Jesu ga a tshwane le motho ope yo mongwe ka gonne o ne a tshela kwa legodimong e le motho wa moya pele ga a tsholwa mo lefatsheng. (Johane 8:23) Ke ene wa ntlha yo Modimo a mmopileng mme o ne a thusa go bopa dilo tse dingwe tsotlhe. Ke ene fela yo Jehofa a mmopileng ka tlhamalalo, ke gone ka moo a bidiwang Morwa Modimo “yo o tsetsweng a le esi.” Jesu e ne e le Mmueledi wa Modimo, ka jalo gape o bidiwa “Lefoko.”—Johane 1:1-3, 14; bala Diane 8:22, 23, 30; Bakolosa 1:15, 16.

Modimo o ne a romela Morwawe mo lefatsheng ka go fetisetsa botshelo jwa gagwe mo sebopelong sa lekgarebane la Mojuda le le neng le bidiwa Marea. Ka jalo, Jesu o ne a se na rre wa motho. (Luke 1:30-35) Jesu o ne a tla mo lefatsheng go tla (1) go ruta boammaaruri ka Modimo, (2) go tlhoma sekao sa go dira thato ya Modimo le (3) go ntsha botshelo jwa gagwe jo bo itekanetseng e le “thekololo.”—Bala Mathaio 20:28; Johane 18:37.

Thekololo ke madi a a duelwang go golola motho mo bokgobeng. Boikaelelo jwa Modimo jwa kwa tshimologong ka batho bo ne bo sa akaretse loso le botsofe. Re itse seo jang? Modimo o ne a bolelela motho wa ntlha e bong Adame gore fa a ne a ka dira se Baebele e se bitsang boleo, o ne a tla swa. Fa Adame a ka bo a sa leofa, o ka bo a sa swa. Le fa Adame a ile a swa morago ga makgolo a se kae a dingwaga, o ne a simolola go swa ka letsatsi le a neng a se ka a ikobela Modimo ka lone. (Genesise 2:16, 17; 5:5) Adame o ne a fetisetsa boleo le katlholo ya jone e leng loso mo ditlogolwaneng tsotlhe tsa gagwe. Ka jalo loso lo ne lwa “tsena” mo lefatsheng, ke gore, mo bathong ka Adame. Ke gone ka moo re tlhokang thekololo.—Bala Baroma 5:12; 6:23.

Ke mang yo o neng a ka re rekolola mo losong? Fa re swa, re duela katlholo ya maleo a rona fela. Ga go na motho ope yo o sa itekanelang yo o ka duelelang maleo a batho ba bangwe.—Bala Pesalema 49:7-9.

E re ka Jesu a ne a sa rua bosaitekanelang mo go rre wa motho, ga a ka a swa ka ntlha ya maleo a gagwe, go na le moo o ne a swela maleo a ba bangwe. Modimo o ne a romela Morwawe go tla go re swela a bontsha kafa a ratang batho thata ka gone. Jesu le ene o ne a bontsha gore o a re rata ka go ikobela Rraagwe a bo a swela maleo a rona.—Bala Johane 3:16; Baroma 5:18, 19.

Fa Jesu a ne a fodisa balwetse, a tsosa baswi a bo a namola batho ba ba mo mathateng, o ne a bontsha se kgabagare a tla se direlang batho botlhe ba ba kutlo. (Luke 18:35-42; Johane 5:28, 29) Fa Jesu a sena go swa, Modimo o ne a mo tsosa e le motho wa moya. (1 Petere 3:18) Go tswa foo, Jesu o ne a leta a le kafa seatleng sa Modimo sa moja go fitlha Jehofa a mo naya maatla a go busa e le Kgosi mo lefatsheng lotlhe. (Bahebera 10:12, 13) Gone jaanong Jesu o busa e le Kgosi kwa legodimong, mme balatedi ba gagwe ba ba mo lefatsheng ba itsise dikgang tse di molemo mo lefatsheng lotlhe.—Bala Daniele 7:13, 14; Mathaio 24:14.

Go ise go ye kae, Jesu o tla dirisa maatla a gagwe e le Kgosi go fedisa pogo yotlhe le ba ba e bakang. Batho ba le dimilionemilione ba ba dumelang mo go Jesu e bile ba mo ikobela ba tla itumelela go tshela mo lefatsheng la paradaise.—Bala Pesalema 37:9-11.