GO ITUMEDISA tota go bona gore basha ba le bantsi ba Basupi ba tlhofofatsa matshelo a bone gore ba kgone go oketsa bodiredi jwa bone jwa Bokeresete. (Math. 6:22) Ba dira diphetogo dife? Ba lebana le dikgoreletsi dife? Gore re kgone go bona seo, a re utlweng ka bangwe ba gone jaanong ba direlang kwa Mexico.

Dustin le Jassa ba ba tswang kwa United States ba nyalane ka Ferikgong 2007. Nakwana fela morago ga moo, ba ne ba fitlhelela sengwe se ba neng ba sa bolo go eletsa go nna le sone—go reka seketswana se ba neng ba tla nna mo go sone. Ba ne ba se emisa gaufi le Astoria kwa Oregon, U.S.A., toropo e ntlentle e e gaufi le Lewatle la Pacific, e e dikologilweng ke dithabana tse di nang le dikgwa le dithaba tse di apesitsweng ke kapoko. Dustin a re: “Gongwe le gongwe kwa o lebang gone, o ne o bona bontle jo bo jesang kgakge!” Banyalani bano ba ne ba akanya gore ba tshela botshelo jo bo motlhofo e bile ba ikaegile ka Jehofa. Ba ne ba ipolelela gore, ‘Kana e bile re nna mo seketswaneng sa dimetara di le robedi, re bereka malatsi a a rileng fela, re kopanela le phuthego ya puo e sele mme ka dinako dingwe re tsaya bobulatsela jo bo thusang.’ Le fa go ntse jalo, fa nako e ntse e ya ba ne ba lemoga gore ba ntse ba itsietsa. Dustin a re: “Go na le go ema nokeng dithulaganyo tsa phuthego, re ne re nna re tshwaregile ka go baakanya seketswana sa rona. Re ne re itse gore fa e le gore re batla go dira gore Jehofa a tle pele mo matshelong a rona, re tshwanetse go fetola tsela e re tshelang ka yone.”

 Jassa a re: “Pele ga ke nyalwa, ke ne ke nna kwa Mexico mme ke ne ke kopanela le phuthego ya Seesemane. Ke ne ke itumelela go direla koo mme ke ne ke tlhoafaletse go boela gone.” Dustin le Jassa ba ne ba dirisa kobamelo ya lelapa go bala ka maitemogelo a bakaulengwe le bokgaitsadi ba ba ileng ba fudugela kwa dinageng tse dingwe kwa masimo a neng a siametse go rojwa gone, e le gore ba godise keletso e ba neng ba na le yone ya go direla kwa nageng e sele. (Joh. 4:35) Dustin a re: “Re ne re batla go itumela fela jaaka bone.” E rile ditsala tsa ga Dustin le Jassa tsa kwa Mexico di ba bolelela gore setlhopha se se sa tswang go tlhomiwa se tlhoka thuso, banyalani bano ba ne ba dira tshwetso ka kgang eno. Ba ne ba tlogela ditiro tsa bone, ba rekisa seketswana sa bone mme ba fudugela kwa Mexico.

Dustin le Jassa ba ne ba nna kwa Tecomán—e le yone e neng e le gaufi le Lewatle la Pacific mme e le dikilometara di ka nna 4 300 kwa borwa jwa Astoria. Dustin a re: “Mono ga go na pheswana e e tsiditsana le dithaba tse dintle, go na le moo, go mogote o o ntshang tlhapi mo metsing mme se o se bonang fela ke ditlhare tsa disurunamune.” Kwa tshimologong ba ne ba sa kgone go bona tiro. E re ka ba ne ba se na madi, ba ne ba ja raese le dinawa gabedi ka letsatsi, beke le beke. Jassa a re: “Fa re setse re lapisitswe ke go ja dijo tseno, batho ba re neng re ithuta Baebele le bone, ba ne ba re tlisetsa dimenku, dipanana, diphopho le dikgetsi tsa disurunamune.” Fa nako e ntse e ya, banyalani bano ba ne ba bona tiro kwa sekolong se se kwa Taiwan se se dirisang Internet go ruta batho puo. Gone jaanong madi a ba a amogelang ka go dira tiro eno a kgona go ba thusa gore ba itlamele ka dilo tse ba di tlhokang letsatsi le letsatsi.

Dustin le Jassa ba ikutlwa jang ka botshelo jo ba bo tshelang gone jaanong? Ba re: “Eno ke tshwetso e e molemolemo e re kileng ra e dira. Kamano ya rona re le banyalani le kamano e re nang le yone le Jehofa e nonofile go feta kafa re neng re akanya ka gone. Letsatsi le letsatsi re dira dilo di le dintsi mmogo—re ya tshimong, re tlotla kafa re ka thusang ka gone batho ba re ithutang Baebele le bone e bile re baakanyetsa dipokano mmogo. Gape ga re tlhole re na le dikgatelelo tse re neng re na le tsone pele.” Ba bua jaana gape: “Gone jaanong re itse sengwe se pele re neng re sa se tlhaloganye ka botlalo—boammaaruri jwa tsholofetso e e mo go Pesalema 34:8, ‘Lekang mme lo bone gore Jehofa o molemo.’”

Bakaulengwe le bokgaitsadi ba ba fetang 2 900—ba ba leng mo lenyalong le ba ba seng mo go lone, ba bontsi jwa bone ba leng mo dingwageng tsa bo20 le bo30—ba ile ba fuduga mme ba ya go direla kwa dikgaolong tsa Mexico tse go sa ntseng go na le tlhokego e kgolwane ya baboledi ba Bogosi kwa go tsone. Ke eng fa Basupi bano botlhe ba ile ba ithaopela go dira tiro eno e e nang le dikgwetlho? Fa bangwe ba bone ba ne ba bodiwa potso eno, ba ne ba ntsha mabaka a le mararo a konokono. Mabaka ao ke afe?

 Go bontsha gore ba rata Jehofa le batho ba bangwe. Leticia o kolobeditswe a le dingwaga di le 18. A re: “Fa ke ne ke ineela mo go Jehofa, ke ne ke tlhaloganya gore seno se kaya gore ke mo direle ka pelo ya me yotlhe le ka moya otlhe. Ka jalo, ke ne ke batla go dirisa nako e e oketsegileng le maatla a me ke direla Jehofa e le go bontsha gore tota ke mo rata ka pelo yotlhe.” (Mar. 12:30) Hermilo, yo jaanong a nyalaneng le Leticia o ne a sa tswa go simolola dingwaga tsa bo20 fa a ne a fudugela kwa go nang le tlhokego e kgolwane ya bareri ba Bogosi gone. A re: “Ke lemogile gore go thusa batho go bona se ba se tlhokang semoyeng ke yone tsela e e molemolemo ya go bontsha gore ke rata moagelani.” (Mar. 12:31) Ka jalo, o ne a fuduga go tswa kwa toropong e e humileng ya Monterrey, kwa a neng a bereka mo bankeng gone e bile a tshela botshelo jwa manobonobo, mme a ya kwa toropong e nnye.

Go bona boitumelo jwa mmatota jo bo nnelang ruri. Nakwana fela morago ga gore Leticia a kolobediwe, o ne a tsamaya le kgaitsadi mongwe wa mmulatsela yo o nang le maitemogelo go ya kwa toropong nngwe e e kgakala mme ba ne ba rera kgwedi yotlhe koo. Leticia a re: “Ke ne ke gakgametse. Ke ne ke itumela tota fa ke bona kafa batho ba neng ba amogela molaetsa wa Bogosi ka gone. Fa kgwedi eo e fela, ke ne ka ipolelela jaana, ‘Seno ke sone se ke batlang go se dira mo botshelong!’” Kgaitsadi mongwe yo o sa nyalwang yo o mo dingwageng tsa bo20 yo o bidiwang Essly le ene o ne a kgatlhiwa ke boitumelo jo a neng a bona batho ba ba mo tirelong eo ba na le jone. Fa a ne a sa ntse a le kwa sekolong se segolwane, o ne a kopana le Basupi ba le mmalwa ba ba tlhagafetseng ba ba neng ba direla kwa go nang le tlhokego e e kgolwane gone. A re: “Fa ke bona kafa bakaulengwe le bokgaitsadi bao ba neng ba itumetse ka gone, seo se ne sa dira gore le nna ke batle go tshela ka tsela e ba neng ba tshela ka yone.” Bokgaitsadi ba le bantsi ba dirile fela jaaka Essly. Tota e bile, bokgaitsadi ba ba sa nyalwang ba ba fetang 680 kwa Mexico, ba direla kwa go nang le tlhokego e kgolwane gone. Ruri ba tlhometse basha le batho ba bagolo sekao se se molemo!

Go tshela botshelo jo bo nang le bokao le jo bo kgotsofatsang. Fa Essly a fetsa sekolo, o ne a solofediwa basari ya go ya kwa yunibesithing. Balekane ba gagwe ba ne ba mo rotloetsa gore a e amogele mme a tshele se go tweng ke “botshelo jo bo tlwaelegileng”—gore a nne le dikirii ya yunibesithi, a nne le tiro, koloi, mme a kgone go tsaya maeto. Le fa go ntse jalo, ga a ka a dirisa kgakololo ya bone. A re: “Ditsala tsa me tsa Bakeresete di le mmalwa di ne di lateletse dilo tseno mme ke ne ke lemogile gore ba ne ba sa tlhole ba dira gore mekgele ya semoya e nne yone e e tlang pele mo botshelong jwa bone. Gape ke ne ka lemoga gore ba ne ba feleletsa ba tlaletswe ka ntlha ya mathata a ba lebanang le one fa ba ntse ba tshwarega ka dilo tsa lefatshe leno. Ke ne ke batla go direla Jehofa ka botlalo ke sa ntse ke le mosha.”

Essly o ne a dira dikhoso tsa tlaleletso tse di neng tsa mo thusa gore a kgone go bona tiro e le gore a nne le madi a go itshedisa fa e ntse e le mmulatsela, mme go tswa foo  o ne a fudugela kwa go neng go na le tlhokego e kgolo ya baboledi ba Bogosi gone. O ne a bo a lebana le kgwetlho ya go ithuta dipuo tse di buiwang ke Ba-Otomi le Ba-Tlapaneco. Gone jaanong fa a akanya ka dingwaga di le tharo tse a di feditseng a rera kwa mafelong a a kgakala, a re: “Go direla kwa go nang le tlhokego e kgolwane gone go dirile gore ke kgotsofale le gore botshelo jwa me bo nne le bokao jwa mmatota. Sa botlhokwa le go feta ke gore seno se nonotshitse kamano ya me le Jehofa.” Phillip le Racquel, banyalani ba ba tswang kwa United States, ba ba leng mo dingwageng tsa bo30 ba dumalana le seno. Ba re: “Lefatshe le fetoga ka bonako jaana mo batho ba le bantsi ba akanyang gore matshelo a bone ga a tlhomama. Mme gone, go direla kwa go nang le batho ba le bantsi ba ba sa ntseng ba reetsa molaetsa wa Baebele go dira gore botshelo jwa rona bo nne le bokao. Go kgotsofatsa tota!”

Gone ke boammaaruri gore go direla kwa go nang le tlhokego e kgolwane ya baboledi ba Bogosi gone go na le dikgwetlho. Nngwe ya dikgwetlho tseno ke gore o tla kgona jang go itlamela. Gore o kgone go itlamela, o tla tshwanelwa ke go dira gore botshelo jwa gago bo tsamaisane le maemo a lefelo le o leng mo go lone. Verónica yo e leng mmulatsela yo o nang le maitemogelo, a re: “Kwa lefelong lengwe le ke neng ke direla kwa go lone, ke ne ke apaya dijo tse di sa tureng ke bo ke di rekisa. Kwa lefelong le lengwe, ke ne ke rekisa diaparo le go poma batho meriri. Gone jaanong tiro ya me ke go phepafatsa ntlo nngwe, gape ke ruta batsadi ba basha tsela ya go buisana le bana ba bone.”

Go tlwaela setso le dingwao tse dingwe e ka nna kgwetlho, segolobogolo fa o nna mo lefelong le o sa tsholelwang mo go lone e bile le le kgakala. Go ne go ntse jalo ka Phillip le Racquel fa ba ne ba direla mo tshimong ya batho ba ba buang Se-Nahuatl. Phillip a re: “Setso sa bone se ne se farologane fela thata le sa rona.” Ke eng se se ileng sa ba thusa gore ba kgone go tlwaela? “Re ne ra tlhoma mogopolo mo dilong tse di molemo tse re neng re di bona mo bathong ba ba buang Se-Nahuatl—tsela e malapa a bone a neng a atamalane ka yone, kafa ba neng ba dirisana ka boikanyegi ka gone le go nna pelotshweu ga bone.” Racquel le ene a re: “Go nna mo lefelong leo le go direla mmogo le bakaulengwe le bokgaitsadi ba rona ba koo go ne ga re ruta go le gontsi.”

Fa e le gore o batla go direla kwa mafelong a a kgakala a go nang le tlhokego kwa go one, o ka dira eng gone jaanong gore o ipaakanyetse seno? Bakaulengwe le bokgaitsadi ba ba nang le maitemogelo mo tirelong eno ba re: Pele ga o fuduga, simolola ka go tlhofofatsa botshelo jwa gago mme o ithute go kgotsofalela se o nang le sone. (Bafil. 4:11, 12) Ke eng gape se o ka se dirang? Leticia a re: “Ke ne ke sa batle go dira tiro e e neng e tla mpateletsa gore ke nne mo lefelong le le lengwe nako e telele. Ke ne ke batla gore nako nngwe le nngwe ke kgone go fudugela gongwe le gongwe kwa ke batlang go ya gone.” Hermilo a re: “Ke ne ka ithuta go apaya, go tlhatswa le go aena.” Verónica a re: “Fa ke ne ke sa ntse ke nna kwa gae le batsadi ba me le bana ba gaetsho, ke ne ke thusa ka go phepafatsa, ka bo ka ithuta go apaya dijo tse di sa jeng madi a mantsi mme gone di na le dikotla. Gape ke ne ka ithuta go boloka madi.”

Levi le Amelia ba ba tswang kwa United States ba ba nang le dingwaga di le robedi ba nyalane, ba bolela kafa go rapelela sengwe se se rileng go ba thusitseng ka gone go ipaakanyetsa go direla kwa Mexico. Levi a re: “Re ne ra batlisisa gore go direla kwa nageng e sele ngwaga otlhe go tla tlhoka madi a a kana kang mme go tswa foo re ne ra kopa Jehofa ka thapelo gore a re thuse go nna le one madi ao.” Mo dikgweding di le mmalwa fela, ba ne ba kgona go kokoanya madi a ba neng ba kopile Jehofa gore a ba thuse go nna le one mme ba fuduga ka yone nako eo. Levi a re: “Jehofa o ne a re naya sone se re se kopileng, jaanong re ne re tshwanetse go diragatsa se re se buileng.” Amelia le ene a re: “Re ne re akantse gore re tla nna mono ngwaga o le mongwe fela, mme jaanong re setse re na le dingwaga di le supa re le fano e bile ga re akanye gore re tla tsamaya! Go nna mono go dira gore re bone kafa Jehofa a re thusang ka gone. Letsatsi le letsatsi re bona bosupi jwa bomolemo jwa gagwe.”

Adam le Jennifer, banyalani ba ba tswang kwa United States ba jaanong ba direlang kwa tshimong e go buiwang Seesemane kwa go yone kwa Mexico, le bone ba thusitswe thata ke thapelo. Ba akantsha jaana: “O se ka wa letela nako e ka yone maemo a tla bong a siame. Rapelela kgang ya gago ya go batla go direla kwa nageng e sele mme o diragatse se o se rapelelang. Tlhofofatsa botshelo jwa gago, kwalela lekala la naga e o batlang go direla kwa go yone, mme morago ga go bala ditshenyegelo, fuduga!” * Fa o ka dira jalo, o tla nna le botshelo jo bo itumedisang le jo bo tla go nonotshang semoyeng.