . Ga ba senye kagiso ya setšhaba. Ba a bereka, ba duela makgetho mme ba nna le seabe mo go tokafatseng ikonomi ya naga ya rona e bile ba thusa batho ba ba tlhokang. Go a itumedisa go bona batho bano ba ba tswang mo ditsong tsotlhe tse di farologaneng ba kopane mmogo ka kagiso. . . . Fa mongwe le mongwe e ka bo e le Mosupi wa ga Jehofa, rona mapodise re ka bo re se na tiro.”—Mmueledi wa mokgatlho wa sepodise sa kwa Fora.

Ukraine “Basupi ba ga Jehofa ba ruta bana ba bone melaometheo e e kwa godimo ya boitsholo. Ba ruta bana ba bone gore ba tile boitshwaro, ditiro le e leng boikutlo jo, [le fa] bo tsewa e le jo bo tlwaelegileng gompieno, bo ka nnang jwa gobatsa bana ka bobone le batho ba bangwe. Ka jalo, ba tlhagisa bana ba bone ka dikotsi tsa go dirisa diokobatsi, go goga motsoko le go sa dirise bojalwa sentle. Ba lemoga botlhokwa jwa go ikanyega le go bereka ka natla. . . . Basupi ba ga Jehofa ba ruta bana ba bone go nna le dinonofo tsa boitsholo jo bo siameng, go tlotla balaodi, batho ba bangwe le dithoto tsa bone le gore ba nne baagi ba ba ikobelang molao.”—The History of Religion in Ukraine, e e rulagantsweng ke Porofesa Petro Yarotskyi.

Italy “Go na le batho ba le 30 000 ba ba dutseng ka tidimalo kwa Olympic Stadium . . . Ga go na matlakala, ga go na modumo le go goa. Ke se se neng se bonala kwa Olympic Stadium maabane . . . Ga go na ope yo o dirang sengwe se se sa siamang, ga go na sekerete e bile ga go na le fa e le thini ya [dino]. O bona fela batho ba ba butseng Dibaebele tsa bone, ba ba kwalang dintlha le bana ba ba dutseng ka tidimalo.”—Lokwalodikgang lwa L’Unità lo ne lo bega ka kopano ya kgaolo ya Basupi ba ga Jehofa e e neng e tshwaretswe kwa Roma.

Boritane “Motiakonemogolo wa kwa Cheltenham o ne a bolela gore [Kereke ya Engelane] e tlhoka ditlhopha tsa batho ba ba ineetseng ba ba dirang tiro e e tshwanang le ya Basupi ba ga Jehofa.”—The Gazette, Gloucester Diocese.

 Netherlands Batho ba ba nnang gaufi le Holo ya Bogosi kwa toropong ya Leeuwarden ba ne ba kwalela Basupi ba koo lekwalo le le neng le re: “Re rata go lo akgola ka ntlha ya tlhotlheletso ya lona e e molemo thata malebana le kafa Noorderweg [Tsela ya Noorder] e lebegang ka teng. Maloko a lona ka metlha a apara sentle e bile a na le maitseo a mantle. Bana ba itshwere sentle, bagolo ga ba ke ba paka dikoloi tsa bone mo ba sa tshwanelang teng, ga ba latlhele matlakala mo mmileng mme tikologo ya Holo ya Bogosi e nna e le phepa e bile e le bothakga. Re solofela gore lo tla tswelela lo le baagelani ba rona ka nako e telele, ka gonne re itumelela go nna baagelani ba lona.”

Mexico Elio Masferrer, porofesa e bile e le mmatlisisi kwa National School of Anthropology and History, o ne a bolela gore Basupi ba thusitse batho ba ba “ileng ba nna le mathata a a masisi a lelapa a a jaaka go betelelwa, go sotliwa mo lelapeng, go tshwakgolwa ke bojalwa le go tshwakgolwa ke diokobatsi.” O ne a bolela gore dithuto tsa Basupi di “naya batho ba ba itsayang e se ba sepe seriti” mme di dira gore ba kgone go “tshela ba se na mathata a magolo ka go dira dilo tse di itumedisang Modimo.”—Lokwalodikgang lwa Excélsior.

Brazil Lokwalodikgang longwe lo ile lwa bega jaana: “Mokgatlho wa Basupi ba ga Jehofa o tlhomologile tota. Mafelo a ba kopanelang mo go one a phepa ka metlha. Sengwe le sengwe se rulagantswe sentle . . . Fa dikokoano tsa bone di fela, ba tlogela lefelo leo le le phepa go feta kafa ba le fitlhetseng le ne le ntse ka teng. Ka nako ya dipuo go nna le tidimalo e e feletseng. Ga go na ope yo o kgorometsang kgotsa yo o thulang ba bangwe. Go na le maitseo a mantle. . . . Ruri ke bodumedi jo bo nang le thulaganyo. Ba a itse gore go obamela Modimo go kaya eng.”—Comércio da Franca.

Basupi ba ga Jehofa ba dumela ba tlhomamisegile gore Mmopi o itse melaometheo e batho ba a ba bopileng ba tshwanetseng go tshela ka yone botoka go na le motho ope fela. (Isaia 48:17, 18) Ka jalo, Basupi ba a mo tlotlomatsa fa boitsholo jwa bone bo dira gore batho ba nne le dikakgelo tse di siameng. Jesu o ne a re: “A lesedi la lona le phatsime fa pele ga batho, gore ba tle ba bone ditiro tsa lona tse di molemo mme ba neye Rraalona yo o kwa magodimong kgalalelo.”—Mathaio 5:16.