“ʻOku ʻikai ha taha kuó ne maʻu ha ʻofa ʻoku lahi ange ʻi he meʻá ni, ke tuku atu ʻe ha taha ʻene moʻuí maʻa hono ngaahi kaumeʻá.”​—Sione 15:13, Liliu Tohi Tapu Māmani Foʻoú.

 “Oku ikai ha tagata e lahi hake ene ofa i he mea ni, ke ne foaki ene moui koeuhi ko hono kaiga.”​—Sione 15:13, Paaki Motuʻa.

 Naʻe tokoniʻi ʻe Sīsū hono kau muimuí ke nau mahinoʻi ko ʻenau ʻofá ʻoku totonu ke mālohi ʻaupito ʻo aʻu ki ha tuʻunga te nau loto-lelei ke mate maʻá e tokotaha ʻe tahá.

 ʻI he ngaahi lea ʻa Sīsū ki muʻá, naʻá ne pehē ki heʻene kau ʻapositoló: “Ko ʻeku tuʻutuʻuní eni, ke mou feʻofaʻaki ʻo hangē tofu pē ko ʻeku ʻofaʻi kimoutolú.” (Sione 15:12) Ko e hā ʻa e faʻahinga ʻofa naʻe maʻu ʻe Sīsū kiate kinautolú? Ko e ʻofa taʻesiokita mo feilaulauʻi-kita. Lolotonga ʻene ngāue fakafaifekau ʻi he māmaní, naʻá ne fakamuʻomuʻa ʻa e ngaahi fiemaʻu mo e lelei ʻa hono kau muimuí mo e niʻihi kehé kae ʻikai ko haʻaná. Naʻá ne fakamoʻui ʻa e kakai naʻe puké pea akoʻi kinautolu fekauʻaki mo e Puleʻanga ʻo e ʻOtuá. a Naʻe aʻu ʻo ne ngāue fakatamaioʻeiki ke maʻu ʻaonga mei ai ʻa e niʻihi kehé. (Mātiu 9:35; Luke 22:27; Sione 13:3-5) Ka ʻi he Sione 15:13, naʻe ʻuhinga ʻa Sīsū ia ki ha fakahāhā ʻo e ʻofá ʻi ha tuʻunga lahi mamaʻo ange. Ko hono moʻoní, ʻi he hili ha lau houa mei heʻene leaʻaki ʻa e ngaahi lea ko iá, naʻá ne fakahāhā ʻa e ʻofa lahi ange ko iá ʻi heʻene loto-lelei ke foaki “ʻene moʻuí ko ha huhuʻi ko e fetongi ʻo e tokolahi.” (Mātiu 20:28; 22:39) Naʻá ne fakahāhā ai ʻi ha founga makehe ko ʻene ʻofa ki he niʻihi kehé naʻe lahi ange ia ʻi heʻene ʻofa ʻiate ia tonú.

 ʻOku ʻofa ʻa Sīsū ki he faʻahinga ʻo e tangatá. Ka ʻoku tautefito ʻene ʻofá ki he faʻahinga ʻoku muimui ki heʻene ngaahi akonakí. Naʻá ne lau ʻene kau ākongá ko hono ngaahi kaumeʻa ofi koeʻuhí naʻa nau talangofua ki heʻene ngaahi fakahinohinó pea nōfoʻi mo ia ʻi hono ngaahi ʻahiʻahí. (Luke 22:28; Sione 15:14, 15) Ko ia naʻá ne maʻu ha toe ʻuhinga lahi ange ke feilaulauʻi ʻene moʻuí maʻa kinautolu.

 Ko e kau Kalisitiane ʻi he ʻuluaki senitulí naʻa nau ngāueʻaki ʻa e lea ʻa Sīsuú ʻi heʻenau moʻuí, pea naʻa nau loto-lelei ke mate maʻá e tokotaha ʻe tahá. (1 Sione 3:16) Ko e moʻoni, ko e ʻofa taʻesiokitá​—ʻa e ʻofa naʻe fakahāhā ʻe Sīsuú​—ʻe hoko ia ko e fakaʻilonga tuʻu-ki-muʻa taha ʻe ʻiloʻiʻaki ʻa e kau Kalisitiane moʻoní.​—Sione 13:34, 35.

 Ko e vahe 13 ki he 17 ʻo e Kōsipeli ʻa Sioné ʻoku hiki ai ʻa e akonaki fakaʻosi ʻa Sīsū ki heʻene kau ʻapositolo faitōnunga ʻe toko 11 pea mo ʻene lotu fakaʻosi mo kinautolú. Naʻá ne pekia ʻi ha ngaahi houa siʻi ki mui ai. ʻI he vahe 15, ke fakatātaaʻi ʻa e fiemaʻu ki heʻene kau ākongá ke nofo maʻu ʻo fāʻūtaha mo ia kae lava ke nau fakamoʻoniʻi ko hono kau muimui kinautolú, ʻoku fakahoa ʻe Sīsū ʻene kau ākongá ki ha ngaahi vaʻa ʻoku fua ʻi ha fuʻu kālepi. ʻOkú ne enginaki kiate kinautolu ke “hokohoko atu [ʻenau] fua lahí.” (Sione 15:1-5, 8) Ko e founga ʻe taha ke nau fai pehē aí ko hono fakahāhā ʻa e ʻofa feilaulauʻi-kita ki he niʻihi kehé, ʻa ia ʻoku kau ki ai ʻa hono malangaʻi ʻa e pōpoaki naʻe malangaʻi ʻe Sīsuú​—“ʻa e ongoongo lelei ʻo e Puleʻanga ʻo e ʻOtuá.”​—Luke 4:43; Sione 15:10, 17.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa Sioné.