1, 2. (a) “Mpho . . . ya mahala e e ka se kang ya tlhalosiwa” e akaretsa eng? (b) Re tla tlotla ka dipotso dife mo setlhogong seno?

JEHOFA o ile a re naya mpho e e di gaisang tsotlhe e e bontshang gore o a re rata ka go romela Morwawe e bong Jesu gore a tle mo lefatsheng! (Johane 3:16; 1 Johane 4:9, 10) Moaposetoloi Paulo o bitsa mpho eno a re ke “mpho . . . ya mahala e e ka se kang ya tlhalosiwa.” (2 Bakorintha 9:15) Ke eng fa a ne a e bitsa jalo?

² Paulo o ne a itse gore setlhabelo sa ga Jesu se tlhomamisa gore ditsholofetso tsotlhe tsa Modimo di tla diragadiwa. (Bala 2 Bakorintha 1:20.) Seno se bontsha gore “mpho . . . ya mahala e e ka se kang ya tlhalosiwa” e Modimo a re nayang yone e akaretsa setlhabelo sa ga Jesu, bomolemo le lorato lo lo ikanyegang lo Jehofa a re bontshang lone. Ga re kgone go tlhalosa le go tlhaloganya ka botlalo mpho eno e e tlhwatlhwakgolo. Re tshwanetse go ikutlwa jang ka mpho eno e e kgethegileng? Mme e tshwanetse ya re tlhotlheletsa go dira eng fa re ntse re ipaakanyetsa go gopola loso lwa ga Keresete ka Laboraro, March 23, 2016?

3, 4. (a) O ikutlwa jang fa mongwe a go naya mpho? (b) Mpho e e kgethegileng e ka fetola botshelo jwa gago jang?

³ Re itumela tota fa mongwe a re naya mpho. Mme go na le dimpho tse dingwe tse di leng botlhokwa thata jaana mo di ka fetolang botshelo jwa motho. Ka sekai, a re re o atlholetswe loso ka gonne o tlodile molao. Ka tshoganyetso fela, mongwe yo o sa mo itseng o ithaopela go go swela. O ne o tla ikutlwa jang ka motho yoo?

⁴ Lorato lo motho yoo a go bontshitseng lone lo tla dira gore o fetole botshelo jwa gago. Gongwe le wena o tla tlhotlheletsega go thusa batho ba bangwe le go ba rata kgotsa go itshwarela mongwe yo o go diretseng phoso. O tla nna o ntse o bontsha ka ditiro tsa gago gore o lebogela go bo motho yoo a ile a intsha setlhabelo go go thusa.

5. Mpho ya Modimo ya thekololo e gaisa dimpho tse dingwe jang?

⁵ Modimo o re neile mpho ya thekololo e e gaisang dimpho tsotlhe tse di kileng tsa nna gone. (1 Petere 3:18) Adame o fetiseditse boleo mo go rona mme katlholo ya boleo joo ke loso. (Baroma 5:12) Jehofa o re rata thata jaana mo a neng a romela Jesu go tla mo lefatsheng go swela batho botlhe le go ‘utlwela motho mongwe le mongwe loso.’ (Bahebera 2:9) Mme setlhabelo sa ga Jesu se tla dira dilo tse dikgolo, tse di jaaka go fedisa loso ka bosakhutleng. (Isaia 25:7, 8; 1 Bakorintha 15:22, 26) Batho botlhe ba ba bontshang tumelo mo go Jesu, e ka tswa e le ba ba yang go nna dikgosi le Keresete kwa legodimong kgotsa ba ba tla tshelang mo lefatsheng fa Bogosi Jwa Modimo bo busa, ba tla tshela ka kagiso ba itumetse go se tsapa le le ba fisang pelo. (Baroma 6:23; Tshenolo 5:9, 10) Mpho eno e Jehofa a re nayang yone e akaretsa ditshegofatso dife tse dingwe?

6. (a) Mpho ya ga Jehofa e dirile gore o letele ditshegofatso dife? (b) Ke dilo dife tse tharo tse mpho ya Modimo e go tlhotlheletsang gore o di dire?

⁶ Mpho eno ya Modimo e tla dira gore lefatshe le nne paradaise, gore balwetse ba fodisiwe le gore batho ba ba suleng ba tsosiwe. (Isaia 33:24; 35:5, 6; Johane 5:28, 29) Re rata Jehofa le Morwawe fela thata ka gonne ba re neile ‘mpho . . . ya mahala e e ka se kang ya tlhalosiwa.’ Mpho eno e re tlhotlheletsa gore re dire eng? Gore (1) re latele dikgato tsa ga Keresete Jesu gaufiufi, (2) re rate Bakeresete ba bangwe le (3) go itshwarela batho ba bangwe go tswa pelong.

7, 8. Go itse gore Keresete o a re rata go tshwanetse ga dira gore re ikutlwe jang mme go tshwanetse ga re rotloetsa go dira eng?

⁷ Sa ntlha, re tshwanetse go eletsa go tshela ka tsela e e bontshang gore re tlotla Jesu. Moaposetoloi Paulo o ne a re: “Lorato lo Keresete a nang le lone lo a re patelela.” (Bala 2 Bakorintha 5:14, 15.) Paulo o ne a itse gore fa re dumela gore Jesu o a re rata, re tla patelesega go mo rata le go mo tlotla. Fa re tlhaloganya ka botlalo se Jehofa a re diretseng sone, re tla patelesega go tshela ka tsela e e bontshang gore re tlotla Jesu. Re ka dira seo jang?

⁸ Fa re rata Jehofa, re tla batla go etsa sekao sa ga Jesu le go latela dikgato tsa gagwe gaufiufi. (1 Petere 2:21; 1 Johane 2:6) Re bontsha gore re rata Modimo le Keresete fa re ba ikobela. Jesu o ne a re: “Yo o nang le ditaelo tsa me e bile a di boloka, ene yoo ke yo o nthatang. Le yo o nthatang o tla ratwa ke Rre, mme ke tla mo rata ke ba ke  mo ipontsha ka papamalo.”—Johane 14:21; 1 Johane 5:3.

9. Ke eng se re ka iphitlhelang re patelesega go se dira?

⁹ Go botlhokwa gore ka paka ya Segopotso re akanyetse tsela e re tshelang ka yone. Ka jalo, re ka ipotsa jaana: ‘Ke dira eng go bontsha gore ke etsa sekao sa ga Jesu? Ke kae mo ke tlhokang go tokafatsa teng?’ Go botlhokwa gore re ipotse dipotso tseno ka gonne batho ba lefatshe leno ba batla gore re tshwane le bone. (Baroma 12:2) Fa re se kelotlhoko, re ka nna ra iphitlhela re patelesega go tshwana le barutisi, batho ba ba tumileng le bagaka bangwe ba metshameko. (Bakolosa 2:8; 1 Johane 2:15-17) Re ka tila seo jang?

10. Ke dipotso dife tse re ka ipotsang tsone ka paka ya Segopotso mme dikarabo tsa tsone di tshwanetse go re tlhotlheletsa go dira eng? (Bona setshwantsho se se simololang setlhogo.)

¹⁰ Go botlhokwa gore ka paka ya Segopotso re iphe nako ya go sekaseka tsela e re aparang ka yone, difilimi tse re di lebelelang, mmino o re o reetsang mmogo le dilo tse di mo dikhomputareng le mo difounong tsa rona. Ipotse jaana: ‘Fa Jesu a ka bo a le fano, a tsela e ke apereng ka yone e ne e tla ntlhabisa ditlhong?’ (Bala 1 Timotheo 2:9, 10.) ‘A tsela e ke apereng ka yone e ne e tla bontsha gore ke molatedi wa ga Keresete? A Jesu o ne a tla rata difilimi tse ke di lebelelang? A o ne a tla reetsa mmino o ke o reetsang? Fa a ne a ka nkopa gore ke mo adime founo ya me, a ke ne ke tla tlhabisiwa ditlhong ke dilo tse a tla di bonang mo go yone? A ke tla kgona go mo tlhalosetsa gore ke eng ke rata go tshameka metshameko ya bidio e ke nang le yone?’ Fa re rata Jehofa, re tla tlhotlheletsega go latlha sengwe le sengwe se Bakeresete ba sa tshwanelang go nna le sone, tota le fa se tura jang. (Ditiro 19:19, 20) Fa re ne re kolobediwa, re ne ra solofetsa Jehofa gore re tla tshela ka tsela e e bontshang gore re tlotla Keresete. Ke ka moo re sa tshwanelang go nna le dilo tse di dirang gore go nne thata go latela sekao sa ga Jesu.—Mathaio 5:29, 30; Bafilipi 4:8.

11. (a) Go rata Jehofa le Jesu go re rotloetsa jang mo tirong ya go rera? (b) Go rata Bakeresete ka rona go tla re rotloetsa gore re dire eng?

¹¹ Fa re rata Jesu, re tla batla go rera le go ruta batho Baebele. (Mathaio 28:19, 20; Luke 4:43) A o ka rulaganya gore ka paka ya Segopotso o nne mmulatsela yo o thusang mme o fetse diura di le 30 kgotsa di le 50 o le mo bodireding jwa tshimo? Moswagadi mongwe yo o nang le dingwaga di le 84 o ne a akanya gore a ka se kgone go nna mmulatsela ka gonne a godile e bile a lwala. Babulatsela ba mo phuthegong e a leng mo go yone ba ne ba batla go mo thusa. Ba ne ba mo rulaganyetsa sepalamo mme ba tlhopha tshimo e a ka kgonang go e bereka. Seno se ne sa dira gore a kgone go bega diura di le 30. A o ka kgona go thusa mongwe mo phuthegong ya lona gore a kgone go nna mmulatsela yo o thusang ka kgwedi ya March le April? Ke boammaaruri gore ga se mongwe le mongwe yo o kgonang go nna mmulatsela mme gone re ka dirisa nako le maatla a rona go dira mo go oketsegileng mo tirong ya ga Jehofa. Fa re dira jalo, fela jaaka Paulo, le rona re tla bo re bontsha gore re rata Jesu. Fa re rata Modimo, ke eng gape se re tla tlhotlheletsegang go se dira?

12. Fa re rata Modimo, re tla tlhotlheletsega go dira eng?

¹² Sa bobedi, go rata Modimo go dira gore re rate bakaulengwe ba rona. Moaposetoloi Johane o ne a re: “Baratwa, fa e le gore Modimo o re ratile jaana, rona ka  borona re patelesega go ratana.” (1 Johane 4:7-11) Ka jalo, fa re rata Modimo, re tla rata Bakeresete ka rona. (1 Johane 3:16) Re ka dira eng go bontsha Bakeresete ka rona gore re a ba rata?

13. Jesu o ne a re tlhomela sekao jang fa go tla mo kgannyeng ya go rata batho ba bangwe?

¹³ Jesu o ile a re tlhomela sekao sa kafa re ka bontshang ba bangwe ka gone gore re a ba rata. Fa a ne a le mo lefatsheng, o ne a thusa batho, segolobogolo ba ba nang le mathata. O ne a fodisa batho ba ba lwalang, ba ba golafetseng, ba ba sa boneng, ba ba sa utlweng le ba ba sa bueng. (Mathaio 11:4, 5) Jesu o ne a sa tshwane le baeteledipele ba bodumedi ka gonne ene o ne a rata go ruta batho ka Modimo. (Johane 7:49) O ne a rata batho e bile a iketleeleditse go ba thusa.—Mathaio 20:28.

14. Ke eng se o ka se dirang go bontsha Bakeresete ka wena gore o a ba rata?

¹⁴ Paka ya Segopotso e re naya tshono ya go thusa Bakeresete ba ba mo diphuthegong tsa rona, segolo jang ba ba godileng. A o ka ipha nako ya go ba etela, go ba leretse dijo, go ba thusa ka ditiro tsa mo ntlong, go ba rulaganyetsa sepalamo sa go ya dipokanong kgotsa go ba laletsa gore ba tsamaye le wena mo bodireding? (Bala Luke 14:12-14.) E kete lorato lo o ratang Modimo ka lone lo ka go tlhotlheletsa gore o rate Bakeresete ka wena!

15. Ke eng se re sa tshwanelang go se lebala?

¹⁵ Sa boraro, fa re rata Jehofa, re tla tlhotlheletsega go itshwarela bakaulengwe ba rona. Rotlhe re baleofi e bile re a swa, ka jalo, ga go ope yo o ka reng, “Nna ga ke tlhoke thekololo.” Tota le Bakeresete ba ba diretseng Modimo ka lobaka lo loleele ba sa ntse ba tlhoka thekololo. Mongwe le mongwe wa rona o itshwaretswe molato o o seng kana ka sepe! Ke eng fa go le botlhokwa go gakologelwa ntlha eno? Karabo e mo setshwantshong sengwe se Jesu a neng a se dira.

16, 17. (a) Setshwantsho sa ga Jesu sa kgosi le batlhanka ba yone, se re ruta eng? (b) Go akanya ka setshwantsho sa ga Jesu go go tlhotlheletsa go dira eng?

¹⁶ Jesu o ne a bua ka kgosi nngwe e e neng ya itshwarela motlhanka wa yone yo o neng a e kolota didenario di le 60 000 000. Mme motlhanka yoo o ne a palelwa ke go itshwarela motlhanka ka ene yo o neng a mo kolota didenario di le 100. Motlhanka yoo o tshwanetse a ka bo a ile a utlwela motlhanka ka ene botlhoko ka gonne le ene kgosi e ne e mo utlwetse botlhoko. Kgosi e ne e galefile tota fa e utlwa se motlhanka yono a se dirileng. E ne ya re: “Motlhanka yo o boikepo ke wena, ke ne ka go phimolela molato ole otlhe, fa o ne o nthapela. A le wena o ne o sa tshwanela go utlwela motlhankammogo le wena botlhoko, jaaka le nna ke ne ka go utlwela botlhoko?” (Mathaio 18:23-35) Fela jaaka kgosi eo, Jehofa le ene o phimotse sekoloto se segolo se re  neng re mo kolota sone. Lorato lwa ga Jehofa le kutlwelobotlhoko ya gagwe di tshwanetse tsa re tlhotlheletsa go dira eng?

¹⁷ Fa re ntse re ipaakanyetsa Segopotso, re ka nna ra ipotsa jaana: ‘A go na le mokaulengwe yo o nkutlwisitseng botlhoko? A go thata gore ke mo itshwarele?’ Fa go le jalo, go botlhokwa gore re etse Jehofa yo ‘o iketleeleditseng go itshwarela.’ (Nehemia 9:17; Pesalema 86:5) Re utlwela batho ba bangwe botlhoko e bile re a ba itshwarela ka gonne Jehofa le ene a re utlwela botlhoko. Fa re sa kgone go rata batho ba bangwe le go ba itshwarela, re ka se lebelele gore Jehofa le ene a re rate le go re itshwarela. (Mathaio 6:14, 15) Ga se gore go itshwarela motho go raya gore ga a re utlwisa botlhoko go na le moo go re thusa gore re itumele.

18. Go rata Modimo go ile ga thusa jang kgaitsadi mongwe gore a itshokele makoa a Mokeresete ka ene?

¹⁸ Go ka nna thata go itshokela makoa a bakaulengwe ba rona. (Bala Baefeso 4:32; Bakolosa 3:13, 14.) Seo se ne sa diragalela Lily. ^[1] (Bona ntlha e e kwa bofelong jwa setlhogo.) O ne a thusa Carol wa motlholagadi. Ka sekai, o ne a isa Carol gongwe le gongwe fela kwa a neng a batla go ya gone, a mo thusa go ya kwa mabenkeleng le go mo thusa ka ditsela tse dingwe. Le fa go ntse jalo, Carol o ne a tlhola a ngongorega mme ka dinako tse dingwe go ne go se motlhofo go mo thusa. Lily ga a ka a fela pelo go na le moo o ne a tlhoma mogopolo mo bothong jo bontle jwa ga Carol mme a mo thusa ka lobaka lo loleele go fitlha Carol a tlhokafala. Lily a re: “Ke lebile pele go bona Carol fa a tsosiwa. Ke batla go bona gore ke motho yo o ntseng jang fa a sa tlhole a na boleo.” Ke boammaaruri gore fa re rata Modimo re tla kgona go itshokela makoa a Bakeresete ka rona e bile re tla letela nako e ka yone batho ba tla bong ba se na boleo.

19. “Mpho ya . . . mahala e e ka se kang ya tlhalosiwa” e Modimo a re neileng yone, e re tlhotlheletsa go dira eng?

¹⁹ Ruri Jehofa o re neile “mpho ya . . . mahala e e ka se kang ya tlhalosiwa.” A re se kgaotseng go mo lebogela yone! Ka nako ya Segopotso, re ka akanya ka dilo tsotlhe tse Jehofa le Jesu ba re diretseng tsone. E kete lorato lwa ga Jehofa le la ga Jesu lo ka re tlhotlheletsa gore re etse sekao sa ga Jesu, re bontshe bakaulengwe ba rona gore re a ba rata le go ba itshwarela go tswa pelong.